IND vs SL: క్లైమాక్స్‎కు చేరిన ఫస్ట్ టెస్ట్ మ్యాచ్.. శ్రీలంకను ఓడిస్తే భారత్ ఖాతాలోకి భారీ పాయింట్లు

IND vs SL: గాలే వేదికగా భారత్, శ్రీలంక మధ్య జరుగుతున్న తొలి టెస్టు మ్యాచ్  తుది ఘట్టానికి చేరుకుంది. ఐదో రోజు ఆటలో టీమిండియా గెలుపునకు 6 వికెట్లు, లంకకు 288 పరుగులు అవసరం. ఈ మ్యాచ్ ఫలితం 2027 వరల్డ్ టెస్ట్ ఛాంపియన్‌షిప్ పాయింట్ల పట్టికపై చూపనున్న ప్రభావంపై క్రికెట్ అభిమానుల్లో ఆసక్తి నెలకొంది. తొలి ఇన్నింగ్స్‌లో సాధించిన భారీ ఆధిక్యంతో రెండో ఇన్నింగ్స్‌లో 193 పరుగులకు ఆలౌటైన భారత్, శ్రీలంక ముందు 372 పరుగుల కొండంత లక్ష్యాన్ని ఉంచింది. నాలుగో రోజు ఆట ముగిసే సమయానికి లంక జట్టు 84 పరుగులకే 4 కీలక వికెట్లు కోల్పోయి తీవ్ర కష్టాల్లో పడింది. పిచ్ పూర్తిగా స్పిన్నర్లకు సహకరిస్తుండటంతో, టీమిండియా తొలి సెషన్‌లోనే ప్రత్యర్థిని ఆలౌట్ చేసి విజయాన్ని ముద్దాడేందుకు ప్రణాళికలు సిద్ధం చేసుకుంది. ఈ పోటీ ఫలితం రెండు జట్ల డబ్ల్యూటీసీ పాయింట్లపై గణనీయమైన ప్రభావం చూపనుంది.

ప్రస్తుత డబ్ల్యూటీసీ పాయింట్ల పట్టిక స్థితి

ప్రస్తుతం 2027 వరల్డ్ టెస్ట్ ఛాంపియన్‌షిప్ పాయింట్ల పట్టికలో ఆస్ట్రేలియా 77.78 శాతంతో అగ్రస్థానంలో కొనసాగుతోంది. సౌతాఫ్రికా 75 శాతంతో రెండో స్థానంలో, న్యూజిలాండ్ 72.22 శాతంతో మూడో స్థానంలో ఉన్నాయి. బంగ్లాదేశ్ 66.67 శాతంతో నాలుగో స్థానాన్ని ఆక్రమించింది. మన టీమిండియా 48.12 విజయ శాతంతో ఐదో స్థానంలో కొనసాగుతుండగా, శ్రీలంక జట్టు 41.67 శాతంతో ఆరో స్థానంలో నిలిచింది. అందుకే ఈ మొదటి టెస్టు గెలుపోటములు రెండు జట్లకూ ఎంతో కీలకంగా మారాయి.

భారత్ గెలిస్తే పాయింట్ల పట్టికలో ఏం జరుగుతుంది?

ఒకవేళ ఈ ఐదో రోజు ఆటలో భారత్ ఆరు వికెట్లు పడగొట్టి విజయం సాధిస్తే, పాయింట్ల పట్టికలో ఐదో స్థానంలోనే కొనసాగుతుంది. స్థానంలో మార్పు లేకపోయినా, భారత్ విజయం శాతం 48.12 నుంచి నేరుగా 53.55 శాతానికి భారీగా పెరుగుతుంది. ఇది భవిష్యత్తులో టాప్-4 వైపు దూసుకెళ్లేందుకు దోహదపడుతుంది. మరోవైపు, ఓటమి పాలైన శ్రీలంక ఆరో స్థానంలోనే ఉండిపోతుంది, కానీ దాని విజయం శాతం 41.67 నుంచి 33.33 శాతానికి దిగజారుతుంది.

ఒకవేళ భారత్ అనూహ్యంగా ఓడిపోతే?

క్రికెట్‌లో ఏ క్షణంలోనైనా అద్భుతాలు జరగొచ్చు. ఒకవేళ లంక మిగిలిన 288 పరుగులు చేసి సంచలన విజయం సాధిస్తే, పాయింట్ల పట్టిక తీవ్రంగా కుదుపునకు గురవుతుంది. శ్రీలంక తన విజయం శాతాన్ని 53.33 శాతానికి పెంచుకుని ఐదో స్థానానికి ఎగబాకుతుంది. భారత్ విజయం శాతం 43.33 శాతానికి పడిపోవడంతో ఆరో స్థానానికి దిగజారాల్సి వస్తుంది. కాబట్టి డబ్ల్యూటీసీ తుది పోరు రేసులో నిలవాలంటే భారత్‌కు ఈ విజయం ఎంతో అత్యవసరం.

మరిన్ని క్రికెట్‌ వార్తల కోసం ఇక్కడ క్లిక్‌ చేయండి..