ఫుట్ వర్కే లేనోడిని ఓపెనర్గా దింపారు.. బ్యాడ్ లక్కోడితో ఈ విఫల ప్రయోగాలేంది గంభీర్ జీ..?
Sanju Samsons T20 Woes: Morkels Support vs. Gavaskars Footwork Critique: నాలుగు టీ20 మ్యాచ్లలో సంజూ శాంసన్ పేలవమైన ప్రదర్శనతో టీమిండియా ఓపెనింగ్ సమస్య పరిష్కారం కాలేదు. టీ20 ప్రపంచ కప్లో అతని స్థానంపై చర్చ జరుగుతున్న తరుణంలో, కోచ్ మోర్నీ మోర్కెల్ మద్దతుగా నిలిచారు. అయితే, సునీల్ గవాస్కర్ సరైన ఫుట్వర్క్ లేకపోవడాన్ని విమర్శిస్తూ, రాబోయే మ్యాచ్ సంజూకు కీలకం అని సూచించారు.
Updated on: Jan 29, 2026 | 8:52 PM
India Cricket: Samsons Opener Spot in Doubt for T20 World Cup: న్యూజిలాండ్తో జరిగిన టీ20 సిరీస్లో నాలుగు మ్యాచ్లు ముగిసినప్పటికీ, టీమిండియా ఓపెనింగ్ సమస్య అపరిష్కృతంగానే ఉంది. అభిషేక్ శర్మ ఒక ఓపెనింగ్ స్లాట్లో స్థిరపడగా, సంజూ శాంసన్ ప్రదర్శన ఆందోళన కలిగిస్తోంది. శుభమన్ గిల్ను పక్కన పెట్టి మరీ ఇచ్చిన అవకాశాలను సంజూ వినియోగించుకోలేకపోతున్నాడు. వరుసగా నాలుగు మ్యాచ్లలో విఫలమవడంతో, టీ20 జట్టులో అతని కొనసాగింపు, ముఖ్యంగా రాబోయే టీ20 ప్రపంచ కప్లో బెంచ్కు పరిమితం చేస్తారా లేదా అనే చర్చ ఊపందుకుంది.
సంజూ శాంసన్ నాలుగు మ్యాచ్లలో చెప్పుకోదగిన స్కోర్లు సాధించలేకపోయాడు. మొదటి మ్యాచ్లో 10 పరుగులు, రెండో మ్యాచ్లో 8 పరుగులు మాత్రమే చేసి, మూడో మ్యాచ్లో డకౌట్ అయ్యాడు. నాలుగో మ్యాచ్లో 24 పరుగుల వద్దే ఆగిపోయాడు. మొత్తం నాలుగు మ్యాచ్లలో సంజూ కేవలం 40 పరుగులు మాత్రమే చేశాడు. టీ20 క్రికెట్లో విజయాలకు పవర్ ప్లేలో వేగంగా పరుగులు సాధించడం కీలకం. అయితే, సంజూ నుంచి మెరుపులు కరువయ్యాయి. దీంతో అతడిపై ఒత్తిడి పెరుగుతోంది.
ఇప్పటివరకు టీమ్ మేనేజ్మెంట్ సంజూకు మద్దతుగానే నిలిచింది. న్యూజిలాండ్తో ఐదో టీ20 మ్యాచ్ రూపంలో సంజూకు మరో అవకాశం దక్కనుంది. ఈ మ్యాచ్ తిరువనంతపురంలో, అతడి సొంత గడ్డపై జరగనుంది. ఈ చివరి టీ20లో మెరుగ్గా రాణిస్తేనే టీ20 ప్రపంచ కప్లో ఓపెనర్గా కొనసాగే అవకాశం ఉందని, లేదంటే బెంచ్కు పరిమితం అవుతాడని మాజీ క్రికెటర్లు హెచ్చరిస్తున్నారు. టీ20 ప్రపంచ కప్ నాటికి తిలక్ వర్మ అందుబాటులోకి వస్తున్నందున, సంజూ శాంసన్ లేదా ఇషాన్ కిషన్లలో ఒకరికి మాత్రమే తుది జట్టులో స్థానం దక్కే అవకాశం ఉంది. ఇషాన్ కిషన్ స్టాండ్ బై వికెట్ కీపర్ బ్యాటర్గా వచ్చి, వచ్చిన అవకాశాలను సద్వినియోగం చేసుకున్నాడు. న్యూజిలాండ్తో రెండో టీ20లో మెరుపు బ్యాటింగ్ చేసి, వన్ డౌన్లోనే కాదు, అవకాశం దొరికితే ఓపెనర్గా కూడా ఆడేందుకు సిద్ధమని ఆటతోనే నిరూపించుకున్నాడు.
అయితే, టీమిండియా బౌలింగ్ కోచ్ మోర్నీ మోర్కెల్ సంజూ శాంసన్కు మద్దతుగా నిలిచారు. సంజూ పెద్ద ఇన్నింగ్స్కు మరో అడుగు దూరంలో ఉన్నాడని, త్వరలోనే ఫామ్ అందుకుంటాడని ఆయన పేర్కొన్నారు. వరుస వైఫల్యాలపై మాజీలు విమర్శలు గుప్పిస్తున్న తరుణంలో, దిగ్గజ క్రికెటర్ సునీల్ గవాస్కర్ సైతం ఇదే అంశంపై స్పందించారు. విశాఖలో సంజూ శాంసన్ ఔట్ అవ్వడానికి సరైన ఫుట్వర్క్ లేకపోవడమే కారణమని గవాస్కర్ అభిప్రాయపడ్డారు. ఆఫ్ సైడ్ షాట్ ఆడాలని భావించినా, పాదాల్లో కదలిక లేకపోవడంతో వికెట్ల ముందు నిలబడి రూమ్ చేసుకోలేకపోయాడని, బంతి అనూహ్యంగా టర్న్ కాలేదని వివరించారు. కదలకుండా షాట్ కొట్టాలని ప్రయత్నించి, బౌలర్కు మూడు స్టంపులు కనిపించేలా నిలబడటం వల్ల బంతి వికెట్లను తాకే ప్రమాదం ఉందని అన్నారు. ఈ సీజన్లో సంజూ ఇలా రెండుసార్లు పెవిలియన్ చేరాడు. బలహీనతల నుంచి బయటపడాలని నిపుణులు సైతం సూచిస్తున్నారు, లేదంటే తుది జట్టులో చోటు నిలబెట్టుకోవడం కష్టమని చెబుతున్నారు. తిరువనంతపురంలో సంజూ శాంసన్ టచ్లోకి వస్తాడా, సొంత గడ్డపై రాణించి జట్టులో స్థిరపడతాడా అనేది ఆసక్తికరంగా మారింది.
మరిన్ని క్రికెట్ వార్తల కోసం ఇక్కడ చూడండి..
