సెకండ్ హ్యాండ్ స్మార్ట్‌ఫోన్ కొంటున్నారా? ఈ 4 విషయాలు తప్పక చెక్ చేసుకోవాలని తెలుసా
కొత్త స్మార్ట్‌ఫోన్ల ధరలు రోజురోజుకూ పెరుగుతున్నాయి. దీంతో తక్కువ బడ్జెట్‌లో మంచి ఫీచర్లు ఉన్న ఫోన్ కొనాలనుకునే చాలామంది సెకండ్ హ్యాండ్ స్మార్ట్‌ఫోన్ల వైపు మొగ్గు చూపుతున్నారు. కొత్త ఫోన్‌తో పోలిస్తే తక్కువ ధరకే మంచి మోడల్ దొరికే అవకాశం ఉండటంతో ఈ మార్కెట్‌కు డిమాండ్ పెరుగుతోంది. అయితే తక్కువ ధరకు వస్తోందని తొందరపడి ఫోన్ కొనుగోలు చేస్తే తర్వాత ఇబ్బందులు ఎదురయ్యే ప్రమాదం ఉంది.
Updated on: Nov 15, 2026 | 8:10 PM
మార్కెట్‌లో తక్కువ ధరలో అందుబాటులో ఉండే కొన్ని ఫోన్లు దొంగిలించినవి కావచ్చు. మరికొన్ని ఫోన్లలో బయటకు కనిపించని హార్డ్‌వేర్ సమస్యలు ఉండవచ్చు. ఇలాంటి ఫోన్లను పూర్తిగా తనిఖీ చేయకుండా కొనుగోలు చేస్తే ఆర్థికంగా నష్టపోవడమే కాకుండా, కొన్ని సందర్భాల్లో చట్టపరమైన సమస్యలు కూడా ఎదురుకావచ్చు. అందుకే సెకండ్ హ్యాండ్ ఫోన్ కొనేముందు కొన్ని ముఖ్యమైన విషయాలను తప్పనిసరిగా పరిశీలించాలి.
IMEI నంబర్ చెక్ చేయండి
సెకండ్ హ్యాండ్ స్మార్ట్‌ఫోన్ కొనేటప్పుడు ముందుగా విక్రేతను ఒరిజినల్ బిల్లు, ఫోన్ బాక్స్ అడగాలి. ఫోన్‌ను చట్టబద్ధంగా కొనుగోలు చేసినట్లు నిరూపించడానికి ఒరిజినల్ బిల్లు ఉపయోగపడుతుంది. బిల్లు లేకుండా ఫోన్ కొనడం వల్ల అది దొంగిలించిన ఫోన్ అయితే అనవసరమైన చట్టపరమైన చిక్కులు ఎదురయ్యే అవకాశం ఉంది.
అలాగే ఫోన్‌లోని డయలర్‌ ఓపెన్ చేసి \*#06# టైప్ చేస్తే IMEI నంబర్ కనిపిస్తుంది. ఈ నంబర్‌ను ఫోన్ బాక్స్‌పై ఉన్న నంబర్‌తో, బిల్లులోని వివరాలతో సరిపోల్చాలి. ఫోన్ దొంగిలించబడిందా? బ్లాక్‌ చేయబడిందా? అనే విషయాలను తెలుసుకోవడానికి కేంద్ర ప్రభుత్వ Sanchar Saathi పోర్టల్‌ను కూడా ఉపయోగించవచ్చు.
పాత అకౌంట్లను పరిశీలించండి
ఫోన్ కొనేముందు స్క్రీన్‌, టచ్‌ పనితీరు, కెమెరా, స్పీకర్‌, ఛార్జింగ్ పోర్ట్‌, ఫింగర్‌ప్రింట్ సెన్సార్‌ సరిగ్గా పనిచేస్తున్నాయో లేదో పరీక్షించాలి. ముఖ్యంగా బ్యాటరీ పరిస్థితిని గమనించాలి. పాత ఫోన్లలో బ్యాటరీ త్వరగా అయిపోవడం, ఫోన్ వేడెక్కడం వంటి సమస్యలు ఉండవచ్చు.
అన్నింటికంటే ముఖ్యంగా పాత యజమాని Google లేదా Apple ID అకౌంట్ నుంచి పూర్తిగా లాగ్‌అవుట్ అయ్యారో లేదో నిర్ధారించుకోవాలి. ఫోన్‌ను ఫ్యాక్టరీ రీసెట్ చేసి, పాత యజమాని అకౌంట్ లాక్ లేకుండా కొత్తగా సెటప్ చేయగలుగుతున్నామో చూసుకోవాలి. పాస్‌వర్డ్ లాక్ లేదా యాక్టివేషన్ లాక్ ఉంటే ఫోన్ ఉపయోగించలేని పరిస్థితి రావచ్చు. ఈ నాలుగు విషయాలు జాగ్రత్తగా తనిఖీ చేసిన తర్వాతే డబ్బులు చెల్లించడం మంచిది.
