IND vs SA : టీమిండియా బౌలర్లకు ఇది అవమానకరం.. వన్డే క్రికెట్ చరిత్రలో తొలిసారిగా భారత్ పేరిట షాకింగ్ రికార్డు!

IND vs SA : సౌతాఫ్రికాతో జరిగిన మూడు మ్యాచ్‌ల వన్డే సిరీస్‌లోని మొదటి మ్యాచ్‌లో భారత్ 17 పరుగుల తేడాతో విజయం సాధించింది. ఈ గెలుపు ఒక పక్క సంతోషాన్ని ఇచ్చినా మరో పక్క టీమిండియా బౌలింగ్ విభాగం ఒక షాకింగ్ రికార్డును తన ఖాతాలో వేసుకుంది. వన్డే క్రికెట్ చరిత్రలో ఇదివరకు ఎప్పుడూ ఇలా జరగలేదు. ఈ మ్యాచ్‌లో సౌతాఫ్రికా ముందు భారత్ ఏకంగా 350 పరుగుల భారీ లక్ష్యాన్ని ఉంచింది. అయినప్పటికీ భారత జట్టు కేవలం స్వల్ప తేడాతోనే గెలవగలిగింది. ఈ పరిణామం టీమ్ మేనేజ్‌మెంట్‌కు పెద్ద టెన్షన్‌ను సృష్టించింది.

350 పరుగుల భారీ లక్ష్యాన్ని ఛేదించే క్రమంలో సౌతాఫ్రికాకు మొదట ఘోరమైన ఆరంభం లభించింది. అర్ష్‌దీప్ సింగ్, హర్షిత్ రాణా అద్భుతంగా బౌలింగ్ చేసి, కేవలం 11 పరుగులకే తొలి 3 వికెట్లు తీశారు. పవర్ ప్లేలో హర్షిత్ రాణా 2 వికెట్లు, అర్ష్‌దీప్ సింగ్ 1 వికెట్ తీశారు. అయితే, ఆ తర్వాత సౌతాఫ్రికా బ్యాట్స్‌మెన్ అద్భుతంగా పోరాడి 49.2 ఓవర్లలో ఏకంగా 332 పరుగులు చేశారు. అంటే వారు విజయానికి చాలా దగ్గరగా వచ్చారు. దీనితో టీమిండియా ఒక అసాధారణమైన రికార్డును నెలకొల్పింది.. అది 300+ పరుగుల లక్ష్యాన్ని కాపాడుతూ, తొలి 3 వికెట్లను 15 కంటే తక్కువ పరుగులకే తీసినప్పటికీ, ప్రత్యర్థి జట్టు 300 పరుగుల మార్కును దాటడం వన్డే చరిత్రలో ఇదే మొదటిసారి. ఒక దశలో సౌతాఫ్రికా 200 పరుగుల మార్కును కూడా చేరుకోదనిపించినా, భారత బౌలర్లు మంచి ఆరంభాన్ని సద్వినియోగం చేసుకోలేకపోయారు.

ఈ మ్యాచ్‌లో దాదాపు ప్రతి భారత బౌలర్ ఎకానమీ 6 కంటే ఎక్కువగా ఉంది. అర్ష్‌దీప్ సింగ్ 10 ఓవర్లలో 64 పరుగులు ఇచ్చి 2 వికెట్లు తీయగా, హర్షిత్ రాణా 3 వికెట్ల కోసం 65 పరుగులు సమర్పించుకున్నాడు. ప్రసిద్ధ్ కృష్ణ 7.2 ఓవర్లలో 48 పరుగులకు 1 వికెట్ తీశాడు. మరోవైపు, కుల్దీప్ యాదవ్ 10 ఓవర్లలో 68 పరుగులు ఇచ్చినా, 4 కీలక వికెట్లు తీయగలిగాడు. రవీంద్ర జడేజా, వాషింగ్టన్ సుందర్‌లకు ఒక్క వికెట్ కూడా దక్కలేదు. ఈ మ్యాచ్‌లో టార్గెట్ పెద్దది కాబట్టి భారత్ గెలవగలిగింది. కానీ చిన్న టార్గెట్‌ను కాపాడుకునే విషయంలో ఇలాంటి బౌలింగ్ ప్రదర్శన టీమిండియాకు చాలా భారంగా మారవచ్చు. ఇక్కడ జస్‌ప్రీత్ బుమ్రా, మహమ్మద్ సిరాజ్ వంటి సీనియర్ బౌలర్ల లేమి స్పష్టంగా కనిపించింది.

మరిన్ని క్రీడా వార్తల కోసం ఇక్కడ క్లిక్ చేయండి..