టీ20 ప్రపంచకప్ రేసులో 8మంది ఓపెనర్లు.. ఐపీఎల్ 2026తో పెరిగిన తలనొప్పి..!
Team India Openers: వరుసగా రెండోసారి టీ20 ప్రపంచకప్ గెలిచిన భారత జట్టు, ఇప్పుడు తన కిరీటాన్ని కాపాడుకునే దిశగా అడుగులు వేస్తోంది. అయితే, రాబోయే రెండేళ్లలో జట్టులో సమూల మార్పులు వచ్చే అవకాశం కనిపిస్తోంది. ముఖ్యంగా ఐపీఎల్ 2026లో యువ ఆటగాళ్ల మెరుపులు చూస్తుంటే, టీమ్ ఇండియాలో ఓపెనింగ్ స్థానం కోసం ఏకంగా ఎనిమిది మంది పోటాపోటీగా నిలిచినట్లు స్పష్టమవుతోంది.
T20 World Cup 2028: ప్రస్తుతం భారత టీ20 జట్టులో అభిషేక్ శర్మ ప్రధాన ఓపెనర్గా కొనసాగుతున్నాడు. కేవలం 25 ఏళ్ల వయస్సు ఉన్న ఆయనకు వయస్సు కలిసివచ్చే అంశమే. అయితే, ఐపీఎల్ వేదికగా మరికొందరు కుర్రాళ్లు అద్భుత ప్రదర్శనతో ఆయన్నే సవాల్ చేస్తున్నారు. ప్రస్తుతం సంజూ శామ్సన్ స్థానానికి కూడా ముప్పు పొంచి ఉందనే వాదనలు వినిపిస్తున్నాయి. రాబోయే 2028 ప్రపంచకప్ నాటికి భారత ఓపెనింగ్ జోడీ పూర్తిగా మారిపోయే అవకాశాలు మెండుగా ఉన్నాయి.
వైభవ్ సూర్యవంశీ సంచలనం.. జైస్వాల్ సిద్ధం
కేవలం 15 ఏళ్ల వయస్సులోనే ఐపీఎల్లో ప్రకంపనలు సృష్టిస్తున్న వైభవ్ సూర్యవంశీ ఇప్పుడు హాట్ టాపిక్ అయ్యాడు. గత సీజన్ నుంచి ఈ ఏడాది వరకు ఆయన బ్యాటింగ్ తీరు చూస్తుంటే, త్వరలోనే భారత జట్టులోకి అరంగేట్రం చేయడం ఖాయంగా కనిపిస్తోంది. మరోవైపు రాజస్థాన్ రాయల్స్ స్టార్ యశస్వి జైస్వాల్ కూడా రేసులో ముందున్నాడు. 24 ఏళ్ల జైస్వాల్ ప్రస్తుతానికి బ్యాకప్ ఓపెనర్గా ఉన్నప్పటికీ, తనదైన రోజున ఎంతటి బౌలింగ్నైనా చీల్చి చెండాడగలడు.
చెన్నై ఆశాకిరణం ఆయుష్ మ్హాత్రే..
చెన్నై సూపర్ కింగ్స్ తరపున ఆడుతున్న 18 ఏళ్ల ఆయుష్ మ్హాత్రే తన బ్యాటింగ్ పవర్తో అందరి దృష్టిని ఆకర్షిస్తున్నాడు. అండర్-19 జట్టు నుంచి వచ్చిన ఈ కుర్రాడు కేవలం బ్యాటింగ్లోనే కాకుండా పార్ట్ టైమ్ స్పిన్నర్గా కూడా జట్టుకు ఉపయోగపడగలడు. రాబోయే రెండేళ్లలో ఆయన ఇతర సీనియర్ ఓపెనర్లకు గట్టి పోటీ ఇవ్వడం ఖాయం.
పంజాబ్ ధురంధరులు.. గుజరాత్ గిల్ జోడీ..
పంజాబ్ కింగ్స్ ఓపెనర్లు ప్రభ్సిమ్రాన్ సింగ్ (22), ప్రియాన్ష్ ఆర్య (24) గత సీజన్ తరహాలోనే ఈసారి కూడా మెరుపు ఆరంభాన్ని ఇచ్చారు. వీరికి గనుక భారత జట్టులో ఒక్క అవకాశం దక్కితే మిగిలిన వారికి కష్టాలు తప్పవు. వీరితో పాటు గుజరాత్ టైటాన్స్ కెప్టెన్ శుభ్మన్ గిల్ తన అనుభవంతో మళ్ళీ ఫామ్లోకి వచ్చే ప్రయత్నం చేస్తున్నారు. గత సీజన్ ఆరెంజ్ క్యాప్ విజేత సాయి సుదర్శన్ కూడా నిలకడైన ఆటతీరుతో సెలక్టర్ల తలుపు తడుతున్నారు. మొత్తానికి 2028 ప్రపంచకప్ నాటికి భారత ఓపెనింగ్ స్థానం ఎవరిని వరిస్తుందో చూడాలి.
మరిన్ని క్రీడా వార్తల కోసం ఇక్కడ క్లిక్ చేయండి..