ఏషియా కప్ రైజింగ్ స్టార్స్ 2026 షెడ్యూల్ విడుదల.. భారత్-పాకిస్థాన్ పోరు ఎప్పుడంటే..?

ఆసియా క్రికెట్ కౌన్సిల్ (ACC) మెన్స్ ఏషియా కప్ రైజింగ్ స్టార్స్ 2026 టోర్నీ షెడ్యూల్‌ను ప్రకటించింది. రెండో ఎడిషన్‌గా జరగనున్న ఈ టోర్నీకి ఖతార్ ఆతిథ్యం ఇవ్వనుంది. నవంబర్ 19 నుంచి నవంబర్ 29 వరకు దోహాలోని రెండు వేదికల్లో మ్యాచ్‌లు జరగనున్నాయి.

గత ఏడాది జరిగిన తొలి ఎడిషన్‌లో పాకిస్థాన్-ఎ జట్టు ఛాంపియన్‌గా నిలిచింది. దీంతో ఈసారి పాకిస్థాన్-ఎ (Pakistan A) డిఫెండింగ్ ఛాంపియన్‌గా బరిలోకి దిగనుంది.

ఈసారి టోర్నీని 50 ఓవర్ల ఫార్మాట్‌లో నిర్వహించనున్నారు. గత ఎడిషన్ టీ20 ఫార్మాట్‌లో జరిగింది. మొత్తం 8 జట్లను రెండు గ్రూపులుగా విభజించారు.

గ్రూప్-ఏ: శ్రీలంక-ఎ, బంగ్లాదేశ్-ఎ, ఆఫ్ఘనిస్థాన్-ఎ, హాంకాంగ్

గ్రూప్-బీ: భారత్-ఎ, పాకిస్థాన్-ఎ, నేపాల్, యూఏఈ

లీగ్ దశలో ప్రతి జట్టు తమ గ్రూప్‌లోని మిగిలిన జట్లతో ఒక్కో మ్యాచ్ ఆడుతుంది. మొత్తం 12 లీగ్ మ్యాచ్‌లు జరుగుతాయి. ప్రతి గ్రూప్‌లో టాప్-2లో నిలిచిన జట్లు సెమీఫైనల్‌కు అర్హత సాధిస్తాయి.

నవంబర్ 22న భారత్-పాకిస్థాన్ మ్యాచ్..

టోర్నీలో అత్యంత ఆసక్తికరంగా ఎదురుచూస్తున్న మ్యాచ్ భారత్-ఎ vs పాకిస్థాన్-ఎ (India A vs Pakistan A). నవంబర్ 22న మధ్యాహ్నం 3:30 గంటలకు ఈ మ్యాచ్ జరగనుంది. దోహాలోని వెస్ట్ ఎండ్ పార్క్ ఇంటర్నేషనల్ క్రికెట్ స్టేడియం ఈ మ్యాచ్‌కు వేదిక కానుంది.

భారత్-ఎ తమ తొలి మ్యాచ్‌లో నవంబర్ 20న నేపాల్‌తో తలపడుతుంది. నవంబర్ 24న యూఏఈతో లీగ్ దశలో చివరి మ్యాచ్ ఆడుతుంది.

పూర్తి షెడ్యూల్..

లీగ్ దశ నవంబర్ 24తో ముగియనుంది. తొలి సెమీఫైనల్ నవంబర్ 26న, రెండో సెమీఫైనల్ నవంబర్ 27న జరగనుంది. ఫైనల్ నవంబర్ 29న వెస్ట్ ఎండ్ పార్క్‌లో నిర్వహిస్తారు.

భారత్-పాక్ పోరుపైనే అందరి చూపు

గ్రూప్-బీలో భారత్-ఎ, పాకిస్థాన్-ఎ ఒకే గ్రూప్‌లో ఉండటంతో నవంబర్ 22 మ్యాచ్ టోర్నీకి ప్రత్యేక ఆకర్షణగా మారింది. డిఫెండింగ్ ఛాంపియన్ పాకిస్థాన్-ఎతో భారత్-ఎ పోటీ ఎలా ఉంటుందో ఆసక్తి నెలకొంది.