Year Ender 2023: క్రికెట్ ప్రపంచంలో ప్రకంపనలు సృష్టించిన సంఘటనలు.. టాప్ 5 లిస్ట్ ఇదే..
Team India: కొత్త సంవత్సరం వచ్చింది. అన్ని రంగాల్లోనూ పాత సంఘటనలను గుర్తు చేసుకుని, కొత్త ఏడాదిలో మరింత నూతనోత్సాహంతో ముందుకు సాగాలని కోరుకుంటుంటారు. అయితే, క్రికెట్ ప్రపంచంలోనూ కొన్ని సంఘటనలు గతేడాది చోటు చేసుకున్నాయి. వీటిలో కొన్ని అరుదైన విషయాలు కూడా ఉన్నాయి. టాప్ 5 సంఘటనలపై ఓసారి లుక్ వేద్దాం..
Year Ender 2023: 2023లో క్రికెట్ ప్రపంచంలో ఎన్నో ప్రత్యేకమైన ఘటనలు చోటు చేసుకున్నాయి. భారతదేశంతో సహా ప్రపంచం నలుమూలల నుంచి క్రికెట్ జట్లు, క్రికెట్ ఆటగాళ్ళు క్రీడా ప్రపంచంలో కొన్ని రికార్డులను సృష్టించారు. ఇవి 2023కి ముందు ఎప్పుడూ చూడలేదు. అలాంటి 5 ఆసక్తికరమైన క్రికెట్ వాస్తవాల గురించి ఇప్పుడు తెలుసుకుందాం..
1. న్యూజిలాండ్ ఒక పరుగు తేడాతో చారిత్రాత్మక విజయం..
2023లో, వెల్లింగ్‌టన్‌లో ఇంగ్లండ్‌తో జరిగిన టెస్ట్ మ్యాచ్‌లో ఫాలో-ఆన్ తర్వాత కూడా న్యూజిలాండ్ 1 పరుగు తేడాతో విజయం సాధించింది. టెస్టు మ్యాచ్‌లో కేవలం 1 పరుగు తేడాతో విజయం సాధించిన రెండో జట్టుగా న్యూజిలాండ్ నిలిచింది. అంతకుముందు 1993లో అడిలైడ్ మైదానంలో జరిగిన టెస్ట్ మ్యాచ్‌లో వెస్టిండీస్ 1 పరుగు తేడాతో ఆస్ట్రేలియాను ఓడించింది.
2. టెస్టు చరిత్రలో బంగ్లాదేశ్ అతిపెద్ద విజయం..
2023లో, బంగ్లాదేశ్ జట్టు మిర్పూర్‌లో ఆడిన టెస్ట్ మ్యాచ్‌లో 546 పరుగుల తేడాతో ఆఫ్ఘనిస్తాన్‌ను ఓడించింది. ఇది పరుగుల పరంగా 21వ శతాబ్దంలో అతిపెద్ద విజయంగా నిలిచింది. బంగ్లాదేశ్‌కు ముందు, 1934లో ఇంగ్లండ్‌లోని ఓవల్‌లో జరిగిన టెస్ట్ మ్యాచ్‌లో ఆస్ట్రేలియా 562 పరుగుల తేడాతో ఇంగ్లాండ్‌ను ఓడించింది. అదే సమయంలో, 1928లో, బ్రిస్బేన్‌లో జరిగిన టెస్ట్ మ్యాచ్‌లో ఇంగ్లండ్ జట్టు 675 పరుగుల తేడాతో ఆస్ట్రేలియాను ఓడించింది, ఇది ఇప్పటి వరకు అతిపెద్ద టెస్ట్ విజయాలుగా నిలిచాయి.
3. ఇద్దరు కెప్టెన్లు కలిసి 50వ టెస్టు మ్యాచ్ ఆడారు..
వరల్డ్ టెస్ట్ ఛాంపియన్‌షిప్ 2023 ఫైనల్ మ్యాచ్‌లో భారత్, ఆస్ట్రేలియా మధ్య మ్యాచ్ జరిగింది. ఆ మ్యాచ్‌లో భారత జట్టు కెప్టెన్ రోహిత్ శర్మ కాగా, ఆస్ట్రేలియా కెప్టెన్ ప్యాట్ కమిన్స్. ఈ ఇద్దరు కెప్టెన్లకు ఇది 50వ టెస్టు మ్యాచ్. కాగా, రెండు జట్ల కెప్టెన్లు కలిసి తమ కెరీర్‌లో 50వ టెస్టు మ్యాచ్ ఆడడం టెస్ట్ క్రికెట్ చరిత్రలో అదే తొలిసారి.
4. అంతర్జాతీయ క్రికెట్‌లో తొలిసారి టైం ఔట్..
ఐసీసీ వన్డే ప్రపంచ కప్ సందర్భంగా, బంగ్లాదేశ్, శ్రీలంక మధ్య జరిగిన మ్యాచ్ సందర్భంగా, అంతర్జాతీయ క్రికెట్‌లో మొదటిసారిగా, టైమ్ అవుట్ రూల్ ద్వారా ఒక ఆటగాడు ఔట్ అయ్యాడు. శ్రీలంక ఆల్‌రౌండర్ ఏంజెలో మాథ్యూస్ టైం ఔట్‌గా వికెట్ కోల్పోయిన తొలి అంతర్జాతీయ క్రికెటర్‌గా నిలిచాడు. బంగ్లాదేశ్ కెప్టెన్ షకీబ్ అల్ హసన్ కొత్త బ్యాట్స్‌మెన్ ఏంజెలో మాథ్యూస్ తర్వాతి బంతిని 120 సెకన్ల పాటు ఆడని కారణంగా అతనిని అవుట్ చేయాల్సిందిగా అప్పీల్ చేయగా, అంపైర్ మాథ్యూస్‌ను ఔట్‌గా ప్రకటించాడు.
5. విరాట్ కోహ్లీ వన్డేల్లో 50వ సెంచరీ..
2023లో వన్డే క్రికెట్‌లో అత్యధిక సెంచరీలు చేసిన బ్యాట్స్‌మెన్‌గా విరాట్ కోహ్లీ నిలిచాడు. వన్డేల్లో అత్యధికంగా 49 సెంచరీలు చేసిన మాజీ బ్యాట్స్‌మెన్ సచిన్ టెండూల్కర్ రికార్డును బద్దలు కొట్టి, 50 వన్డే సెంచరీలు చేసిన ప్రపంచ బ్యాట్స్‌మెన్‌గా నిలిచాడు. వన్డే ప్రపంచకప్‌లో న్యూజిలాండ్‌తో జరిగిన సెమీ ఫైనల్ మ్యాచ్‌లో విరాట్ కోహ్లీ తన 50వ వన్డే సెంచరీని నమోదు చేశాడు.
మరిన్ని క్రీడా వార్తల కోసం ఇక్కడ క్లిక్ చేయండి..
