Telangana: చూశారా ఈ చిత్రం.. తల్లిపై పోటీకి దిగిన కూతురు.. ఇద్దరికీ ప్రధాన పార్టీల మద్దతు

తెలంగాణలో స్థానిక ఎన్నికల సంబరం నడుస్తోంది. పల్లెల్లో ఆసక్తికర సీన్స్ కనిపిస్తున్నాయి. ఎన్నికల్లో బంధుత్వాన్నీ కూడా పట్టించుకోవడం లేదు. వచ్చిన అవకాశాన్ని వదిలిపెట్టడం లేదు. పంచాయితీ ఎన్నికల్లో అన్నాతమ్ముళ్లు, బావామరుదులు.. వేరు వేరు పార్టీల మద్దతులో తలపడటం ఇప్పటివరకు చూశారం. తాజాగా జరుగుతున్న సర్పంచ్ ఎన్నికల్లో ఏకంగా తల్లిపై కూతురే పోటీకి దిగింది. దీంతో పోరు రసవత్తరంగా మారింది. మరి తల్లి గెలుస్తుందా..కూతురు గెలుస్తుందా..? అన్న చర్చ గ్రామస్థుల్లో నడుస్తోంది.

జగిత్యాల జిల్లా కోరుట్ల మండలం తిమ్మయ్య పల్లె గ్రామ సర్పంచ్ ఎన్నికల్లో తల్లీ కూతురు మధ్య.. ఆసక్తికర పోరు నెలకొంది. తిమ్మయ్య పల్లె రిజర్వేషన్ బీసీ మహిళకు వెళ్లింది. దీంతో తల్లి శివరాత్రి గంగవ్వ.. బరిలోకి దిగగా..  ఆమె కూతురు సుమలత సైతం ఎన్నికల్లో పోటీ చేస్తున్నట్లు ప్రకటించారు. తల్లికి బీఆర్‌ఎస్ మద్దతు ప్రకటించగా.. కూతుర్ని అధికార కాంగ్రెస్ బలపరిచింది. ఇప్పుడు..ఈ ఇద్దరు.. విడివిడిగా ఇంటింటికి వెళ్లి ప్రచారం నిర్వహిస్తున్నారు. సుమలత..ఇదే గ్రామానికి చెందిన ఓ వ్యక్తిని ప్రేమించి..పెళ్లి చేసుకుంది. అప్పటి నుంచి.. ఈ రెండు కుటుంబాల మధ్య గ్యాప్ ఏర్పడింది. ఇప్పుడు..రిజర్వేషన్ అనుకూలించడంతో.. పోటీకి సై అంటున్నారు. మిగతా అభ్యర్థులు కొందరు బరిలో ఉన్నప్పటికీ.. ప్రధాన పార్టీల మద్దతుతో పోటీ చేస్తున్న.. తల్లి, కూతురు పోటీపైనే ఆసక్తికర చర్చ సాగుతుంది. ఇప్పటికే ఇరువరూ ఇంటింటి ప్రచారాన్ని ఉదృతం చేశారు. కులాలవారిగా సమావేశాలు నిర్వహిస్తున్నారు. ఏ చిన్నపాటి అవకాశాన్ని వదలకుండా.. ప్రచారం చేస్తున్నారు. అంతేకాదు.. తల్లి, కూతురు చేస్తున్న ప్రచారాన్ని చూడటానికి ఇతర గ్రామస్తులు ఆసక్తి కనబరుస్తున్నారు. తల్లికూతురు మధ్య..ఇలాంటి పోరు ఉండటం చాలా అరుదు. మరి.. ఈ సర్పంచ్ ఎన్నికల్లో..ఎవరు పై చేయి సాధిస్తారో వేచి చూడాలి.

మరిన్ని తెలంగాణ వార్తల కోసం ఇక్కడ క్లిక్ చేయండి.