Jemimah Rodrigues : స్పాన్సర్షిప్ లేకున్నా నాకు అదే కావాలి.. జెమీమా రోడ్రిగ్స్ బ్యాట్లో అంత స్పెషల్ ఏముంది ?
మహిళల వన్డే ప్రపంచ కప్ రెండో సెమీఫైనల్లో ఆస్ట్రేలియాపై అద్భుతమైన విజయాన్ని అందించిన భారత జట్టు బ్యాటర్ జెమీమా రోడ్రిగ్స్ ఆడిన చారిత్రక ఇన్నింగ్స్ గురించి ఇప్పుడు అందరూ మాట్లాడుకుంటున్నారు. ఈ మ్యాచ్లో జెమీమా 134 బంతుల్లో అజేయంగా 127 పరుగులు చేసి, టీమిండియాను 8 ఏళ్ల తర్వాత ఫైనల్కు చేర్చింది.
Updated on: Nov 01, 2025 | 1:15 PM
Jemimah Rodrigues : మహిళల వన్డే ప్రపంచ కప్ రెండో సెమీఫైనల్లో ఆస్ట్రేలియాపై అద్భుతమైన విజయాన్ని అందించిన భారత జట్టు బ్యాటర్ జెమీమా రోడ్రిగ్స్ ఆడిన చారిత్రక ఇన్నింగ్స్ గురించి ఇప్పుడు అందరూ మాట్లాడుకుంటున్నారు. ఈ మ్యాచ్లో జెమీమా 134 బంతుల్లో అజేయంగా 127 పరుగులు చేసి, టీమిండియాను 8 ఏళ్ల తర్వాత ఫైనల్కు చేర్చింది. అయితే, ఆమె బ్యాటింగ్ మాత్రమే కాదు, ఆస్ట్రేలియా బౌలర్లను చితకబాదడానికి ఆమె ఉపయోగించిన బ్యాట్ కూడా ఇప్పుడు చర్చనీయాంశంగా మారింది. జెమీమా కోసం ప్రత్యేకంగా తయారుచేసిన ఆ బ్యాట్ ప్రత్యేకత ఏమిటి? అది ఆమెకు ఎలా అందింది? అనే వివరాలను చూద్దాం.
నవీ ముంబైలో జరిగిన మహిళల వన్డే ప్రపంచ కప్ రెండో సెమీఫైనల్ మ్యాచ్లో ఆస్ట్రేలియా, భారత జట్టుకు 339 పరుగుల కష్టతరమైన లక్ష్యాన్ని నిర్దేశించింది. ఈ భారీ లక్ష్యాన్ని ఛేదించడంలో జెమీమా రోడ్రిగ్స్ కీలకపాత్ర పోషించింది. ఆమె 134 బంతుల్లో 14 ఫోర్ల సహాయంతో అజేయంగా 127 పరుగుల చారిత్రక ఇన్నింగ్స్ ఆడింది. ఆమె పోరాటం కారణంగానే భారత జట్టు 5 వికెట్ల తేడాతో విజయం సాధించి, 8 ఏళ్ల తర్వాత ప్రపంచకప్ ఫైనల్కు చేరింది.
జెమీమా రోడ్రిగ్స్ ఆడిన అద్భుతమైన ఇన్నింగ్స్ వెనుక ఆమె ఉపయోగించిన ఎస్జీ కంపెనీకి చెందిన బ్యాట్ కూడా ఒక కారణంగా నిలిచింది. ఈ బ్యాట్కు ఒక ప్రత్యేక కథ ఉంది. ఎస్జీ కంపెనీ సీఈఓ పారస్ ఆనంద్ ఒక ఇంటర్వ్యూలో మాట్లాడుతూ.. జెమీమాకు తమతో అప్పుడు స్పాన్సర్షిప్ కాంట్రాక్ట్ లేదని తెలిపారు. కానీ భారత జట్టులోని ఇతర ఆటగాళ్లు ఉపయోగిస్తున్న తమ ఎస్జీ బ్యాట్లను చూసిన జెమీమా ఆ ఆకారం, బ్యాలెన్స్ తన ఆటతీరుకు సరిపోతాయని భావించింది.
దాదాపు మూడేళ్ల క్రితం, జెమీమా ఏజెన్సీ తమను సంప్రదించి ఆమె కోసం తమ బ్యాట్లను కొనుగోలు చేసేదని ఆయన చెప్పారు. క్రికెట్లో స్పాన్సర్షిప్లు చాలా కీలకం. కానీ జెమీమా, తనకు కాంట్రాక్ట్ లేకపోయినా తాను ఇష్టపడిన ఎస్జీ బ్యాట్కే కట్టుబడి ఉండాలని నిర్ణయించుకుంది. జెమీమాకు ఇతర సంస్థల నుంచి స్పాన్సర్షిప్ ఆఫర్లు వచ్చినప్పుడు, ఆమె వాటిని అంగీకరించింది. కానీ బ్యాట్ స్పాన్సర్షిప్ మాత్రం ఎస్జీతోనే చేసుకోవాలని కోరుకుంది.
జెమీమా కోసం ఎస్జీ ప్రత్యేకంగా డక్విల్ షేప్లో బ్యాట్ను తయారుచేసింది. ఇది ఇతర బ్యాట్ల కంటే తేలికగా ఉంటుంది. ఈ తేలికపాటి బ్యాట్తోనే జెమీమా సులభంగా భారీ షాట్లు ఆడగలిగింది. ఈ ప్రత్యేక డిజైన్ సెమీఫైనల్లో ఆస్ట్రేలియా బౌలర్లను ఎదుర్కోవడానికి ఆమెకు ఎంతో సహాయపడింది.
మరిన్ని క్రీడా వార్తల కోసం ఇక్కడ క్లిక్ చేయండి..
