WCL 2025 : డబ్ల్యూసీఎల్ 2025లో భారత్ పాక్ మ్యాచ్ రద్దు.. అసలు తప్పు వాళ్లదేనట
క్రికెట్ అభిమానులు ఎప్పుడూ భారత్-పాక్ మ్యాచ్లను చూడాలని కోరుకుంటారు. నిర్వాహకుల వైపు నుంచి జరిగిన ఈ పొరపాటు, పాయింట్ల కోసం పాకిస్థాన్ పట్టుబట్టడం చూస్తుంటే, ఈ వివాదం ఇప్పట్లో తేలేలా లేదు. ఫైనల్లో అయినా ఈ రెండు జట్లు తలపడతాయో లేదో చూడాలి.
Updated on: Jul 22, 2025 | 1:16 PM
WCL 2025 : వరల్డ్ ఛాంపియన్షిప్ ఆఫ్ లెజెండ్స్ 2025 లో భారత్, పాకిస్థాన్ మధ్య జరగాల్సిన క్రికెట్ మ్యాచ్ రద్దు అవ్వడం పెద్ద చర్చకు దారితీసింది. దేశాల మధ్య ఉద్రిక్తతల వల్లే ఈ మ్యాచ్ ఆగిపోయిందని మొదట వార్తలు వచ్చాయి. ముఖ్యంగా ఏప్రిల్ 22న పహల్గామ్లో పర్యాటకులపై జరిగిన ఉగ్రదాడి తర్వాత, కొంతమంది భారత ఆటగాళ్లు మ్యాచ్ ఆడటానికి ఇష్టపడలేదని కూడా వినిపించింది. అయితే, ఇప్పుడు ఒక కొత్త విషయం బయటపడింది. మ్యాచ్ రద్దుకు భారత జట్టుకు ఎలాంటి తప్పు లేదని తేలింది. సోమవారం ఏఎన్ఐ సంస్థ ఇచ్చిన నివేదిక ప్రకారం.. డబ్ల్యూసీఎల్ నిర్వాహకులే ఇంగ్లాండ్ అండ్ వేల్స్ క్రికెట్ బోర్డుకి, తాము ఈ మ్యాచ్ను నిర్వహించలేకపోయామని చెప్పారట.
డబ్ల్యూసీఎల్ వర్గాలు చెప్పిన దాని ప్రకారం.. భారత ఆటగాళ్లు మ్యాచ్ నుంచి తప్పుకోవడం వల్లే ఈ మ్యాచ్ రద్దు అయిందని, అందుకే పాకిస్థాన్ ఛాంపియన్స్ జట్టు పాయింట్లను పంచుకోవడానికి అంగీకరించడం లేదని అంటున్నారు. అంటే, భారత్ వెనక్కి తగ్గింది కాబట్టి, తమకే పూర్తి పాయింట్లు ఇవ్వాలని పాకిస్థాన్ డిమాండ్ చేస్తోంది. ఈ మ్యాచ్ గురించి నిర్వాహకులు మాట్లాడుతూ.. “మేమే మ్యాచ్ను నిర్వహించలేకపోయామని ఈసీబీకి చెప్పాం. ఇండియా ఛాంపియన్స్ జట్టుది తప్పు లేదు. కానీ పాకిస్థాన్ ఛాంపియన్స్ మాత్రం, భారత్ తప్పుకుంది కాబట్టి, పాయింట్లు పంచుకోవడానికి ఒప్పుకోవడం లేదు” అని చెప్పారు.
పాకిస్థాన్ ఛాంపియన్స్ జట్టు యజమాని కామిల్ ఖాన్ ఒక ముఖ్యమైన విషయాన్ని ఇప్పటికే స్పష్టం చేశారు. ఒకవేళ భారత్, పాకిస్థాన్ రెండు జట్లు సెమీఫైనల్స్కు చేరినా, అక్కడ అవి ఒకదానితో ఒకటి ఆడకుండా చూస్తామని ఆయన చెప్పారు. మీడియాతో మాట్లాడుతూ, “రద్దైన మ్యాచ్ ఒక్కటి తప్ప, మిగతా అన్ని మ్యాచ్లు అనుకున్న ప్రకారమే జరుగుతున్నాయి. టోర్నమెంట్ షెడ్యూల్ ప్రకారం సాగుతోంది” అని కామిల్ ఖాన్ అన్నారు. “సెమీఫైనల్స్ విషయానికి వస్తే, రెండు జట్లు అర్హత సాధిస్తే, అవి ఒకదానితో ఒకటి తలపడకుండా మేము చూస్తాం” అని వివరించారు. అయితే, ఫైనల్లో ఒకవేళ రెండు జట్లు తలపడితే అప్పుడు చూద్దామని గతంలో కామిల్ ఖాన్ చెప్పాడు. గత డబ్ల్యూసీఎల్ టోర్నమెంట్లో ఇండియా ఛాంపియన్స్ ఫైనల్లో పాకిస్థాన్ను ఐదు వికెట్ల తేడాతో ఓడించి కప్ గెలుచుకుంది. భారత్ 157 పరుగుల లక్ష్యాన్ని సులభంగా ఛేదించి విజేతగా నిలిచింది.
మరిన్ని క్రికెట్ వార్తల కోసం ఇక్కడ క్లిక్ చేయండి..
