Telangana: ఏడాదికి 9 పంటలు.. రైతులకు కాసుల వర్షం.. కాకతీయుల కోటలో పచ్చటి సిరులు..

శతాబ్దాల నాటి కాకతీయుల వైభవానికి సజీవ సాక్ష్యం.. శిల్పకళా చాతుర్యానికి నిలువెత్తు నిదర్శనం చారిత్రక ఖిలా వరంగల్. రాతి స్తంభాలు, ఏకశిలా తోరణాలు, పురాతన కోటగోడలతో అలరారే ఈ చారిత్రక క్షేత్రం ఇప్పుడు సరికొత్త సొబగులను అద్దుకుంటుంది. గంభీరమైన రాతి కట్టడాల మధ్య పచ్చని పంటమడులు కనువిందు చేస్తున్నాయి. ఇక్కడి రైతులు వాణిజ్య పంటలకేమాత్రం తీసిపోని విధంగా ఆకుకూరల సాగు చేపడుతూ కోట గోడల చెంత హరిత విప్లవానికి బాటలు వేస్తున్నారు. ఖిలా వరంగల్ పరిధిలోని వ్యవసాయ భూములు ఇప్పుడు ఆకుకూరల సాగుకు ప్రధాన చిరునామాగా మారాయి. ఇక్కడి సారవంతమైన నల్లరేగడి నేలలు ఆకుకూరలకు అత్యంత అనుకూలంగా ఉండటం రైతులకు కలిసొచ్చింది. పాలకూర, తోటకూర, బచ్చలికూర, కొత్తిమీర, మెంతికూర వంటి విభిన్న రకాల పంటలను రైతులు ఇక్కడ విస్తారంగా పండిస్తున్నారు. భూమిని నమ్మిన రైతుకు భుక్తికి కొదవలేదు అన్న నానుడిని నిజం చేస్తూ, ఉన్న కొద్దిపాటి భూమిలోనే ప్రణాళికాబద్ధంగా సాగు చేస్తూ చక్కని జీవనోపాధిని పొందుతున్నారు.

ఏడాదికి 9 పంటలు.. నిత్యం నికర ఆదాయం

ఆకుకూరల పంట కాలం చాలా తక్కువ. విత్తిన కొద్ది రోజుల్లోనే కోతకు వస్తుండటంతో ఏడాది కాలంలోనే ఏకంగా 8 నుంచి 9 సార్లు పంటలు తీస్తూ రైతులు నిరంతర ఆదాయాన్ని అందుకుంటున్నారు. మార్కెట్‌లో నిత్యం ఆకుకూరలకు స్థిరమైన డిమాండ్ ఉండటంతో అమ్మకాల సమస్యే ఉండటం లేదు. ‘‘చిన్న చినుకైనా చెరువు నిండుతుంది.. చిన్న సాగైనా రైతు ఇల్లు నింపుతుంది’’ అన్నట్లుగా.. చిన్న కమతాలైనప్పటికీ నిరంతరం చేతికి నగదు అందుతుండటంతో రైతన్నల ముఖాల్లో ఆనందం వెల్లివిరుస్తోంది. కోసిన ఆకుకూరలను ఎప్పటికప్పుడు తాజా కట్టలుగా కట్టి మార్కెట్లకు తరలించడంలో రైతు కుటుంబ సభ్యులంతా చేదోడువాదోడుగా నిలుస్తున్నారు.

పర్యాటకులను కట్టిపడేస్తున్న సరికొత్త అందాలు

కాకతీయ సామ్రాజ్యపు అపురూప శిల్పసంపద, అతి పురాతన కోట బురుజులను చూసేందుకు వచ్చే దేశ విదేశీ పర్యాటకులకు ఈ పచ్చదనం సరికొత్త అనుభూతిని పంచుతోంది. గంభీరమైన చారిత్రక రాతి గోడల మధ్య పచ్చటి తివాచీ పరిచినట్లుగా దర్శనమిచ్చే ఈ పంటపొలాలు చూపరుల మనసులను పులకింపజేస్తున్నాయి.

ఒకవైపు ఘనమైన చరిత్ర వైభవం.. మరోవైపు రైతు చెమటచుక్కతో చిగురిస్తున్న పచ్చటి జీవనం కలగలిసి ఖిలా వరంగల్‌కు సరికొత్త శోభను తీసుకొస్తున్నాయి. కోట పరిరక్షణతో పాటు నేలతల్లిని నమ్ముకుని ఆకుకూరలతో సరికొత్త చరిత్ర లిఖిస్తున్న ఇక్కడి అన్నదాతల కృషి ప్రతి ఒక్కరికీ ఆదర్శంగా నిలుస్తోంది.

వీడియో చూడండి..