Bharat Summit 2026: హైదరాబాద్‌ వేదికగా భారత్ సమ్మిట్–2026.. 70 దేశాల నుంచి 1,000 మంది ప్రతినిధులు

హైదరాబాద్: ప్రపంచవ్యాప్తంగా ఎదురవుతున్న సవాళ్లకు పరిష్కారాలను అన్వేషించడం, అంతర్జాతీయ సహకారాన్ని బలోపేతం చేయడం లక్ష్యంగా తెలంగాణ ప్రభుత్వం భారత్ సమ్మిట్–2026 నిర్వహిస్తోంది. నవంబర్ 12 నుంచి 14 వరకు మూడు రోజుల పాటు హైదరాబాద్ వేదికగా జరగనున్న ఈ అంతర్జాతీయ సదస్సుకు సుమారు 70 దేశాల నుంచి 1,000 మంది ప్రతినిధులు హాజరుకానున్నారు. రాజకీయ నాయకులు, విధాన నిర్ణేతలు, విద్యావేత్తలు, పారిశ్రామికవేత్తలు, అంతర్జాతీయ నిపుణులు ఇందులో పాల్గొని వివిధ అంశాలపై తమ అభిప్రాయాలను పంచుకోనున్నారు.

70 దేశాల ప్రతినిధులతో అంతర్జాతీయ వేదిక

ప్రపంచవ్యాప్తంగా ఎదురవుతున్న సవాళ్లను సమర్థంగా ఎదుర్కోవడంతో పాటు అంతర్జాతీయ సహకారానికి కొత్త మార్గాలను అన్వేషించడమే భారత్ సమ్మిట్ ప్రధాన ఉద్దేశమని కాంగ్రెస్ విదేశీ వ్యవహారాల విభాగం చైర్మన్, మాజీ విదేశాంగ మంత్రి సల్మాన్ ఖుర్షీద్ తెలిపారు. ప్రస్తుతం ప్రపంచం కీలకమైన మార్పుల దశలో ఉందని, కొత్త ప్రపంచ వ్యవస్థ ఆవిర్భవిస్తోందని పేర్కొన్నారు. ఈ మార్పులకు సరైన దిశానిర్దేశం చేయడంలో కాంగ్రెస్ పార్టీ కీలక పాత్ర పోషించగలదని ఆయన విశ్వాసం వ్యక్తం చేశారు. లావాదేవీల ఆధారిత విదేశాంగ విధానానికి కాంగ్రెస్ వ్యతిరేకమని, సిద్ధాంతాలు, నైతిక విలువల ఆధారంగా రూపొందిన విదేశాంగ విధానానికే తమ మద్దతు ఉంటుందని స్పష్టం చేశారు. 2029లో కాంగ్రెస్ ప్రభుత్వం ఏర్పాటు చేయడమే తమ లక్ష్యమని కూడా వ్యాఖ్యానించారు.

ప్రజాస్వామ్యం నుంచి ఏఐ వరకు.. విస్తృత చర్చలు

మూడు రోజుల పాటు జరిగే ఈ సమ్మిట్‌లో ప్రజాస్వామ్యం, సామాజిక-ఆర్థిక న్యాయం, వాతావరణ మార్పులు, లింగ సమానత్వం, విదేశాంగ విధానం, మారుతున్న ప్రపంచ వ్యవస్థ వంటి అంశాలపై చర్చలు జరగనున్నాయి. కృత్రిమ మేధ (AI), క్లౌడ్ క్యాపిటలిజం, అంతర్జాతీయ సంబంధాలపై కూడా నిపుణులు తమ అభిప్రాయాలను పంచుకోనున్నారు. ముఖ్యంగా గ్లోబల్ నార్త్, గ్లోబల్ సౌత్ దేశాల మధ్య పరస్పర సహకారాన్ని బలోపేతం చేయడానికి ఈ సదస్సు ఉపయోగపడుతుందని నిర్వాహకులు భావిస్తున్నారు.

తెలంగాణ రైజింగ్.. ప్రత్యేక సెషన్లు

అంతర్జాతీయ ప్రతినిధులకు తెలంగాణ అభివృద్ధి ప్రస్థానాన్ని పరిచయం చేసేందుకు సమ్మిట్‌లో ‘తెలంగాణ రైజింగ్’ థీమ్‌తో ప్రత్యేక సెషన్లు నిర్వహించనున్నారు. రాష్ట్రంలో అభివృద్ధి, సంక్షేమం, పట్టణీకరణ, సంస్కృతి, క్రీడా రంగాల్లో సాధించిన పురోగతిని ప్రపంచ దేశాల ప్రతినిధులకు వివరించనున్నట్లు ఐటీ, పరిశ్రమల శాఖ మంత్రి శ్రీధర్ బాబు తెలిపారు. మరోవైపు త్వరలో నిర్వహించనున్న ఇన్వెస్ట్ తెలంగాణ గ్లోబల్ సమ్మిట్ ద్వారా రాష్ట్ర ఆర్థిక విధానాలు, ఫ్లాగ్‌షిప్ కార్యక్రమాలను అంతర్జాతీయ పెట్టుబడిదారులకు పరిచయం చేసి భారీగా పెట్టుబడులను ఆకర్షించడమే ప్రభుత్వ లక్ష్యమని వివరించారు.

