Team India : గంభీరా లేక శ్రేయస్ అయ్యరా ? నం.1 జట్టు వరుసగా 6 మ్యాచ్‌లు ఓడిపోవడం వెనుక కారణం ఎవరు ?

Team India : ప్రపంచ టీ20 ర్యాంకింగ్స్‌లో అగ్రస్థానంలో నిలిచి, వరుసగా రెండు టీ20 వరల్డ్ కప్‌లను గెలిచిన ఒక బలమైన జట్టు.. అకస్మాత్తుగా వరుసగా 6 మ్యాచ్‌ల్లో ఓడిపోతుందంటే ఎవరైనా నమ్ముతారా? కానీ దురదృష్టవశాత్తూ భారత క్రికెట్ జట్టు విషయంలో ఇదే నిజమైంది. ప్రస్తుత యూకే పర్యటనలో టీమిండియా ఇప్పటివరకు ఒక్క టీ20 మ్యాచ్ కూడా గెలవలేకపోయింది. ఈ దారుణమైన ప్రదర్శనతో తాత్కాలిక కెప్టెన్ శ్రేయస్ అయ్యర్ విమర్శకుల పాలిట ప్రధాన లక్ష్యంగా మారారు. తన అంతర్జాతీయ కప్టెన్సీ కెరీర్‌లో ఆడిన మొదటి 7 మ్యాచ్‌లలో ఒక్క విజయాన్ని కూడా నమోదు చేయలేకపోయిన తొలి భారత కెప్టెన్‌గా అయ్యర్ అపకీర్తిని మూటగట్టుకున్నారు.

ఓటమికి కేవలం ఆ 11 మంది మాత్రమే బాధ్యులా?

సాధారణంగా మైదానంలో ఆడే ప్లేయింగ్ ఎలెవన్‌ను సిద్ధం చేయడంలో కేవలం ఆటగాళ్లే కాకుండా కెప్టెన్, హెడ్ కోచ్ కీలక పాత్ర పోషిస్తారు. కాబట్టి ఈ అవమానకరమైన ప్రదర్శనకు మైదానంలోకి దిగిన 11 మంది ఆటగాళ్లను మాత్రమే నిందించడం ఏమాత్రం సమంజసం కాదు. ఎందుకంటే మ్యాచ్‌కు సంబంధించిన వ్యూహాలను, ప్రణాళికలను కోచింగ్ స్టాఫ్ మాత్రమే రూపొందిస్తుంది. ఈ నేపథ్యంలో హెడ్ కోచ్ గౌతమ్ గంభీర్ కూడా విమర్శల పాలయ్యారు. మరి ఈ వరుస పరాజయాలకు, జట్టు పతనానికి అసలైన గుణపాఠం ఎక్కడ తప్పిందో లోతుగా పరిశీలిస్తే కొన్ని కీలక విషయాలు బయటపడతాయి.

శ్రేయస్ అయ్యర్ చెత్త కెప్టెన్సీ

ఈ సిరీస్‌లో బ్యాటర్‌గా శ్రేయస్ అయ్యర్ ప్రదర్శన బాగానే ఉంది… ఆయన మొత్తం 218 పరుగులు చేశారు. కానీ కెప్టెన్‌గా బౌలర్లను ఉపయోగించుకోవడంలో మాత్రం అయ్యర్ దారుణంగా విఫలమయ్యారు. ముఖ్యంగా చివరి రెండు మ్యాచ్‌ల్లో ఇంగ్లండ్ బ్యాటర్లు భారీ భాగస్వామ్యాలు నెలకొల్పుతుంటే వాటిని బ్రేక్ చేయడంలో అయ్యర్ చేతులెత్తేశారు. నాల్గో టీ20లో జోస్ బట్లర్ త్వరగానే అవుట్ అయినా, ఫిలిప్ సాల్ట్, హ్యారీ బ్రూక్ వికెట్ పడకుండా మ్యాచ్‌ను గెలిపించారు. ఐదో టీ20లోనూ బట్లర్, బ్రూక్ అదే రీతిలో చెలరేగారు. ప్రత్యర్థి జట్టు భారీ భాగస్వామ్యాలు చేస్తున్నప్పుడు అయ్యర్ తన ప్రధాన బౌలర్లను రంగంలోకి దించలేదు. ఒకవేళ ఒక వైపు మెయిన్ బౌలర్‌ను పెట్టినా, రెండో వైపు పార్ట్-టైమ్ బౌలర్లను పెట్టి ఒత్తిడిని తగ్గించేశారు. దీనికి తోడు ఫీల్డింగ్ సెట్ చేయడంలో ఎక్కడా అటాకింగ్ వ్యూహం కనిపించలేదు.

