Asia Cup Rising Stars : ఆసియా కప్ ఫైనల్‌లో ఉక్కిరిబిక్కిరి..ఉత్కంఠ భరిత ఫైనల్‌లో బంగ్లాదేశ్‌కు షాక్ ఇచ్చి గెలిచిన పాకిస్తాన్ షాహీన్స్

Asia Cup Rising Stars : ఏసీసీ మెన్స్ ఆసియా కప్ రైజింగ్ స్టార్స్ 2025 టోర్నమెంట్ ఫైనల్ మ్యాచ్ పాకిస్తాన్ షాహీన్స్, బంగ్లాదేశ్ ఏ జట్ల మధ్య జరిగింది. దోహాలోని వెస్ట్ ఎండ్ పార్క్ ఇంటర్నేషనల్ స్టేడియంలో జరిగిన ఈ మ్యాచ్ సాధారణ మ్యాచ్‌లా ముగియలేదు. 20 ఓవర్లు పూర్తయ్యేసరికి రెండు జట్లు సరిగ్గా సమానమైన పరుగుల వద్ద నిలవడంతో, విజేతను నిర్ణయించడానికి సూపర్ ఓవర్‌ను ఆడించాల్సి వచ్చింది. ఈ తీవ్రమైన ఒత్తిడిని సమర్థవంతంగా ఎదుర్కొన్న పాకిస్తాన్ జట్టు, సూపర్ ఓవర్‌లో అద్భుతంగా రాణించి ఈ టోర్నమెంట్ టైటిల్‌ను మూడోసారి గెలుచుకుంది.

ఈ కీలకమైన ఫైనల్ మ్యాచ్‌లో టాస్ గెలిచిన బంగ్లాదేశ్ ముందుగా బౌలింగ్ ఎంచుకుంది. బంగ్లాదేశ్ బౌలర్ల ధాటికి పాకిస్తాన్ జట్టు బ్యాటింగ్ మొదట్లోనే కుప్పకూలింది. మ్యాచ్ తొలి బంతికే యాసిర్ ఖాన్ రనౌట్ అవ్వడం, ఆ వెంటనే మొహమ్మద్ ఫైక్ డకౌట్ అవ్వడంతో పాకిస్తాన్ 2 పరుగులకే 2 వికెట్లు కోల్పోయి కష్టాల్లో పడింది. ఒక దశలో 73 పరుగులకే సగం టీమ్‌ను కోల్పోయినప్పటికీ, సాద్ మసూద్ (38 పరుగులు), అరాఫత్ మిన్హాస్ (25 పరుగులు) కొంత పోరాటం చేశారు. అయినప్పటికీ మిగిలిన 8 మంది బ్యాటర్లలో కేవలం ముగ్గురు మాత్రమే రెండంకెల స్కోరు చేయగలిగారు. దీంతో పాకిస్తాన్ జట్టు నిర్ణీత 20 ఓవర్లు ముగియకముందే కేవలం 125 పరుగులకే ఆలౌట్ అయింది. బంగ్లాదేశ్ తరపున రిపన్ మొండల్ అత్యధికంగా 3 వికెట్లు తీయగా, రకిబుల్ హసన్ 2 వికెట్లు పడగొట్టాడు.

చూడటానికి 125 పరుగుల లక్ష్యం చాలా చిన్నదిగా కనిపించినా, పాకిస్తాన్ బౌలర్లు దానిని చాలా కష్టమైన టార్గెట్‌గా మార్చేశారు. ఛేజింగ్‌లో బంగ్లాదేశ్ బాగానే ప్రారంభించినప్పటికీ, ఆ తర్వాత వరుసగా వికెట్లు కోల్పోయింది. కేవలం 57 పరుగులకే 7 వికెట్లు పడిపోవడంతో పాకిస్తాన్ విజయం దాదాపు ఖాయమైనట్లు కనిపించింది. కానీ రకిబుల్ హసన్ (24 పరుగులు), ఎస్ఎం మెహెరోబ్ (19 పరుగులు) మళ్లీ జట్టుకు ఆశలు కల్పించారు. ఆ తర్వాత లోయర్ ఆర్డర్‌లో అబ్దుల్ గఫ్ఫార్ సక్లైన్ (నాటౌట్ 16), రిపన్ మొండల్ (నాటౌట్ 11) వీరోచితంగా పోరాడి, చివరికి మ్యాచ్‌ను టై అయ్యేలా చేశారు.

ఉత్కంఠ రేపిన సూపర్ ఓవర్‌లో బంగ్లాదేశ్ బ్యాట్స్‌మెన్ ఒత్తిడికి గురయ్యారు. మొదట బ్యాటింగ్ చేసిన బంగ్లాదేశ్ జట్టు 4 బంతుల్లోనే రెండు వికెట్లు కోల్పోయి కేవలం 7 పరుగుల లక్ష్యాన్ని మాత్రమే పాకిస్తాన్‌కు నిర్దేశించింది. దానికి సమాధానంగా పాకిస్తాన్ తరపున సదాకత్, సాద్ మసూద్ జోడి బ్యాటింగ్‌కు దిగింది. వారు ఎటువంటి తడబాటు లేకుండా కేవలం 4 బంతుల్లోనే ఈ చిన్న లక్ష్యాన్ని సునాయాసంగా ఛేదించారు. ఈ విజయంతో పాకిస్తాన్ షాహీన్స్ జట్టు మూడోసారి (గతంలో 2019, 2023లో) ఈ టోర్నమెంట్ టైటిల్‌ను గెలుచుకుని హ్యాట్రిక్ ట్రోఫీని తమ ఖాతాలో వేసుకుంది.

మరిన్ని క్రికెట్ వార్తల కోసం ఇక్కడ క్లిక్ చేయండి..