Champions Trophy: కేవలం డబ్బు సంపాదించడమేనా?.. ఐసిసిని ప్రశ్నించిన పాక్ మాజీ ఆల్ రౌండర్
మాజీ పాకిస్తాన్ కెప్టెన్ షాహిద్ అఫ్రిది, ఐసిసి, పిసిబి నిర్ణయాలపై తన అసంతృప్తిని వ్యక్తం చేశారు. పాకిస్తాన్, తన క్రికెట్ స్వతంత్రతను చాటుకోవాలని, సమాన హక్కులను పొందాలని సూచించారు. యువ ఆటగాళ్ల అభివృద్ధి లోపాలు, చైర్మన్‌ల మార్పుల వల్ల విధాన పరమైన అస్థిరత పాక్ క్రికెట్‌పై ప్రభావం చూపుతోందని విమర్శించారు.
మాజీ పాకిస్తాన్ కెప్టెన్ షాహిద్ అఫ్రిది, ఐసిసి టోర్నీలకు సంబంధించి పాకిస్తాన్ క్రికెట్ బోర్డు (పిసిబి)పై తన అభిప్రాయాలను పదునైన పదజాలంతో వెల్లడించారు. పాకిస్తాన్ జట్టును భారత్‌కు పంపించాల్సిన అవసరమే లేదని, భారత క్రికెట్ బోర్డు (బిసిసిఐ) పాకిస్తాన్‌లో మ్యాచ్‌లు ఆడేందుకు అంగీకరిస్తేనే తగిన నిర్ణయం తీసుకోవాలని ఆయన సూచించారు.
ఉర్దూ కాన్ఫరెన్స్‌లో మాట్లాడిన అఫ్రిది, పాకిస్తాన్ క్రికెట్ బోర్డు, భారత్‌పై తన దృఢమైన వైఖరిని చూపించాలని అయన అభిప్రాయాన్ని వ్యక్తం చేశారు. ప్రత్యేకించి, ఐసిసి ఈవెంట్లలో పాల్గొనే విషయంలో పాకిస్తాన్ స్వయంప్రతిపత్తిని చాటుకోవాలన్నది ఆయన ముక్యంగా ప్రస్తావించారు. పాకిస్తాన్ స్వతంత్రంగా నిర్ణయాలు తీసుకోగలిగే స్థాయిలో ఉండాలని, ఇతర దేశాల కంటే తమ గౌరవం ముఖ్యమని ఆయన అభిప్రాయపడ్డారు.
ఛాంపియన్స్ ట్రోఫీ జనవరి-మార్చి 2025 మధ్య పాకిస్తాన్‌లో నిర్వహించబడుతుంది. కానీ భారత్, పాకిస్తాన్‌లో తమ మ్యాచ్‌లు ఆడేందుకు అంగీకరించకుండా, టోర్నీని హైబ్రిడ్ మోడల్‌లో నిర్వహించాలని డిమాండ్ చేసింది. ఈ మోడల్ ప్రకారం, భారత్ తన మ్యాచ్‌లను దుబాయ్‌లో ఆడేందుకు సిద్ధమైంది. ఐసిసి కూడా ఒప్పుకుని, ఇలాంటి సిస్టమ్‌ను 2027 వరకు అనుసరించేందుకు “సూత్రప్రాయంగా” అంగీకరించింది.
అఫ్రిది ఈ నిర్ణయంపై తన అసంతృప్తిని వ్యక్తం చేస్తూ, పిసిబి తన వైఖరిని సరైన సమయంలో స్పష్టంగా ప్రకటించకపోవడం వల్ల, ఛాంపియన్స్ ట్రోఫీ షెడ్యూల్‌లో ఆలస్యమైందని విమర్శించారు. ఐసిసి తన బాధ్యతలను గుర్తించాల్సి ఉందని, ప్రతి దేశానికి సమానమైన అవకాశాలు కల్పించాలన్నది ఆయన అభిప్రాయం.
ఐసిసి పై తన నిరసనను తీవ్రంగా వ్యక్తం చేస్తూ, “ఐసిసి ప్రాథమిక లక్ష్యం అన్ని దేశాలకు సమాన హక్కులు కల్పించడమా, లేదా కేవలం డబ్బు సంపాదించడమేనా?” అని ప్రశ్నించారు.
అఫ్రిది, పాకిస్తాన్ క్రికెట్‌లో మేనేజ్‌మెంట్ సమస్యలను కూడా హైలైట్ చేశారు. కొత్త చైర్మన్ రావడం, విధానాలను పూర్తిగా మార్చడం పాకిస్తాన్ క్రికెట్‌లో ఒక ప్రధాన సమస్యగా పేర్కొన్నారు. అలాగే, షాహీన్ ఆఫ్రిదిని కెప్టెన్‌గా నియమించడం తరువాత తొలగించడం వంటి నిర్ణయాలను కూడా తప్పు పట్టారు. అటువంటి నిర్ణయాలు షాహీన్ లాంటి ఆటగాళ్ల కెరీర్‌పై ప్రభావం చూపుతాయని చెప్పారు.
పాకిస్తాన్‌లో ఆటగాళ్ల ప్రతిభను అభివృద్ధి చేయడంలో లోపాలు ఉన్నాయి అని అఫ్రిది నిరాశ వ్యక్తం చేశారు. యువ ఆటగాళ్లు, సైమ్ అయూబ్ లాంటి వారు అన్ని ఫార్మాట్లలో రాణించే సామర్థ్యం ఉన్నా, తగిన మద్దతు లేని కారణంగా అభివృద్ధి చెందలేకపోతున్నారని అన్నారు. “మా దగ్గర చాలా మంచి ప్రతిభ ఉంది, కానీ వారిని సరైన దిశగా అభివృద్ధి చేసే వ్యవస్థ లేకపోవడం వల్ల అది వృథా అవుతోంది” అని పేర్కొన్నారు.
షాహిద్ అఫ్రిది చేసిన ఈ వ్యాఖ్యలు, పాకిస్తాన్ క్రికెట్ పాలనపై, అలాగే ఐసిసి న్యాయసమ్మతతపై దృష్టి సారించేందుకు కొత్త చర్చలకు కారణమవుతున్నాయి.