లాంచ్కు సిద్దమైన Honda కొత్త ఎలక్ట్రిక్ SUV.. ఒక్కసారి చార్జ్‌ చేస్తే ఎంత దూరం వెళ్తుందంటే
Honda 0 Alpha EV Launch: భారత ఎలక్ట్రిక్ కార్ల మార్కెట్లోకి ప్రవేశించేందుకు ప్రముఖ జపనీస్ ఆటోమొబైల్ సంస్థ Honda సిద్ధమవుతోంది. ఇందులో భాగంగా తన తొలి పూర్తిస్థాయి ఎలక్ట్రిక్ SUVగా భావిస్తున్న Honda 0 Alphaను భారత మార్కెట్‌కు పరిచయం చేయనుంది. ఈ మోడల్ ప్రొడక్షన్ వెర్షన్‌ను డిసెంబర్ 2న ఆవిష్కరించనున్నట్లు సమాచారం. ఇప్పటికే భారత రోడ్లపై టెస్టింగ్ సమయంలో కనిపించిన ఈ SUV డిజైన్, బ్యాటరీ ఆప్షన్లు, ఇంటీరియర్ ఫీచర్లపై ఆసక్తి పెరుగుతోంది.
Updated on: Oct 20, 2026 | 9:50 PM
ప్రస్తుతం ఎలక్ట్రిక్ SUVలకు డిమాండ్ పెరుగుతున్న నేపథ్యంలో Honda కొత్త మోడల్‌తో ఈ విభాగంలో తన స్థానాన్ని బలోపేతం చేసుకోవాలని చూస్తోంది. ప్రత్యేకమైన బాడీ డిజైన్, ఆధునిక క్యాబిన్, రెండు బ్యాటరీ ఆప్షన్లు ఈ కారులో ప్రధాన ఆకర్షణలుగా నిలవనున్నాయి. అయితే, ధర, పూర్తి సాంకేతిక వివరాలు, డ్రైవింగ్ రేంజ్ వంటి అంశాలపై కంపెనీ అధికారిక ప్రకటన కోసం ఎదురుచూడాల్సి ఉంది.
డిసెంబర్ 2న ఆవిష్కరణ
Honda 0 Alpha కాన్సెప్ట్‌ను తొలిసారిగా 2025 అక్టోబర్‌లో పరిచయం చేశారు. ఇప్పుడు దాని ప్రొడక్షన్ వెర్షన్‌ను భారత మార్కెట్‌కు తీసుకొచ్చేందుకు కంపెనీ సిద్ధమవుతోంది. ఈ SUV తుది పేరును నవంబర్‌లో ప్రకటించే అవకాశం ఉందని సమాచారం. ఇటీవల భారీ క్యామోఫ్లేజ్‌తో ఉన్న టెస్ట్ వాహనం భారత రోడ్లపై కనిపించడంతో ప్రొడక్షన్ మోడల్‌కు సంబంధించిన కొన్ని వివరాలు వెలుగులోకి వచ్చాయి.
Honda 0 Alphaకు రెండు బ్యాటరీ ప్యాక్ ఆప్షన్లు అందించే అవకాశం ఉంది. ఇవి LFP బ్యాటరీ టెక్నాలజీతో రావచ్చని అంచనాలు ఉన్నాయి. బ్యాటరీ సామర్థ్యం 65kWh నుంచి 75kWh మధ్య ఉండొచ్చని తెలుస్తోంది. ప్రారంభంలో సింగిల్ మోటార్, ఫ్రంట్ వీల్ డ్రైవ్ (FWD) సెటప్‌తో ఈ SUV అందుబాటులోకి రావచ్చని సమాచారం.
ప్రత్యేకమైన డిజైన్..
Honda 0 Alpha డిజైన్ ప్రస్తుతం మార్కెట్‌లో ఉన్న కంపెనీ కార్లకు భిన్నంగా ఉండనుంది. నిటారుగా ఉండే వెనుక భాగం, బలమైన C-పిల్లర్, పెద్ద రియర్ విండ్‌స్క్రీన్ దీని ప్రత్యేకతలుగా కనిపిస్తున్నాయి. ముందు భాగంలో ఇల్యూమినేటెడ్ Honda లోగో, ఛార్జింగ్ పోర్ట్ ఉండే అవకాశం ఉంది. వెనుక బంపర్ కింద డిఫ్యూజర్ తరహా డిజైన్ కూడా కనిపించవచ్చని అంచనా.
క్యాబిన్‌లో పెద్ద సెంట్రల్ టచ్‌స్క్రీన్, చిన్న డిజిటల్ డ్రైవర్ డిస్‌ప్లే ఉండవచ్చని టెస్ట్ వాహనానికి సంబంధించిన వివరాలు సూచిస్తున్నాయి. ఫ్లాట్-బాటమ్ స్టీరింగ్ వీల్, ప్యాడిల్ షిఫ్టర్లు, క్లైమేట్ కంట్రోల్ కోసం ఫిజికల్ బటన్లు వంటి అంశాలు కూడా ప్రత్యేక ఆకర్షణగా నిలవనున్నాయి.
Honda 0 Alpha SUVను రాజస్థాన్‌లోని తపుకారా ప్లాంట్‌లో తయారు చేసే అవకాశం ఉందని సమాచారం. భారత మార్కెట్లోకి వచ్చిన తర్వాత Mahindra BE 6, Hyundai Creta Electric, Tata Sierra EV, Maruti Suzuki e-Vitara, Toyota Urban Cruiser Ebella వంటి ఎలక్ట్రిక్ SUVలతో పోటీ పడే అవకాశం ఉంది.
