4,4,6,6,4,4,6,1.. టెస్ట్ క్రికెట్‌ హిస్టరీలోనే అరుదైన ఓవర్.. అత్యధిక రన్స్‌తో టీమిండియా ప్లేయర్ కొత్త చరిత్ర

Most Runs in One Over in Test Cricket: టెస్ట్ క్రికెట్‌లో ఒకే ఓవర్‌లో అత్యధిక పరుగులు చేసిన రికార్డు ఎవరి పేరుతో నమోదైందో తెలుసా? పేరు తెలుసుకుంటే మాత్రం కచ్చితంగా షాక్ అవుతారు. ఈ రికార్డ్ ఓ టీమిండియా ప్లేయర్ కాదు కాదు, ఓ బౌలర్ పేరిట నమోదైంది. అవునండీ.. వృత్తిరీత్యా ఫాస్ట్ బౌలర్ అయిన ఈ ఆటగాడు మరో సీనియర్ ఫాస్ట్ బౌలర్ ఓవర్లో ఏకంగా 35 పరుగులు రాబట్టడం విశేషం. అందులో ఫోర్లు, సిక్సర్లతోపాటు కొన్ని అదనపు పరుగులు కూడా ఉన్నాయి. ఈ అద్భుతమైన ప్రదర్శన క్రికెట్ ప్రపంచంలో సంచలనం సృష్టించింది. టెస్ట్ క్రికెట్‌లో కొత్త రికార్డ్‌ను సృష్టించింది.

టెస్ట్ క్రికెట్‌లో ఒకే ఓవర్‌లో అత్యధిక పరుగులు చేసిన బుమ్రా..

టెస్ట్ క్రికెట్‌లో ఒకే ఓవర్‌లో అత్యధిక పరుగులు చేసిన రికార్డు భారత బౌలర్ జస్ప్రీత్ బుమ్రా పేరిట ఉంది. 2022లో ఎడ్జ్‌బాస్టన్‌లో ఇంగ్లాండ్‌తో జరిగిన మ్యాచ్‌లో, స్టువర్ట్ బ్రాడ్ బౌలింగ్‌లో బుమ్రా 35 పరుగులు చేసి ఈ రికార్డును సృష్టించాడు. ఈ రికార్డు తర్వాత, బుమ్రా కొత్త గుర్తింపు పొందాడు. అతని ప్రదర్శన టెస్ట్ క్రికెట్‌లో అత్యుత్తమ ఇన్నింగ్స్‌లలో ఒకటిగా నిలిచింది.

టెస్ట్ క్రికెట్‌లో ఒకే ఓవర్‌లో అత్యధిక పరుగులు చేసిన టాప్ 6 ప్లేయర్లు..

1. జస్‌ప్రీత్ బుమ్రా – 35 పరుగులు: 2 జులై 2022న ఎడ్జ్‌బాస్టన్‌లో ఇంగ్లాండ్‌తో జరిగిన మ్యాచ్‌లో జస్‌ప్రీత్ బుమ్రా ఒకే ఓవర్‌లో 35 పరుగులు చేసి టెస్ట్ క్రికెట్‌లో అత్యధిక పరుగులు చేసిన ఆటగాడిగా రికార్డు సృష్టించాడు. స్టువర్ట్ బ్రాడ్ బౌలింగ్‌లో బుమ్రా ఈ పరుగులు చేశాడు. ఇందులో 4 ఫోర్లు, 2 సిక్సర్లతోపాటు కొన్ని అదనపు పరుగులు ఉన్నాయి.

2. బ్రియాన్ లారా – 28 పరుగులు: దిగ్గజ బ్యాట్స్‌మెన్‌లలో ఒకరైన బ్రియాన్ లారా, 2003-04లో జోహన్నెస్‌బర్గ్‌లో దక్షిణాఫ్రికాతో జరిగిన టెస్ట్ మ్యాచ్‌లో ఒకే ఓవర్‌లో 28 పరుగులు చేశాడు. రాబిన్ పీటర్సన్ బౌలింగ్‌లో వరుసగా 4, 6, 6, 4, 4, 4 పరుగులు చేశాడు. ఈ రికార్డు దాదాపు రెండు దశాబ్దాల పాటు కొనసాగింది.

3. జార్జ్ బెయిలీ – 28 పరుగులు: 2013–14 యాషెస్ సిరీస్‌లో పెర్త్‌లో ఇంగ్లాండ్‌తో జరిగిన టెస్ట్ మ్యాచ్‌లో ఆస్ట్రేలియాకు చెందిన జార్జ్ బెయిలీ ఒకే ఓవర్‌లో 28 పరుగులు చేశాడు. జేమ్స్ ఆండర్సన్ బౌలింగ్‌లో వరుసగా 4, 6, 2, 4, 6, 6 పరుగులు చేశాడు.

4. కేశవ్ మహారాజ్ – 28 పరుగులు: 2019–20లో పోర్ట్ ఎలిజబెత్‌లో ఇంగ్లాండ్‌తో జరిగిన టెస్ట్ మ్యాచ్‌లో దక్షిణాఫ్రికాకు చెందిన కేశవ్ మహారాజ్ ఒక ఓవర్‌లో 28 పరుగులు చేశాడు. జో రూట్ బౌలింగ్‌లో ఈ పరుగులు చేసి అందరినీ ఆశ్చర్యపరిచాడు. మహారాజ్ తన బ్యాటింగ్‌తో తాను బౌలర్ మాత్రమే కాదు, మంచి బ్యాట్స్ మాన్ అని కూడా నిరూపించుకున్నాడు.

5. షాహిద్ అఫ్రిది – 27 పరుగులు: 2005-06లో భారత్‌తో జరిగిన టెస్ట్ మ్యాచ్‌లో పాకిస్తాన్ మాజీ ఆల్ రౌండర్ షాహిద్ అఫ్రిది ఒకే ఓవర్‌లో 27 పరుగులు చేశాడు. హర్భజన్ సింగ్ బౌలింగ్‌లో అఫ్రిది ఈ పరుగులు చేశాడు. అఫ్రిది దూకుడు బ్యాటింగ్ ఈ ఇన్నింగ్స్‌ను చిరస్మరణీయంగా మార్చింది.

6. హ్యారీ బ్రూక్ – 27 పరుగులు: 2022-23లో పాకిస్థాన్‌తో జరిగిన టెస్ట్ సిరీస్‌లో రావల్పిండిలో ఇంగ్లాండ్‌కు చెందిన హ్యారీ బ్రూక్ ఒక ఓవర్‌లో 27 పరుగులు చేశాడు. జాహిద్ మహమూద్ బౌలింగ్‌లో వరుసగా 6, 4, 4, 6, 4, 3 పరుగులు చేశారు. బ్రూక్ ఇన్నింగ్స్ అతన్ని టెస్ట్ క్రికెట్‌లో ఒక వర్ధమాన తారగా నిలబెట్టింది.