ఐపీఎల్ 2026తో ఈ ముగ్గురు టీమిండియా ఆటగాళ్ల కెరీర్ క్లోజ్.. ఇకపై వేలంలో కొనే ధైర్యమే చేయరుగా..!

Indian cricketers retirement: క్రికెట్ పండుగ ఐపీఎల్ లో పోటీ ఎప్పుడూ తీవ్రంగానే ఉంటుంది. ఇక్కడ ప్రతిభ చూపిస్తేనే మనుగడ సాధ్యమవుతుంది. కానీ, గత కొంతకాలంగా పేలవమైన ఆటతీరు కనబరుస్తూ, తుది జట్టులో కనీస చోటు దక్కించుకోలేకపోతున్న ముగ్గురు భారత క్రికెటర్ల ఐపీఎల్ ప్రయాణం ఈ 2026 సీజన్ తర్వాత దాదాపు ముగిసినట్లేనని క్రీడా విశ్లేషకులు భావిస్తున్నారు. ఆ ముగ్గురు ఆటగాళ్లు ఎవరో ఇప్పుడు చూద్దాం..

1. మనీష్ పాండే: భారత మిడిలార్డర్ బ్యాటర్ మనీష్ పాండే ఐపీఎల్ కెరీర్ దాదాపు ముగింపు దశకు చేరుకుందనే చెప్పాలి. 2026 సీజన్ కోసం కోల్‌కతా నైట్ రైడర్స్ ఫ్రాంచైజీ ఇతడిని 75 లక్షల రూపాయలకు అట్టిపెట్టుకున్నప్పటికీ, తుది జట్టులో కనీసం ఆడే అవకాశం కల్పించడం లేదు. 36 ఏళ్ల ఈ వెటరన్ ఆటగాడు తన మునుపటి ఫామ్ కోల్పోవడమే ఇందుకు ప్రధాన కారణం అని స్పష్టమవుతోంది. వచ్చే సీజన్ నాటికి అతనికి 37 ఏళ్లు వస్తాయి. కుర్రాళ్ల రాకతో 2027 వేలంలో ఏ జట్టు కూడా ఇతని వైపు చూసే అవకాశం లేదు. ఇప్పటివరకు తన కెరీర్లో 174 మ్యాచ్‌లు ఆడిన పాండే, 29.42 సగటుతో 3942 పరుగులు మాత్రమే సాధించాడు. ఇందులో అతడి అత్యధిక స్కోరు 114 పరుగులు కాగా, 1 శతకం మరియు 22 అర్ధ శతకాలు ఉన్నాయి.

2. ఇషాంత్ శర్మ: భారత జట్టు వెటరన్ ఫాస్ట్ బౌలర్ ఇషాంత్ శర్మను ప్రస్తుత సీజన్ కోసం గుజరాత్ టైటాన్స్ ఫ్రాంచైజీ 75 లక్షల రూపాయలకు రిటైన్ చేసుకుంది. కానీ, ఈ సీజన్లో ఇప్పటివరకు ఒక్క మ్యాచ్‌లో కూడా అతనికి మైదానంలోకి దిగే అవకాశం రాలేదు. మహమ్మద్ సిరాజ్, ప్రసిద్ధ్ కృష్ణ, అశోక్ శర్మ వంటి పేసర్లతో గుజరాత్ బరిలోకి దిగుతుండటంతో, 37 ఏళ్ల ఇషాంత్ సేవలు ఆ జట్టుకు ఇక అవసరం లేదని తేలిపోయింది. వచ్చే ఏడాదికి 38 ఏళ్లు దాటే ఈ సీనియర్ బౌలర్‌ను కొనుగోలు చేసేందుకు రాబోయే వేలంలో ఎవరూ ఆసక్తి చూపించరు. తన సుదీర్ఘ కెరీర్‌లో 117 మ్యాచ్‌లు ఆడిన ఇషాంత్, కేవలం 96 వికెట్లు మాత్రమే పడగొట్టాడు.

3. అజింక్య రహానే: పేలవమైన ఆటతీరుతో ఇప్పటికే జాతీయ జట్టుకు దూరమైన క్లాసిక్ బ్యాటర్ అజింక్య రహానే, ఇప్పుడు తన ఐపీఎల్ ప్రయాణాన్ని కూడా కష్టాల్లో పడేసుకున్నాడు. కోల్‌కతా నైట్ రైడర్స్ జట్టు 1.5 కోట్ల రూపాయల భారీ ధరకు ఇతడిని అట్టిపెట్టుకుంది. 2025 సీజన్ నుండి కోల్‌కతా జట్టుకు నాయకత్వం వహిస్తున్నప్పటికీ, బ్యాటర్‌గా మాత్రం దారుణంగా విఫలమయ్యాడు. ఈ 2026 సీజన్‌లో ఇప్పటివరకు ఆరు మ్యాచ్‌లు ఆడిన రహానే.. వరుసగా 67, 8, 8*, 41, 28, 0 పరుగులతో 30.40 సగటుతో కేవలం 152 పరుగులు మాత్రమే చేశాడు. రాబోయే వేలంలో ఈ పేలవ ప్రదర్శన ఆధారంగా అతన్ని ఏ జట్టూ తీసుకునే సాహసం చేయదు. తన కెరీర్‌లో మొత్తంగా 204 మ్యాచ్‌లు ఆడిన రహానే 30.49 సగటుతో 5184 పరుగులు సాధించాడు. అతడి అత్యధిక స్కోరు 105 పరుగులు కాగా, 2 శతకాలు, 34 అర్ధ శతకాలు నమోదు చేశాడు.