CSK New Squad 2026 : సిఎస్కే పసుపు జెర్సీలో ఐదుగురు కొత్త స్టార్లు.. ఐపీఎల్ 2026 కోసం ధోనీ సేన భారీ స్కెచ్
CSK New Squad 2026 : ఐపీఎల్ 2026 సీజన్ ప్రారంభానికి ముందే చెన్నై సూపర్ కింగ్స్ (CSK) అభిమానుల్లో కొత్త ఉత్సాహం నెలకొంది. ఈసారి జట్టును మరింత బలోపేతం చేసేందుకు మేనేజ్మెంట్ భారీ కసరత్తు చేసింది. ముఖ్యంగా ఐదుగురు స్టార్ ఆటగాళ్లు మొదటిసారి పసుపు రంగు జెర్సీని ధరించి చెన్నై తరఫున బరిలోకి దిగబోతున్నారు.
CSK New Squad 2026 : ఐపీఎల్ 2026 సీజన్ ప్రారంభానికి ముందే చెన్నై సూపర్ కింగ్స్ (CSK) అభిమానుల్లో కొత్త ఉత్సాహం నెలకొంది. ఈసారి జట్టును మరింత బలోపేతం చేసేందుకు మేనేజ్మెంట్ భారీ కసరత్తు చేసింది. ముఖ్యంగా ఐదుగురు స్టార్ ఆటగాళ్లు మొదటిసారి పసుపు రంగు జెర్సీని ధరించి చెన్నై తరఫున బరిలోకి దిగబోతున్నారు. వీరి రాకతో అటు బ్యాటింగ్, ఇటు బౌలింగ్ విభాగాల్లో జట్టు సమతూకంగా కనిపిస్తోంది. ఐపీఎల్ చరిత్రలో అత్యంత విజయవంతమైన జట్లలో ఒకటిగా ఉన్న సిఎస్కే, ఈ కొత్త రక్తాన్ని కలుపుకొని మరోసారి టైటిల్ వేటను మొదలుపెట్టనుంది.
సంజూ శాంసన్
ఈ సీజన్లో చెన్నై సూపర్ కింగ్స్ చేసిన అత్యంత భారీ డీల్ ఏదైనా ఉందంటే అది సంజూ శాంసన్ను జట్టులోకి తీసుకోవడమే. సుమారు రూ. 18 కోట్ల భారీ ట్రేడ్ డీల్ ద్వారా శాంసన్ను రాజస్థాన్ రాయల్స్ నుంచి చెన్నై దక్కించుకుంది. సంజూ రాకతో చెన్నై బ్యాటింగ్ లైనప్ విపరీతంగా పెరిగింది. ఈ సీజన్లో అతను యువ ఆటగాడు ఆయుష్ మ్హాత్రేతో కలిసి ఇన్నింగ్స్ ప్రారంభించే అవకాశం ఉందని విశ్లేషకులు భావిస్తున్నారు. ధోనీ వారసుడిగా వికెట్ కీపింగ్లోనూ, బ్యాటింగ్లోనూ సంజూ కీలకం కానున్నాడు.
రాహుల్ చాహర్
భారత లెగ్ స్పిన్నర్ రాహుల్ చాహర్ను ఐపీఎల్ 2026 వేలంలో చెన్నై రూ. 5.20 కోట్లకు కొనుగోలు చేసింది. చెన్నైలోని చెపాక్ స్టేడియం సాధారణంగా స్పిన్నర్లకు స్వర్గధామం. ఇక్కడి పిచ్ పరిస్థితులను రాహుల్ చాహర్ అద్భుతంగా ఉపయోగించుకునే అవకాశం ఉంది. గతంలో ముంబై ఇండియన్స్ తరఫున కీలక పాత్ర పోషించిన రాహుల్, ఇప్పుడు ధోనీ మార్గదర్శకత్వంలో తన స్పిన్ మ్యాజిక్ చూపించేందుకు సిద్ధమవుతున్నాడు. మిడిల్ ఓవర్లలో వికెట్లు తీయడం ఇతని ప్రధాన బాధ్యత.
సర్ఫరాజ్ ఖాన్
మిడిల్ ఆర్డర్ బ్యాటర్ సర్ఫరాజ్ ఖాన్ను చెన్నై సూపర్ కింగ్స్ అతని బేస్ ప్రైస్ రూ. 75 లక్షలకే దక్కించుకుంది. గతంలో బెంగళూరు, ఢిల్లీ జట్ల తరఫున ఆడిన అనుభవం ఇతనికి ఉంది. దేశవాళీ క్రికెట్లో పరుగుల వరద పారించిన సర్ఫరాజ్, సిఎస్కే మిడిల్ ఆర్డర్లో వేగంగా పరుగులు సాధించగలడు. స్పిన్నర్లను సమర్థవంతంగా ఎదుర్కోవడంలో దిట్ట అయిన సర్ఫరాజ్, జట్టుకు అవసరమైన సమయంలో భారీ ఇన్నింగ్స్లు ఆడగలడనే నమ్మకంతో మేనేజ్మెంట్ ఉంది.
మాట్ హెన్రీ
న్యూజిలాండ్ స్టార్ ఫాస్ట్ బౌలర్ మాట్ హెన్రీ ఈ సీజన్లో చెన్నై పేస్ విభాగానికి నాయకత్వం వహించనున్నాడు. రూ. 2 కోట్లకు ఇతనిని చెన్నై కొనుగోలు చేసింది. కొత్త బంతితో స్వింగ్ చేయడంలో, పవర్ ప్లేలో వికెట్లు పడగొట్టడంలో హెన్రీ ఎంతో నైపుణ్యం కలవాడు. అంతర్జాతీయ క్రికెట్లో ఎంతో అనుభవం ఉన్న హెన్రీ, చెన్నై డెత్ ఓవర్ల బౌలింగ్లో కూడా కీలక పాత్ర పోషించనున్నాడు.
అకీల్ హొస్సేన్
వెస్టిండీస్ స్పిన్ ఆల్ రౌండర్ అకీల్ హొస్సేన్ కూడా ఈసారి సిఎస్కే గుూటిలోకి చేరాడు. ఇతను పవర్ ప్లేలో కూడా స్పిన్ బౌలింగ్ చేయగల నేర్పరి. పొదుపుగా బౌలింగ్ చేయడమే కాకుండా, బ్యాటింగ్లో కూడా మెరుపులు మెరిపించగలడు. ముఖ్యంగా చెన్నై వంటి స్లో వికెట్ల మీద అకీల్ హొస్సేన్ బౌలింగ్ ప్రత్యర్థులకు సవాలుగా మారనుంది.
తొలి మ్యాచ్ ఎప్పుడు?
ఐపీఎల్ 2026 సీజన్ మార్చి 28న ఆర్సిబి, సన్రైజర్స్ మధ్య జరిగే మ్యాచ్తో మొదలవుతుంది. ఇక చెన్నై సూపర్ కింగ్స్ తన తొలి మ్యాచ్ను మార్చి 30న రాజస్థాన్ రాయల్స్తో గువహటిలోని స్టేడియంలో ఆడనుంది. తన పాత టీమ్పై సంజూ శాంసన్ ఎలా ఆడతాడనేది ఇప్పుడు అందరిలోనూ ఆసక్తి రేకెత్తిస్తోంది.
మరిన్ని క్రీడా వార్తల కోసం ఇక్కడ క్లిక్ చేయండి..