నథింగ్​ హెడ్‌ఫోన్స్‌ వస్తే సౌండ్ లవర్స్‌కు పండగే! లాంచ్​ డేట్, ఫీచర్ల పూర్తి వివరాలు

ప్రీమియం హెడ్‌ఫోన్ కొనాలనుకునే వారికి Nothing నుంచి రాబోతున్న కొత్త మోడల్ ఆసక్తికరంగా మారింది. Triple-Driver సాంకేతికత, 10 మైక్రోఫోన్ల Adaptive ANC, 60 గంటల బ్యాటరీ వంటి ఫీచర్లు ఇందులో ఉండనున్నట్లు సమాచారం. సెప్టెంబర్ 29న విడుదలయ్యే అవకాశం ఉందని లీకులు చెబుతున్నాయి. ధర కూడా ప్రీమియం స్థాయిలోనే ఉండే సూచనలు కనిపిస్తున్నాయి.

Triple-Driver సౌండ్..

Nothing Headphone 1 Proలో Triple-Driver ఆర్కిటెక్చర్‌ను ఉపయోగించినట్లు తెలుస్తోంది. బేస్, స్పష్టత కోసం ప్రత్యేక డ్రైవర్లతో పాటు అధిక పౌనఃపున్యాల కోసం XMems సాంకేతికతను అందించినట్లు సమాచారం. లండన్‌కు చెందిన Metropolis Studios సహకారంతో ధ్వని ట్యూనింగ్ చేసినట్లు తెలుస్తోంది. Hi-Res Audio సర్టిఫికేషన్, LDAC సపోర్ట్, Head Trackingతో Spatial Audio వంటి సౌకర్యాలు కూడా ఇందులో ఉండనున్నాయి. దీంతో పాటలు వినేటప్పుడు మరింత లోతైన ధ్వని అనుభూతి లభించే అవకాశం ఉంది.

10 మైక్రోఫోన్లు.. 60 గంటల బ్యాటరీ!

పరిసర శబ్దాలను తగ్గించేందుకు 10 మైక్రోఫోన్లతో Adaptive ANC సౌకర్యాన్ని అందిస్తున్నట్లు సమాచారం. చుట్టూ ఉన్న శబ్దాన్ని బట్టి శబ్ద నియంత్రణ స్థాయిని స్వయంగా మార్చుకునేలా ఇది పనిచేస్తుంది. ఒక్కసారి ఛార్జ్ చేస్తే 60 గంటల వరకు బ్యాటరీ బ్యాకప్ లభించనుందని తెలుస్తోంది. కనెక్టివిటీ కోసం Bluetooth 6.1, USB Type-C పోర్ట్, 3.5mm జాక్ ఉన్నాయి.

నిర్మాణం విషయంలో Aluminium Body, Scratch-Resistant Glassను ఉపయోగించినట్లు సమాచారం. దుమ్ము, నీటి చుక్కల నుంచి రక్షణ కోసం IP52 రేటింగ్ ఉండనుంది. లీకుల ప్రకారం యూరప్‌లో ధర సుమారు రూ.38,700, అమెరికాలో రూ.38,000గా ఉండొచ్చని తెలుస్తోంది. Black, White రంగుల్లో సెప్టెంబర్ 29న విడుదలయ్యే అవకాశం ఉంది. అయితే ధర, విడుదల తేదీపై Nothing నుంచి అధికారిక ప్రకటన రావాల్సి ఉంది.