ఫుట్బాల్ మైదానంలో క్రికెట్ ‘స్నికో’ సంచలనం.. క్రిస్టియానో రొనాల్డో వరల్డ్ కప్ కలని కాపాడిన థర్డ్ అంపైర్ టెక్నాలజీ!
Snickometer in Football: సాంకేతిక పరిజ్ఞానం ఆటలను మరింత పారదర్శకంగా మారుస్తోందనడానికి ఈ ఘటనే నిదర్శనం. ఒక క్రీడలోని టెక్నాలజీ మరో ఆటలోని దిగ్గజ ఆటగాడి కెరీర్ను, కోట్లాది మంది అభిమానుల కలలను కాపాడటం నిజంగా క్రీడా చరిత్రలోనే ఒక అరుదైన మరియు మరపురాని ఘట్టం.
Updated on: Jul 03, 2026 | 7:06 PM
Snickometer in Football: ఫుట్బాల్ ప్రపంచకప్ మహాసంగ్రామంలో అసలు ఊహించని అద్భుతం జరిగింది. మైదానంలో సాకర్ వీరులు తలపడుతుంటే, క్రికెట్ మ్యాచ్లలో వాడే ‘స్నికోమీటర్’ టెక్నాలజీ పోర్చుగల్ స్టార్ ఆటగాడు క్రిస్టియానో రొనాల్డో ప్రపంచకప్ కలను సజీవంగా నిలిపింది. క్రొయేషియాతో జరిగిన ఉత్కంఠభరిత పోరులో ఈ సాంకేతికత ఎలా మలుపు తిప్పిందో తెలిస్తే మీరు ముక్కున వేలేసుకుంటారు!
ఆఖరి నిమిషంలో హైడ్రామా.. క్రొయేషియా సంబరాలు..
పోర్చుగల్, క్రొయేషియా జట్ల మధ్య జరిగిన రౌండ్ ఆఫ్ 32 నాకౌట్ మ్యాచ్ ఫుట్బాల్ చరిత్రలోనే అత్యంత ఉత్కంఠభరిత ఘట్టాలకు వేదికైంది. మ్యాచ్ ముగిసే సమయానికి పోర్చుగల్ విజయం ఖాయమనుకున్న తరుణంలో, క్రొయేషియా ఆటగాడు జోస్కో గార్డియోల్ 103వ నిమిషంలో బంతిని నెట్లోకి పంపి అద్భుతమైన గోల్ చేశాడు. దాంతో క్రొయేషియా ఆటగాళ్లు, అభిమానులు మైదానంలోనే సంబరాల్లో మునిగిపోయారు. మ్యాచ్ ఎక్స్ట్రా టైమ్కు దారితీస్తుందని, రొనాల్డో సేనకు ముప్పు తప్పదని అందరూ భావించారు.
సస్పెన్స్ రేపిన ‘వార్’ పరిశీలన.. తెరపైకి క్రికెట్ టెక్నాలజీ..
అయితే, క్రొయేషియా చేసిన ఆ గోల్పై పోర్చుగల్ ఆటగాళ్లు అభ్యంతరం వ్యక్తం చేశారు. దాంతో ఫీల్డ్ అంపైర్ వీడియో అసిస్టెంట్ రెఫరీ (VAR) సమీక్షను కోరారు. రీప్లేలో క్రొయేషియా ఆటగాడు ఇగోర్ మాతనోవిచ్ పాస్ చేసినప్పుడు, మరో ఆటగాడు మారియో పసాలిచ్ ఆఫ్ సైడ్ పొజిషన్లో ఉన్నట్లు అనుమానం వచ్చింది. మాతనోవిచ్ తలకు బంతి తగిలిందా లేదా అన్నదే ఇక్కడ అసలు పాయింట్. ఒకవేళ బంతి తగిలి ఉంటే అది ఖచ్చితంగా ఆఫ్ సైడ్ అవుతుంది, గోల్ రద్దవుతుంది. సాధారణ టెలివిజన్ కెమెరాల రీప్లేలలో బంతి తలని తాకిందా లేదా అనేది స్పష్టంగా తేలలేదు.
రొనాల్డోను రక్షించిన అడిడాస్ ‘ట్రియోండా’ స్మార్ట్ బంతి..
ఈ క్లిష్ట సమయంలోనే 2026 ప్రపంచకప్ అధికారిక బంతి ‘అడిడాస్ ట్రియోండా’ (Adidas TRIONDA) లోని మోషన్ సెన్సార్ టెక్నాలజీ అద్భుతం చేసింది. ఈ బంతి లోపల ఉండే మైక్రోచిప్ సెన్సార్, బంతికి జరిగే ప్రతి చిన్న స్పర్శను రికార్డ్ చేస్తుంది. క్రికెట్లో బ్యాట్కు బంతి తగిలిందో లేదో తెలుసుకోవడానికి ఉపయోగించే ‘స్నికోమీటర్’ తరహా గ్రాఫ్ను ఈ సెన్సార్ స్క్రీన్పై చూపించింది. మాతనోవిచ్ జుట్టు బంతికి స్వల్పంగా తాకిన క్షణంలో స్నికో గ్రాఫ్లో పెద్ద ‘స్పైక్’ (కదలిక) కనిపించింది.
ఇదికూడా చదవండి: ఇంగ్లాండ్తో రెండో టీ20 సమరం.. టీమిండియాకు 2 శుభవార్తలు, ఒక డేంజరస్ అలర్ట్.!
దీంతో మైక్రో సెకన్ల తేడాతో బంతిని తాకినట్లు ఖచ్చితమైన ఆధారాలు లభించడంతో రెఫరీ ఆ గోల్ను రద్దు (ఆఫ్ సైడ్) చేస్తున్నట్లు ప్రకటించారు. ఒకవేళ ఆ గోల్ కనుక చెల్లుబాటై ఉంటే మ్యాచ్ ఫలితం మారిపోయేది, రొనాల్డో ప్రపంచకప్ కల అక్కడితోనే ముగిసిపోయేది. క్రికెట్ టెక్నాలజీ పుణ్యమా అని పోర్చుగల్ ఊపిరి పీల్చుకుంది.
క్రికెట్ ప్రపంచంలో ‘స్నికో’ వివాదాలు..
ఫుట్బాల్లో రొనాల్డోను కాపాడిన ఈ స్నికోమీటర్ టెక్నాలజీ, క్రికెట్లో మాత్రం అనేక వివాదాలకు కారణమైంది. ఇటీవల జరిగిన యాషెస్ సిరీస్లో ఆస్ట్రేలియా వికెట్ కీపర్ అలెక్స్ కారీ బ్యాట్కు బంతి తగిలినా స్నికోమీటర్ గుర్తించకపోవడంతో నాటౌట్గా ప్రకటించారు. ఆ తర్వాత కారీ స్వయంగా తనకు బంతి తగిలిందని ఒప్పుకోవడం గమనార్హం. అలాగే ఇంగ్లాండ్ కీపర్ జేమీ స్మిత్ కూడా ఇలాంటి ఒక వివాదాస్పద స్నికో రివ్యూ ద్వారానే అవుట్ అయ్యాడు. టెక్నాలజీలో కొన్ని లోపాలు ఉన్నప్పటికీ, ఈసారి మాత్రం అది రొనాల్డోకు అదృష్టంగా మారింది.
మరిన్ని క్రికెట్ వార్తల కోసం ఇక్కడ క్లిక్ చేయండి..
