అరంగేట్రంలో 4 వికెట్లతో సత్తా.. కట్‌చేస్తే.. 3 మ్యాచ్‌లతోనే కెరీర్ క్లోజ్.. చరిత్రలోనే అత్యంత బ్యాడ్‌లక్ ప్లేయర్..
England vs South Africa: 33 ఏళ్ల వయసులో అంతర్జాతీయ అరంగేట్రం చేసిన జో బెంజమిన్, 2021లో 60 ఏళ్ల వయసులో గుండెపోటుతో మరణించాడు.
క్రికెట్ చరిత్రలో అత్యంత దురదృష్టకర క్రికెటర్ల జాబితా తయారు చేస్తే.. అందులో బెంజమిన్ పేరు తప్పక ఉంటుంది. బెంజమిన్ 2 ఫిబ్రవరి 1961లో వెస్టిండీస్‌లో జన్మించాడు. అయితే, అతను ఇంగ్లాండ్ తరపున క్రికెట్ ఆడేవాడు. అంతర్జాతీయ కెరీర్ క్రికెట్ సుదీర్ఘ ఫార్మాట్‌తో ప్రారంభమైంది. అయితే, ఒక్క మ్యాచ్‌ కంటే ఎక్కువ ఆడలేకపోయాడు. ఆ తర్వాత, అతనికి వన్డే క్రికెట్‌లో అవకాశం లభించింది. ఆట రెండు మ్యాచ్‌లతో ముగిసింది.
33 ఏళ్ల వయసులో, జో బెంజమిన్ ఓవల్ మైదానంలో దక్షిణాఫ్రికాతో టెస్టుల్లో అరంగేట్రం చేశాడు. కౌంటీ క్రికెట్‌లో మెరుగైన ప్రదర్శన తర్వాత, అతను ఈ అవకాశాన్ని పొందాడు. అరంగేట్రం టెస్టు తొలి ఇన్నింగ్స్‌లోనే 42 పరుగులిచ్చి 4 వికెట్లు పడగొట్టాడు. ఈ ఇన్నింగ్స్‌లో ఇంగ్లండ్‌లో అత్యంత విజయవంతమైన బౌలర్‌గా నిలిచాడు. అయితే బ్యాటింగ్‌లో బెంజమిన్ ఖాతా తెరవలేకపోయాడు. ఆ తర్వాత రెండో ఇన్నింగ్స్‌లో వికెట్ పడలేదు. కానీ, తొలి ఇన్నింగ్స్‌లో అతడు వేసిన పునాది ఇంగ్లండ్ విజయానికి నాంది పడింది.
తొలి టెస్టు చివరిదిగా..
అయితే, ఆగస్ట్ 1994లో ఆడిన ఈ టెస్ట్ తర్వాత, బెంజమిన్ పేరు కేవలం చరిత్రగా మిగిలిపోయింది. అతను తదుపరి టెస్ట్ ఆడే అవకాశం అందుకోలేకపోయాడు. ఈ విధంగా మొదటి టెస్ట్ అతని కెరీర్‌లో కూడా చివరిదని నిరూపితమైంది.
2 మ్యాచ్‌ల తర్వాత వన్డే కెరీర్ క్లోజ్..
ఆగస్ట్‌లో తన టెస్ట్ అరంగేట్రం చేసిన తర్వాత, బెంజమిన్ డిసెంబర్ 1994లో ఆస్ట్రేలియాపై ఇంగ్లాండ్ తరపున ODI అరంగేట్రం చేశాడు. జనవరి 1995లో, అతను జింబాబ్వేపై తన రెండవ ODI ఆడాడు. ఈ రెండు వన్డేల్లో బెంజమిన్ కేవలం ఒక వికెట్ మాత్రమే తీసుకున్నాడు. అలాగే బ్యాట్‌తోనూ ఘోరంగా విఫలమయ్యాడు. దీంతో అతని అంతర్జాతీయ కెరీర్ ముగిసింది.
కెరీర్‌లో కేవలం 3 మ్యాచ్‌లు మాత్రమే..
ఈ విధంగా, జో బెంజమిన్ తన మొత్తం అంతర్జాతీయ కెరీర్‌లో కేవలం 3 మ్యాచ్‌లు మాత్రమే ఆడాడు. 33 ఏళ్ల వయసులో అంతర్జాతీయ అరంగేట్రం చేసిన ఈ క్రికెటర్ 2021లో 60 ఏళ్ల వయసులో గుండెపోటుతో మరణించాడు.
మరిన్ని క్రీడా వార్తల కోసం ఇక్కడ క్లిక్ చేయండి..
