Rishabh Pant : కాలి ఫ్రాక్చర్ అయినప్పటికీ నొప్పితోనే పంత్ పోరాటం.. స్టేడియం మొత్తం స్టాండింగ్ ఒవేషన్

Rishabh Pant : ఇంగ్లాండ్‌తో మాంచెస్టర్‌లోని ఓల్డ్ ట్రాఫోర్డ్ వేదికగా జరుగుతున్న నాలుగో టెస్ట్ మ్యాచ్‌లో టీమిండియా కీపర్-బ్యాటర్ రిషబ్ పంత్ అద్భుతమైన సాహసం చేశారు. కాలి బొటనవేలికి ఫ్రాక్చర్ అయ్యి, వాచిపోయినప్పటికీ, నొప్పిని భరిస్తూనే రెండో రోజు బ్యాటింగ్‌కు దిగాడు. అతని ఈ తెగువకు మైదానంలో ఉన్న ప్రేక్షకులు, కామెంటేటర్లు స్టాండింగ్ ఒవేషన్ ఇచ్చి తమ గౌరవాన్ని చాటుకున్నారు. పంత్ క్రీజులోకి అడుగు పెడుతుండగా అభిమానులు భారీగా చప్పట్లు కొట్టడం, కేకలు వేయడం కనిపించింది.

27 ఏళ్ల పంత్ నిర్ణయాత్మక నాలుగో టెస్ట్ మొదటి రోజు క్రిస్ వోక్స్ వేసిన యార్కర్-లెంగ్త్ డెలివరీని రివర్స్ స్వీప్ చేసే ప్రయత్నంలో కాలి బొటనవేలికి బంతి తగిలింది. దీంతో తీవ్రమైన నొప్పికి గురై మైదానాన్ని వీడాడు. వెంటనే సాక్సులు, షూ తీయగా గాయం నుంచి రక్తం కారడం మొదలైంది. నొప్పి తీవ్రంగా ఉండటంతో అతన్ని గోల్ఫ్ కార్ట్ లో మైదానం నుండి తీసుకువెళ్లారు. ప్రాథమిక స్కానింగ్‌లో కాలి బొటనవేలికి మైనర్ కాంపౌండ్ ఫ్రాక్చర్ అయినట్లు తేలింది. దీంతో అతను కనీసం ఆరు వారాల పాటు విశ్రాంతి తీసుకోవాలని వైద్యులు సలహా ఇచ్చారు.

Rishabh Pant is hobbling out to a standing ovation from the Old Trafford crowd! 🤯 pic.twitter.com/I1vZ1MLR16

— Sky Sports Cricket (@SkyCricket) July 24, 2025

అయితే, బీసీసీఐ అప్పటికే ఒక ప్రకటనలో పంత్ ఈ టెస్ట్ మిగిలిన రోజుల్లో వికెట్ కీపింగ్ చేయడని, ఆ బాధ్యతలను ధ్రువ్ జురేల్ స్వీకరిస్తాడని తెలియజేసింది. గాయం తీవ్రంగా ఉన్నప్పటికీ, జట్టు అవసరాల దృష్ట్యా పంత్ రెండో రోజు బ్యాటింగ్‌కు వచ్చే అవకాశాన్ని బీసీసీఐ పరిశీలించింది. పంత్ నొప్పితో నడుస్తున్నప్పటికీ, జట్టు కోసం క్రీజులో నిలబడాలనే అతని పట్టుదల నిజంగా ప్రశంసనీయం. ఈ గాయం కారణంగా అతను సిరీస్‌కు దూరం అయ్యే ప్రమాదం ఉందని కూడా వార్తలు వచ్చాయి.

పంత్ గాయపడినప్పటికీ బ్యాటింగ్‌కు రావడాన్ని అందరూ అభినందించారు. అయితే, శార్దూల్ ఠాకూర్ కూడా తన 88 బంతుల్లో 41 పరుగుల కీలక ఇన్నింగ్స్‌తో అంతే ప్రశంసలు అందుకున్నాడు. రెండో రోజు ఆట ప్రారంభమైన తర్వాత జోఫ్రా ఆర్చర్ తన మొదటి ఓవర్‌లోనే రవీంద్ర జడేజాను 20 పరుగుల వద్ద ఔట్ చేయడంతో ఇంగ్లాండ్‌కు ఆత్మవిశ్వాసం పెరిగింది. కానీ, ఠాకూర్, వాషింగ్టన్ సుందర్ కలిసి ఇంగ్లాండ్ బౌలర్ల దాడిని సమర్థవంతంగా ఎదుర్కొన్నారు.

బెన్ స్టోక్స్ బౌలింగ్‌లో ఠాకూర్ 41 పరుగుల వద్ద బెన్ డకెట్ కు స్లిప్‌లో క్యాచ్ ఇచ్చి ఔటయ్యాడు. ఈ పార్టనర్ షిప్ విడిపోయిన తర్వాతే పంత్ క్రీజులోకి వచ్చాడు. వర్షం కారణంగా ముందుగానే షెడ్యూల్ చేసిన సమయం కంటే 10 నిమిషాల ముందే రెండో రోజు భోజన విరామం ప్రకటించారు. భోజన విరామం సమయానికి భారత్ 6 వికెట్లు కోల్పోయి 321 పరుగులు చేసింది. పంత్ హాఫ్ సెంచరీ పూర్తి చేసుకున్నాడు.

మరిన్ని క్రికెట్ వార్తల కోసం ఇక్కడ క్లిక్ చేయండి..