Shubman Gill: మరో 157 పరుగులు చేస్తే చాలు.. తొలి భారతీయుడిగా శుభ్‌మన్ గిల్ రికార్డు

Shubman Gill: భారత టెస్టు జట్టు కెప్టెన్ శుభ్‌మన్ గిల్ ముంగిట ఓ అద్భుతమైన చారిత్రక రికార్డు నిలిచింది. ఆగస్టు 15 నుంచి గాల్ అంతర్జాతీయ స్టేడియంలో శ్రీలంకతో ప్రారంభం కానున్న రెండు టెస్టుల సిరీస్‌లో గిల్ మరో 157 పరుగులు చేస్తే, వరల్డ్ టెస్ట్ ఛాంపియన్‌షిప్ (WTC) చరిత్రలోనే 3,000 పరుగులు పూర్తి చేసుకున్న తొలి భారత బ్యాటర్‌గా రికార్డులకెక్కుతాడు. ప్రస్తుతం మంచి ఫామ్‌లో ఉన్న గిల్, ఈ మైలురాయిని అందుకోవడం పెద్ద కష్టమేమీ కాదని విశ్లేషకులు భావిస్తున్నారు.

డబ్ల్యూటీసీలో అత్యధిక పరుగులు చేసిన ఆటగాడిగా గిల్

ప్రస్తుతం వరల్డ్ టెస్ట్ ఛాంపియన్‌షిప్‌లో భారతదేశం తరఫున అత్యధిక పరుగులు చేసిన ఆటగాళ్ల జాబితాలో శుభ్‌మన్ గిలే అగ్రస్థానంలో ఉన్నాడు. ఇప్పటివరకు 40 టెస్టులాడిన గిల్, 43కి పైగా సగటుతో 10 సెంచరీలు సహా 2,843 పరుగులు సాధించాడు. ఈ జాబితాలో రిషభ్ పంత్ 2,780 పరుగులతో రెండో స్థానంలో, మాజీ కెప్టెన్ రోహిత్ శర్మ 2,716 పరుగులతో మూడో స్థానంలో ఉన్నారు. ఇక ఓవరాల్‌గా ప్రపంచవ్యాప్తంగా ఇంగ్లాండ్ దిగ్గజం జో రూట్ 77 మ్యాచ్‌లలో 6,651 పరుగులతో WTCలో టాప్ స్కోరర్‌గా కొనసాగుతున్నాడు.

కెప్టెన్‌గా మరో మైలురాయిపై గిల్ కన్ను

ఈ సిరీస్‌లో గిల్ మరో ప్రత్యేకమైన రికార్డును కూడా తన ఖాతాలో వేసుకునే అవకాశం ఉంది. ఒకే వరల్డ్ టెస్ట్ ఛాంపియన్‌షిప్ సైకిల్‌లో (2025-27) 1,000 పరుగులు సాధించిన తొలి భారత కెప్టెన్‌గా నిలిచేందుకు అతడికి కేవలం 50 పరుగులు మాత్రమే కావాలి. ప్రస్తుతం ఈ సైకిల్‌లో 8 మ్యాచ్‌ల్లో కెప్టెన్‌గా వ్యవహరించిన గిల్ 950 పరుగులు చేశాడు. ఇప్పటివరకు ఒకే WTC సైకిల్‌లో భారత్ తరఫున 1000కి పైగా పరుగులు సాధించిన ఆటగాళ్లుగా రోహిత్ శర్మ, అజింక్య రహానే, యశస్వి జైస్వాల్ మాత్రమే ఉన్నారు. ఇప్పుడు కెప్టెన్‌గా ఈ ఘనత సాధించేందుకు గిల్ సిద్ధమయ్యాడు.

మరిన్ని క్రికెట్ వార్తల కోసం ఇక్కడ క్లిక్ చేయండి