స్కోడా స్లావియా కొత్త వెర్షన్​ చూశారా? అడ్వాన్స్​డ్‌ ఫీచర్లతో మార్కెట్‌లో దూసుకుపోవడానికి రెడీ

ప్రముఖ చెక్ కార్ల తయారీ సంస్థ స్కోడా ఆటో ఇండియా పాపులర్ మిడ్-సైజ్ సెడాన్ స్లావియా ఫేస్‌లిఫ్ట్ 2026ను భారత్‌లో అధికారికంగా ఆవిష్కరించింది. ఆకట్టుకునే డిజైన్, సరికొత్త టెక్నాలజీతో స్కోడా స్లావియా ఫేస్‌లిఫ్ట్ మార్కెట్లోకి రానుంది. వెనుక సీట్ల మసాజింగ్ ఫంక్షన్, కొత్త 8-స్పీడ్ ఆటోమేటిక్ గేర్‌బాక్స్ వంటి ప్రత్యేకతలతో వస్తున్న ఈ కారు గురించిన పూర్తి వివరాలు తెలుసుకుందాం.

ఇంటీరియర్ ఫీచర్లు

కొత్త మోడల్‌లో డిజైన్ మార్పులతో పాటు అధునాతన ఫీచర్లు, మెరుగైన ఏసీ వ్యవస్థ, 360-డిగ్రీ కెమెరా, కొత్త ఆటోమేటిక్ గేర్‌బాక్స్ వంటి కీలక అప్‌డేట్‌లు ఉన్నాయి. స్లావియా ఫేస్‌లిఫ్ట్‌కు సంబంధించిన ప్రీ-బుకింగ్‌లు ఇప్పటికే ప్రారంభమయ్యాయి. ఫేస్‌లిఫ్ట్ అయినప్పటికీ కారు మొత్తం సిల్హౌట్‌లో పెద్దగా మార్పులు చేయలేదు. అయితే ముందు, వెనుక భాగాల్లో పలు డిజైన్ అప్‌డేట్‌లు చేశారు.

కొత్త స్లావియాలో రీడిజైన్ చేసిన హెడ్‌లైట్లు, టెయిల్‌లైట్లు, ఫ్రంట్ గ్రిల్, ఎయిర్ డామ్, అల్లాయ్ వీల్స్ ఉన్నాయి. స్కోడా కుషాక్ డిజైన్‌ను పోలి ఉండేలా గ్రిల్‌లోనే సెగ్మెంటెడ్ LED డేటైమ్ రన్నింగ్ ల్యాంప్స్ ఏర్పాటు చేశారు. వెనుక భాగంలో సీక్వెన్షియల్ టర్న్ ఇండికేటర్లు అందించారు. స్లావియా ఫేస్‌లిఫ్ట్‌లో కొత్తగా ఆర్కిటిక్ సిల్వర్, కాపుచినో బేజ్ రంగులను పరిచయం చేశారు. వీటితో పాటు మరిన్ని కలర్ ఆప్షన్లు కూడా అందుబాటులో ఉంటాయి.

కొత్త స్లావియా ఫేస్‌లిఫ్ట్‌లో అత్యంత ఆసక్తికరమైన ఫీచర్లలో వెనుక సీట్ల మసాజింగ్ ఫంక్షన్ ఒకటి. ఈ సెగ్మెంట్‌లో ఇలాంటి ఫీచర్‌ను అందిస్తున్న తొలి కార్లలో ఇది నిలిచింది. ఇంటీరియర్‌లో పాత 10-అంగుళాల ఇన్ఫోటైన్‌మెంట్ స్క్రీన్ స్థానంలో 10.1-అంగుళాల టచ్‌స్క్రీన్, అలాగే 10.25-అంగుళాల డ్రైవర్ డిస్‌ప్లేను అందించారు. పాత రియర్-వ్యూ కెమెరా స్థానంలో 360-డిగ్రీ కెమెరాను ఏర్పాటు చేశారు.

ఇంజిన్ ఆప్షన్లు

2026 స్కోడా స్లావియా ఫేస్‌లిఫ్ట్‌లో ఇంజిన్ ఆప్షన్లలో పెద్ద మార్పు లేదు. ఇందులో 1.0-లీటర్ TSI టర్బో పెట్రోల్ మరియు 1.5-లీటర్ TSI టర్బో పెట్రోల్ ఇంజిన్ ఆప్షన్లు కొనసాగనున్నాయి. 1.0-లీటర్ TSI ఇంజన్‌తో 6-స్పీడ్ మాన్యువల్ గేర్‌బాక్స్ లభిస్తుంది. అలాగే కొత్త స్లావియాలో ప్రధానమైన మెకానికల్ అప్‌డేట్ 1.0-లీటర్ TSI ఆటోమేటిక్ వేరియంట్‌లో వచ్చింది. గతంలో ఉన్న 6-స్పీడ్ ఆటోమేటిక్ గేర్‌బాక్స్ స్థానంలో ఇప్పుడు 8-స్పీడ్ టార్క్ కన్వర్టర్ ఆటోమేటిక్ గేర్‌బాక్స్‌ను అందించారు. 1.5-లీటర్ TSI ఇంజన్‌తో 7-స్పీడ్ డ్యూయల్ క్లచ్ ఆటోమేటిక్ గేర్‌బాక్స్ లభిస్తుంది.

కుషాక్‌లో మాదిరిగానే మెరుగైన ఏసీ పనితీరు కోసం కొత్త స్లావియాలో వేరియబుల్-డిస్‌ప్లేస్‌మెంట్ కంప్రెసర్‌ను ఉపయోగించారు. కొత్త స్కోడా స్లావియా ఫేస్‌లిఫ్ట్ భారత మార్కెట్‌లో హ్యుందాయ్ వెర్నా, హోండా సిటీ వంటి మిడ్-సైజ్ సెడాన్లతో పోటీపడుతుంది. కొత్త డిజైన్, పెద్ద డిస్‌ప్లేలు, 360-డిగ్రీ కెమెరా, వెనుక సీట్ల మసాజింగ్ ఫంక్షన్, 8-స్పీడ్ ఆటోమేటిక్ గేర్‌బాక్స్ వంటి అప్‌డేట్‌లతో ఈ కారు మరింత ఆకర్షణీయంగా మారింది. ప్రీ-బుకింగ్‌లు ప్రారంభమైన నేపథ్యంలో త్వరలో దీని ధరలను కంపెనీ అధికారికంగా ప్రకటించనుంది.