Shivam Mavi : రంజీ ట్రోఫీలో సంచలనం.. 10 ఫోర్లు, 5 సిక్సులు..8వ స్థానంలో దిగి 87 బంతుల్లోనే తుఫాన్ సెంచరీ

Shivam Mavi : భారత దేశీయ క్రికెట్‌లో అత్యంత ప్రతిష్టాత్మకమైన రంజీ ట్రోఫీ 2025-26 నాలుగో రౌండ్‌లో అనేక అద్భుతమైన ప్రదర్శనలు నమోదవుతున్నాయి. కాన్పూర్, గ్రీన్ పార్క్ మైదానంలో జరుగుతున్న ఉత్తరప్రదేశ్, నాగాలాండ్ మధ్య మ్యాచ్‌లో ఓ ఆశ్చర్యకర సంఘటన చోటు చేసుకుంది. ఉత్తరప్రదేశ్ తరఫున 8వ స్థానంలో బ్యాటింగ్‌కు దిగిన ఒక పేస్ బౌలర్, తన ఫస్ట్-క్లాస్ కెరీర్‌లో ఇంతకు ముందెన్నడూ కనీసం 50 పరుగులు కూడా చేయని వ్యక్తి, ఈసారి ఏకంగా తుఫాన్ సెంచరీ నమోదు చేసి రికార్డు సృష్టించాడు. ఆ ఆటగాడు మరెవరో కాదు.. యువ పేసర్ శివమ్ మావి.

కాన్పూర్‌లోని గ్రీన్ పార్క్ మైదానంలో జరుగుతున్న ఉత్తరప్రదేశ్ vs నాగాలాండ్ మ్యాచ్‌లో, టాస్ గెలిచి ముందుగా బ్యాటింగ్ ఎంచుకున్న ఉత్తరప్రదేశ్ జట్టు తొలి ఇన్నింగ్స్‌ను 6 వికెట్ల నష్టానికి 535 పరుగుల భారీ స్కోరు వద్ద డిక్లేర్ చేసింది. ఈ ఇన్నింగ్స్‌లో 8వ స్థానంలో బ్యాటింగ్‌కు వచ్చిన పేస్ బౌలర్ శివమ్ మావి అద్భుత ప్రదర్శన చేశాడు. శివమ్ మావి కేవలం 87 బంతులు ఎదుర్కొని 116.09 స్ట్రైక్ రేట్‌తో 101 పరుగులు సాధించాడు. అతని ఇన్నింగ్స్‌లో 10 ఫోర్లు, 5 భారీ సిక్సర్లు ఉన్నాయి. ఈ దూకుడు ప్రదర్శనతో నాగాలాండ్ బౌలర్లు పూర్తిగా తేలిపోయారు.

శివమ్ మావికి ఇది కేవలం మెరుపు సెంచరీ మాత్రమే కాదు, అతని సుదీర్ఘ ఫస్ట్-క్లాస్ కెరీర్‌లో ఇదే తొలి సెంచరీ కావడం విశేషం. గత 7 సంవత్సరాలుగా ఫస్ట్-క్లాస్ క్రికెట్ ఆడుతున్న శివమ్ మావి, ఈ మ్యాచ్‌కు ముందు ఆడిన 21 ఫస్ట్-క్లాస్ మ్యాచ్‌లలో కనీసం 50 పరుగుల మార్కును కూడా చేరుకోలేకపోయాడు. అయితే, ఈసారి ఏకంగా 50 పరుగులు దాటడమే కాకుండా, సెంచరీ పూర్తి చేసి తన తొలి ఫస్ట్-క్లాస్ శతకాన్ని నమోదు చేసుకున్నాడు.

శివమ్ మావి సెంచరీకి తోడు, ఉత్తరప్రదేశ్ తొలి ఇన్నింగ్స్‌లో మరికొందరు బ్యాట్స్‌మెన్ల నుంచి కూడా అద్భుతమైన ప్రదర్శనలు వచ్చాయి. ఓపెనర్ మాధవ్ కౌశిక్ 374 బంతులు ఎదుర్కొని 185 పరుగులు చేసి నాటౌట్‌గా నిలిచాడు (11 ఫోర్లు). మరో కీలక బ్యాట్స్‌మెన్ ఆర్యన్ జుయాల్ 205 బంతుల్లో 140 పరుగులు చేశాడు (18 ఫోర్లు). ఓపెనర్ అభిషేక్ గోస్వామి కూడా 55 పరుగులు చేసి జట్టుకు మంచి ఆరంభాన్ని అందించాడు.

మరిన్ని క్రీడా వార్తల కోసం ఇక్కడ క్లిక్ చేయండి..