MS Dhoni : ధోనీ రూ.100కోట్ల పరువు నష్టం కేసు.. పదేళ్ల తర్వాత విచారణకు ఆదేశాలు

MS Dhoni : ఐపీఎల్ స్పాట్ ఫిక్సింగ్ కేసులో మాజీ కెప్టెన్ మహేంద్ర సింగ్ ధోనీపై తీవ్ర ఆరోపణలు చేసిన వారికి కష్టాలు మొదలయ్యాయి. గత పదేళ్లుగా పెండింగ్‌లో ఉన్న పరువు నష్టం కేసులో విచారణను తిరిగి ప్రారంభించాలని మద్రాస్ హైకోర్టు ఆదేశాలు జారీ చేసింది. ధోనీ ఈ కేసులో రూ. 100 కోట్ల నష్టపరిహారం కోరుతూ రెండు పెద్ద మీడియా సంస్థలు, ఒక ప్రముఖ జర్నలిస్ట్, రిటైర్డ్ ఐపీఎస్ అధికారి జి. సంపత్ కుమార్ పై కేసు వేశారు. వీరంతా 2013 ఐపీఎల్ బెట్టింగ్ స్కాంలో ధోనీ పేరును ప్రస్తావించారని ఆరోపించారు. సోమవారం, జస్టిస్ సి.వి. కార్తికేయన్ ఒక న్యాయవాది కమిషనర్‌ను నియమించారు. ధోనీ సెలబ్రిటీ కావడంతో కోర్టులో గందరగోళం ఏర్పడకుండా, చెన్నైలో అందరికీ సౌకర్యంగా ఉండే ఒక ప్రదేశంలో సాక్ష్యాలను నమోదు చేయనున్నారు.

ఐపీఎల్ స్పాట్ ఫిక్సింగ్ కేసు 2013లో జరిగింది. ఈ కేసులో శ్రీశాంత్, అజిత్ చండీలా, అంకిత్ చవాన్ వంటి ఆటగాళ్లు ఇరుక్కున్నారు. అప్పట్లో చెన్నై సూపర్ కింగ్స్ (CSK) యజమాని ఎన్. శ్రీనివాసన్ అల్లుడు, టీమ్ ప్రిన్సిపాల్ గురునాథ్ మయప్పన్ పేరు కూడా ఈ కేసులో బయటపడింది. దీని తర్వాత రాజస్థాన్ రాయల్స్, చెన్నై సూపర్ కింగ్స్‌పై రెండేళ్ల నిషేధం విధించారు.

ఎం.ఎస్. ధోనీ తాను 2014లో దాఖలు చేసిన పరువు నష్టం కేసును కొనసాగించాలని కోరుతూ ఇటీవల మద్రాస్ హైకోర్టులో అఫిడవిట్ దాఖలు చేశారు. విచారణ కోసం తాను అక్టోబర్ 20, 2025 నుంచి డిసెంబర్ 10, 2025 మధ్య అందుబాటులో ఉంటానని తెలిపారు. ధోనీ ఒక సెలబ్రిటీ కావడంతో కోర్టులో విచారణ జరిపితే ఇబ్బందులు తలెత్తవచ్చని భావించి, జస్టిస్ సి.వి. కార్తికేయన్ ఒక న్యాయవాది కమిషనర్‌ను నియమించారు. ఈ కమిషనర్ ధోనీ వాంగ్మూలాన్ని చెన్నైలో, అందరికీ సౌకర్యంగా ఉండే ప్రదేశంలో నమోదు చేస్తారు. ధోనీ ఈ విచారణకు పూర్తిగా సహకరిస్తానని అఫిడవిట్‌లో పేర్కొన్నారు.

ఈ కేసు విచారణ 10 సంవత్సరాలకు పైగా ఆలస్యం కావడానికి కారణం, కేసులోని ప్రతివాదులు వేర్వేరు ఉపశమనాల కోసం అనేక అప్లికేషన్లు దాఖలు చేయడమే. 2023 డిసెంబర్‌లో రిటైర్డ్ ఐపీఎస్ అధికారి జి. సంపత్ కుమార్‌పై కోర్టు ధిక్కరణ కేసులో జస్టిస్ ఎస్.ఎస్. సుందర్, సుందర్ మోహన్‌లతో కూడిన ధర్మాసనం అతనికి 15 రోజుల జైలు శిక్ష విధించింది. అయితే, 2024లో సుప్రీంకోర్టు ఈ శిక్షపై స్టే విధించింది.

మరిన్ని క్రికెట్ వార్తల కోసం ఇక్కడ క్లిక్ చేయండి..