ఎంత క్లాసీ ప్లేయరైనా నాకు వద్దు.. ఛోటా ప్యాకెట్ ముద్దు.. గౌతమ్ గంభీర్ మనసులోని మాటను లీక్ చేసిన కైఫ్..!

India ODI World Cup 2027: భారత క్రికెట్‌లో 2027 వన్డే ప్రపంచకప్ సమరానికి ఇప్పుడే ఆటాపాటా మొదలైంది. ముఖ్యంగా వికెట్ కీపర్ బ్యాటర్ స్థానం కోసం కేఎల్ రాహుల్, ఇషాన్ కిషన్ మధ్య తీవ్రమైన పోటీ నెలకొంది. ఈ నేపథ్యంలో టీమిండియా ప్రధాన కోచ్ గౌతమ్ గంభీర్ ఎవరి వైపు మొగ్గు చూపుతున్నారనే ఆసక్తికర విషయాన్ని మాజీ ఆటగాడు మహమ్మద్ కైఫ్ తాజాగా బయటపెట్టారు.

అఫ్గానిస్తాన్‌పై ఇషాన్ కిషన్ విధ్వంసం..

సుదీర్ఘ విరామం తర్వాత వన్డే జట్టులోకి పునరాగమనం చేసిన యువ లెఫ్ట్ హ్యాండ్ బ్యాటర్ ఇషాన్ కిషన్, తనకు వచ్చిన అవకాశాన్ని రెండు చేతులా ఒడిసిపట్టుకున్నాడు. అఫ్గానిస్తాన్‌తో జరిగిన వన్డే సిరీస్‌లో కిషన్ ఆడిన తీరు అభిమానులను, సెలెక్టర్లను ఎంతగానో ఆకట్టుకుంది. తొలి మ్యాచ్‌లోనే కేవలం 22 బంతుల్లో 34 పరుగులు చేసి తన ఉద్దేశాన్ని చాటిన ఈ యువ ఆటగాడు, రెండో వన్డేలో అసలైన విశ్వరూపాన్ని ప్రదర్శించాడు.

ఆ మ్యాచ్‌లో కేవలం 79 బంతులు ఎదుర్కొన్న కిషన్, 158.23 స్ట్రైక్ రేట్‌తో ఏకంగా 125 పరుగులు రాబట్టి సరికొత్త రికార్డులు సృష్టించాడు. ఇప్పటివరకు తన వన్డే కెరీర్‌లో 30 మ్యాచ్‌లు ఆడిన ఇషాన్ కిషన్ 45.50 సగటుతో, 107.69 స్ట్రైక్ రేట్‌తో 1,092 పరుగులు సాధించి తానేంటో నిరూపించుకున్నాడు. ఈ అద్భుత ప్రదర్శనే ఇప్పుడు అతడిని ప్రపంచకప్ రేసులో ముందంజలో నిలబెట్టింది.

గంభీర్ మనసులో ఏముంది? కైఫ్ సంచలన వ్యాఖ్యలు..

శ్రీలంక పర్యటనలో వ్యాఖ్యాతగా వ్యవహరిస్తున్న సమయంలో గౌతమ్ గంభీర్‌తో జరిగిన ఒక వ్యక్తిగత సంభాషణను మహమ్మద్ కైఫ్ తాజాగా పంచుకున్నారు. ఆ సమయంలో కేఎల్ రాహుల్, ఇషాన్ కిషన్ ఇద్దరిలో ఎవరు బెస్ట్ అనే చర్చ వచ్చినప్పుడు గంభీర్ ఏమాత్రం తడబడకుండా ఇషాన్ కిషన్ వైపే మొగ్గు చూపారని కైఫ్ వెల్లడించారు.

“గౌతమ్ గంభీర్‌కు ఇషాన్ కిషన్ ఆటశైలి అంటే చాలా ఇష్టం. కేఎల్ రాహుల్ ఐదు లేదా ఆరో స్థానాల్లో ఎన్నో మ్యాచ్‌లు గెలిపించిన అనుభవజ్ఞుడైన ఆటగాడే కావచ్చు, కానీ గంభీర్ మాత్రం ఇషాన్ కిషన్ వైపే నిలబడ్డారు” అని కైఫ్ పేర్కొన్నారు. గంభీర్ ఎల్లప్పుడూ దూకుడుగా ఆడే ఎడమచేతి వాటం బ్యాటర్లకు ప్రాధాన్యత ఇస్తారని, అందుకే కిషన్ అంటే ఆయనకు అంత ప్రత్యేకమైన అభిమానమని కైఫ్ స్పష్టం చేశారు.

2027 ప్రపంచకప్‌లో ఇషాన్ కిషన్ పాత్ర ఏంటి?

ఇషాన్ కిషన్ జట్టులో ఉండటం వల్ల మేనేజ్‌మెంట్‌కు ఎన్నో ప్రత్యామ్నాయాలు లభిస్తాయి. భవిష్యత్తులో రోహిత్ శర్మ అందుబాటులో లేకపోతే ఓపెనర్‌గా రాణించగల సత్తా కిషన్‌కు ఉంది. ఒకవేళ విరాట్ కోహ్లీ వన్డేలకు దూరం జరిగితే మూడో స్థానంలోనూ అతడిని పరీక్షించవచ్చు. వీటన్నింటికీ మించి, ఐదో స్థానంలో కేఎల్ రాహుల్ స్థానాన్ని భర్తీ చేస్తూ ఒక మెరుపు ముగింపునిచ్చే ఫినిషర్‌గా కూడా ఇషాన్‌ను ఉపయోగించుకోవచ్చు. అతనికున్న ఈ బహుముఖ నైపుణ్యమే 2027 ప్రపంచకప్ ప్రణాళికల్లో అతడిని కీలకమైన ఆటగాడిగా మారుస్తోంది.