Champions Trophy 2025: మాలాగే మీరు కూడా నష్టపోతారు! BCCI కి శాపనార్థాలు పెడుతున్న PCB ప్రతినిధి

2025 ఐసిసి ఛాంపియన్స్ ట్రోఫీ పాకిస్తాన్‌లో నిర్వహించేందుకు నిర్ణయించినప్పటి నుంచీ, ఈ టోర్నమెంట్‌పై అనేక ప్రశ్నలు, వివాదాలు తలెత్తాయి. ముఖ్యంగా, భారతదేశం పాకిస్తాన్‌కు వెళ్లడానికి నిరాకరించడంతో వేదికపై తీవ్రమైన గందరగోళం నెలకొంది. గతంలో ఎన్నడూ లేని విధంగా, ఐసిసి ఈ సమస్యను పరిష్కరించేందుకు పలు మార్గాలను అన్వేషించింది. ఛాంపియన్స్ ట్రోఫీ ముగిసిన అనంతరం పాకిస్తాన్ తీవ్ర ఆర్థిక నష్టాన్ని చవిచూసిందన్న వార్తలు వినిపించినప్పటికీ, పాకిస్తాన్ క్రికెట్ బోర్డు (PCB) దీనిని ఖండించింది. పిసిబి ప్రకారం, ఈ టోర్నమెంట్ నిర్వహించడం ద్వారా వారు దాదాపు 10 మిలియన్ల అమెరికన్ డాలర్ల లాభాన్ని ఆర్జించారని వెల్లడించారు. భారత క్రికెట్ జట్టు ఛాంపియన్‌గా నిలవడం, టోర్నమెంట్ విజయవంతం కావడం తమకు గొప్ప గౌరవమని PCB ప్రతినిధి ఆమిర్ మీర్ తెలిపారు.

అయితే, భారత మీడియా ఈ టోర్నమెంట్ గురించి ప్రతికూల ప్రచారం చేస్తోందని, తప్పుడు వదంతులు వ్యాప్తి చేస్తున్నట్లు PCB ఆరోపించింది. ఈ సందర్భంలో, ఆమిర్ మీర్ భారత క్రికెట్ కంట్రోల్ బోర్డు (BCCI) ను హెచ్చరించారు. “భారతదేశం పాకిస్తాన్‌కు హాని చేయాలని చూస్తే, భారతదేశం కూడా ఆర్థికంగా నష్టపోవాల్సిందే. భారత్ vs పాకిస్తాన్ మ్యాచ్‌లు ఎప్పుడూ హాట్ కేకుల్లా అమ్ముడుపోతాయి. కానీ రాబోయే మూడేళ్లలో పాకిస్తాన్ భారత్‌లో క్రికెట్ ఆడే అవకాశం లేదు. దీంతో భారతదేశానికి మరింత ఆర్థిక నష్టం వాటిల్లనుంది” అని ఆయన వ్యాఖ్యానించారు.

ఐసిసి ఛాంపియన్స్ ట్రోఫీకి ముందు నెలల తరబడి ఆలస్యం జరిగినా, చివరకు అంతర్జాతీయ క్రికెట్ కౌన్సిల్ (ICC) అధికారికంగా వేదికలను ప్రకటించింది. “ఐసిసి పురుషుల ఛాంపియన్స్ ట్రోఫీ 2025 పాకిస్తాన్ అంతటా, తటస్థ వేదికల్లో జరుగుతుంది” అని ఐసిసి పేర్కొంది. దీని ప్రకారం, భారతదేశం తన మ్యాచ్‌లను దుబాయ్‌లో ఆడింది.

ఇంతే కాకుండా, 2027 వరకు ఐసిసి లేదా ఏసిసి టోర్నమెంట్‌లలో భారత్ vs పాకిస్తాన్ మ్యాచ్‌లు తటస్థ వేదికలలోనే జరుగుతాయని ఐసిసి స్పష్టం చేసింది. భారతదేశం, క్రికెట్‌లో ఒక పవర్ హౌస్‌గా పేరు తెచ్చుకున్నప్పటికీ, ఈ నిర్ణయం దేశ క్రికెట్ అభిమానులకు పెద్ద ఎదురుదెబ్బగా మారింది.

గత పదేళ్లుగా, భారత్, పాకిస్తాన్ జట్లు ద్వైపాక్షిక సిరీస్‌లు ఆడటం లేదు. వీరు ఐసిసి లేదా ఏసిసి టోర్నమెంట్‌లలో మాత్రమే తలపడుతున్నాయి. 2005-06లో చివరిసారి భారత జట్టు పాకిస్తాన్ పర్యటనకు వెళ్లగా, 2012-13లో పాకిస్తాన్ జట్టు భారత్‌లో పర్యటించింది. అప్పటి నుంచి కేవలం ప్రపంచకప్, ఏషియా కప్ వంటి అంతర్జాతీయ టోర్నమెంట్‌ల్లో మాత్రమే ఈ రెండు జట్లు పోటీ పడుతున్నాయి.

మరిన్ని క్రీడా వార్తల కోసం ఇక్కడ క్లిక్ చేయండి.