గౌతమ్ గంభీర్ ప్రయోగాల బెడద

మరోవైపు హెడ్ కోచ్ గౌతమ్ గంభీర్ కూడా వ్యూహాత్మక తప్పిదాలు చేయడంలో వెనకడుగు వేయలేదు. 2028 టీ20 వరల్డ్ కప్ కోసం యువ జట్టును తయారు చేయాలనే ఆయన ఆలోచన మంచిదే అయినప్పటికీ, అమలు చేసిన విధానం మాత్రం బెడసికొట్టింది. ఆటగాళ్లకు మేనేజ్‌మెంట్ పూర్తి మద్దతు ఇస్తుందని ప్రెస్ కాన్ఫరెన్స్‌లో కోచింగ్ స్టాఫ్ చెప్పినప్పటికీ, ఫామ్‌లో ఉన్న సంజూ శాంసన్‌ను అకస్మాత్తుగా జట్టు నుంచి తొలగించారు. ఆయన స్థానంలో 15 ఏళ్ల వైభవ్ సూర్యవంశీని ఓపెనర్‌గా తెచ్చారు. వైభవ్ ఆడిన 3 ఇన్నింగ్స్‌ల్లో కేవలం 42 పరుగులు మాత్రమే చేయగలిగాడు. దాంతో అతనిపై కూడా వేటు వేశారు. అయితే అనుభవజ్ఞుడైన శాంసన్‌ను పక్కన పెట్టడమే కాకుండా, కేవలం మూడు మ్యాచ్‌ల వైఫల్యానికే 15 ఏళ్ల చిన్న వయసున్న వైభవ్‌ను జట్టు నుంచి తీసేయడం వల్ల అతనిపై ఎలాంటి ప్రతికూల మానసిక ఒత్తిడి పడుతుందనే నిజాన్ని మేనేజ్‌మెంట్ విస్మరించింది.

ప్లేయింగ్ ఎలెవన్‌లో నిరంతర మార్పులు

జట్టులో స్థిరత్వం లేకపోవడానికి వాషింగ్టన్ సుందర్‌ను పదే పదే లోపలికి, బయటికి మార్చడం కూడా ఒక ఉదాహరణ. మైదానంలో కెప్టెన్ ఏ బౌలర్‌ను ఎప్పుడు ఉపయోగించాలనే విషయంలో కోచింగ్ స్టాఫ్ వ్యూహం లోపించింది. ఆల్‌రౌండర్ శివం దూబేకు చివరి మూడు మ్యాచ్‌ల్లో కేవలం ఒక్కో ఓవర్ మాత్రమే బౌలింగ్ ఇచ్చారు. మరీ విచిత్రంగా ఐదో కీలక మ్యాచ్‌లో దూబేను పక్కనబెట్టి సూర్యాంశ్ షెడ్గేకు బౌలింగ్ అప్పగించారు. ఫలితంగా అతను భారీగా పరుగులు సమర్పించుకుని జట్టు ఓటమికి కారణమయ్యాడు. ఈ గందరగోళ నిర్ణయాలు, ప్రయోగాలే టీమిండియా కొంపముంచాయి.

మరిన్ని క్రీడా వార్తల కోసం ఇక్కడ క్లిక్ చేయండి..