రోహిత్ @ 73.. కోహ్లీ @ 100.. గౌహతీలో అరుదైన రికార్డులపై కన్నేసిన రోకో..!
భారత్-వెస్టిండీస్ రెండో వన్డేకు గువాహటి వేదిక కానుంది. ఈ మ్యాచ్లో రోహిత్ శర్మ, విరాట్ కోహ్లీ వ్యక్తిగత రికార్డులపై దృష్టి పెట్టారు. గువాహటి మైదానంలో ఇద్దరికీ ప్రత్యేకమైన గణాంకాలు ఉన్నాయి. రోహిత్ 12 వేల వన్డే పరుగుల మైలురాయికి చేరువగా ఉండగా, కోహ్లీకి ఇక్కడ ఆడిన ప్రతి వన్డేలో సెంచరీ చేసిన రికార్డు ఉంది.

భారత్ (India), వెస్టిండీస్ (West Indies) మధ్య రెండో వన్డేకు గువాహటి సిద్ధమైంది. బార్సాపరా స్టేడియంలో జరిగే ఈ మ్యాచ్లో భారత సీనియర్ బ్యాటర్లు రోహిత్ శర్మ (Rohit Sharma), విరాట్ కోహ్లీ (Virat Kohli)పై ప్రత్యేక దృష్టి ఉంది. వన్డేల్లో తమకంటూ ప్రత్యేక గుర్తింపు తెచ్చుకున్న ఈ ఇద్దరు బ్యాటర్లు గువాహటి మైదానంలో గతంలో చెప్పుకోదగ్గ ప్రదర్శనలు చేశారు. రోహిత్ ఇక్కడ రెండు ఇన్నింగ్స్లలో 235 పరుగులు చేశాడు. అతడి సగటు 235.00, స్ట్రైక్రేట్ 127.71. ఇందులో ఒక సెంచరీ, ఒక అర్ధ సెంచరీ ఉన్నాయి. వెస్టిండీస్పై 2018లో 117 బంతుల్లో 152 నాటౌట్ అతడి అత్యుత్తమ స్కోరు. ఇప్పుడు మరోసారి ఇదే వేదికపై అతడి బ్యాట్ ఎలా స్పందిస్తుందన్నది ఆసక్తికరంగా మారింది.
రోహిత్ మరో అరుదైన మైలురాయికి కూడా చేరువలో ఉన్నాడు. వన్డేల్లో 12 వేల పరుగులు పూర్తి చేసిన మూడో భారత బ్యాటర్గా నిలవడానికి అతడికి ఇంకా 73 పరుగులు కావాలి. ఇప్పటివరకు 289 వన్డేల్లో 281 ఇన్నింగ్స్లు ఆడిన రోహిత్ 11,927 పరుగులు చేశాడు. అతడి సగటు 48.88. ఖాతాలో 34 సెంచరీలు, 62 అర్ధ సెంచరీలు ఉన్నాయి. అత్యధిక స్కోరు 264.
ఈ ఏడాది రోహిత్ 10 వన్డేల్లో 411 పరుగులు చేశాడు. సగటు 41.10, స్ట్రైక్రేట్ 98.56గా ఉంది. ఒక సెంచరీ, ఒక అర్ధ సెంచరీ నమోదు చేశాడు. గత మ్యాచ్లో 35 బంతుల్లో 32 పరుగులు చేసిన అతడు ఈసారి ఆరంభాన్ని పెద్ద స్కోరుగా మలచాలని చూస్తున్నాడు.
కోహ్లీ గువాహటి రికార్డు మరింత ప్రత్యేకంగా ఉంది. అసోంలో మూడు వన్డేలు ఆడిన అతడు ప్రతిసారీ సెంచరీ సాధించాడు. నెహ్రూ స్టేడియం, బార్సాపరా స్టేడియం వేదికలపై వరుసగా మూడు శతకాలు నమోదు చేశాడు. 2010లో న్యూజిలాండ్పై 110 పరుగులు చేసిన కోహ్లీ, 2018లో వెస్టిండీస్పై 140 నాటౌట్తో మెరిశాడు. 2023లో శ్రీలంకపై 87 బంతుల్లో 113 పరుగులు చేశాడు.
అసోంలో మూడు వన్డేల్లో కోహ్లీ 358 పరుగులు సాధించాడు. సగటు 119.33, స్ట్రైక్రేట్ 120.13. ఈ ఏడాది ఏడు వన్డేల్లో 523 పరుగులు చేసిన అతడి సగటు 87.16. ఇందులో రెండు సెంచరీలు, మూడు అర్ధ సెంచరీలు ఉన్నాయి. దీంతో రెండో వన్డేలో ఈ ఇద్దరి బ్యాటింగ్పై ఆసక్తి పెరిగింది.
మరిన్ని క్రీడా వార్తల కోసం ఇక్కడ క్లిక్ చేయండి..