దావోస్‌కు దీటుగా హైదరాబాద్.. భట్టి విక్రమార్క

హైదరాబాద్‌ను అంతర్జాతీయ రాజకీయ, సామాజిక, ఆర్థిక చర్చలకు మరో ప్రధాన వేదికగా తీర్చిదిద్దాలన్నది తెలంగాణ ప్రభుత్వ లక్ష్యమని ఉప ముఖ్యమంత్రి భట్టి విక్రమార్క పేర్కొన్నారు. ఆర్థిక వ్యవహారాలకు దావోస్ ఎలాగో.. ప్రపంచవ్యాప్తంగా రాజకీయ, సామాజిక, ఆర్థిక అంశాలపై చర్చలకు హైదరాబాద్ కూడా అలాంటి గుర్తింపు పొందాలని ఆకాంక్షించారు. గత ఏడాది భారత్ సమ్మిట్‌కు ప్రపంచవ్యాప్తంగా పలువురు నాయకులు, మేధావులు, రాజకీయ సంస్కరణవాదులు, విధాన నిర్ణేతలు హాజరై కాంగ్రెస్ భావజాలం, సిద్ధాంతాలపై చర్చించారని గుర్తుచేశారు.

విభజన, విద్వేష రాజకీయాలు దేశాలకు, సమాజాలకు పరిష్కారం కాదని, అహింస, అణుబంధ రహిత విధానం, ప్రగతిశీల, ఉదారవాద ఆలోచనలకు ప్రపంచవ్యాప్తంగా ఆదరణ పెరుగుతోందని భట్టి విక్రమార్క అభిప్రాయపడ్డారు. ఈ నేపథ్యంలో రెండోసారి నిర్వహిస్తున్న భారత్ సమ్మిట్‌లో పాల్గొనేందుకు 70 దేశాల నుంచి సుమారు 1,000 మంది ప్రతినిధులు ఆసక్తి వ్యక్తం చేశారని తెలిపారు. అంతర్జాతీయ స్థాయిలో హైదరాబాద్‌కు ప్రత్యేక గుర్తింపు తీసుకురావడమే ఈ కార్యక్రమం వెనుక ఉన్న ప్రధాన ఉద్దేశమని వివరించారు.

రాహుల్ గాంధీ, ఖర్గే, ప్రియాంకకు ఆహ్వానం

భారత్ సమ్మిట్‌లో పాల్గొనాల్సిందిగా కాంగ్రెస్ అగ్రనేతలు మల్లికార్జున ఖర్గే, రాహుల్ గాంధీ, ప్రియాంక గాంధీలను ఆహ్వానించినట్లు మంత్రి శ్రీధర్ బాబు వెల్లడించారు. నవంబర్ 14న జరిగే సమ్మిట్ ముగింపు కార్యక్రమంలో లోక్‌సభ ప్రతిపక్ష నేత రాహుల్ గాంధీ ప్రసంగించనున్నారు. అనంతరం గిగ్ వర్కర్లతో ప్రత్యేకంగా సమావేశమై, అదే రోజు రాత్రి ఢిల్లీకి బయలుదేరనున్నారు.

రెండోసారి నిర్వహణ.. తెలంగాణకు గర్వకారణం

హైదరాబాద్‌లో వరుసగా రెండోసారి భారత్ సమ్మిట్ నిర్వహించడం రాష్ట్రానికి గర్వకారణమని టీపీసీసీ అధ్యక్షుడు మహేశ్ కుమార్ గౌడ్ పేర్కొన్నారు. ప్రపంచవ్యాప్తంగా ప్రజాస్వామ్య, ప్రగతిశీల భావజాలాన్ని విశ్వసించే నాయకులు, ప్రతినిధులను ఒకే వేదికపైకి తీసుకురావడంలో ఈ సదస్సు కీలకంగా నిలుస్తుందని ఆయన అభిప్రాయపడ్డారు.

అంతర్జాతీయ వేదికగా హైదరాబాద్

ఒకవైపు ప్రపంచ రాజకీయ, సామాజిక అంశాలపై చర్చలకు భారత్ సమ్మిట్ వేదికగా నిలుస్తుండగా, మరోవైపు ఇన్వెస్ట్ తెలంగాణ గ్లోబల్ సమ్మిట్ ద్వారా అంతర్జాతీయ పెట్టుబడులను ఆకర్షించేందుకు ప్రభుత్వం ప్రయత్నిస్తోంది. ఈ రెండు కార్యక్రమాల ద్వారా హైదరాబాద్‌కు అంతర్జాతీయ గుర్తింపుతో పాటు రాష్ట్రానికి కొత్త పెట్టుబడులు, వ్యాపార భాగస్వామ్యాలు, అభివృద్ధి అవకాశాలు ఎంతవరకు లభిస్తాయన్నది ఆసక్తికరంగా మారింది.

మరిన్ని తెలంగాణ వార్తల కోసం ఇక్కడ క్లిక్ చేయండి.