2011 World Cup: ‘ఆ క్షణం నా జీవితాంతం గుర్తుండిపోతుంది’ లెజెండ్ కొడుకుతో యంగ్ టాలెంట్ భావోద్వేగం..

2011 క్రికెట్ ప్రపంచకప్ ఫైనల్ భారత క్రికెట్ చరిత్రలో ఒక సువర్ణ అధ్యాయంగా నిలిచిపోతుంది. వాంఖడే స్టేడియంలో శ్రీలంకతో జరిగిన ఫైనల్లో మహేంద్ర సింగ్ ధోనీ సారధ్యంలోని టీమ్ ఇండియా 28 సంవత్సరాల తర్వాత ట్రోఫీని సాధించి దేశాన్ని గర్వపడేలా చేసింది. గౌతమి గంభీర్, ధోనీ, యువరాజ్ సింగ్ లు మ్యాచ్‌ను మార్చేసే ప్రదర్శనలతో జట్టు విజయాన్ని ఖరారు చేశారు. ప్రత్యేకంగా, ధోనీ విజయం తథ్యం చేసిన సిక్స్ ఇంకా కోట్లాది మంది భారతీయుల హృదయాల్లో తళుక్కున మెరిసే క్షణంగా ఉంది. 28 సంవత్సరాల తరువాత భారత్ ట్రోఫీని ఎగరేసుకుపోయిన ఆ మధుర క్షణాలను ప్రముఖ యువ క్రికెటర్ పృథ్వీ షా గుర్తుచేసుకున్నాడు.

పృథ్వీ షా, అప్పుడు కేవలం 11 ఏళ్ల వయసులో, ముంబైలోని వాంఖడే స్టేడియంలో తన స్నేహితుడు అర్జున్ టెండూల్కర్ (సచిన్ టెండూల్కర్ కుమారుడు) తో కలిసి ఈ మ్యాచ్‌ను ప్రత్యక్షంగా వీక్షించాడు. ముంబై క్రికెట్ అసోసియేషన్ (MCA) 50వ వార్షికోత్సవ వేడుకల సందర్భంగా షా ఈ జ్ఞాపకాలను పంచుకున్నారు.

“ఆ క్షణం నా జీవితాంతం గుర్తుండిపోతుంది. నా స్నేహితుడు అర్జున్‌తో కలిసి లైవ్ గేమ్ చూడటం ఒక అపూర్వమైన అనుభవం. భారత్ ప్రపంచకప్‌ను ఎత్తినప్పుడు నా ఆనందానికి అవధులు లేవు,” అని పృథ్వీ షా చెప్పాడు.

అనేక అంచనాల మధ్య, షా 2018లో భారత్‌కు U19 ప్రపంచకప్ టైటిల్ అందించాడు. శుభ్‌మాన్ గిల్, అర్ష్‌దీప్ సింగ్ వంటి ప్రతిభావంతులతో కూడిన జట్టుకు నాయకత్వం వహించాడు.

ఇటీవల, షా తన కెరీర్‌లో కఠిన పరిస్థితులను ఎదుర్కొంటున్నాడు. దేశవాళీ క్రికెట్‌లో, ముఖ్యంగా ముంబై జట్టు నుండి అతను తరచుగా తొలగించబడుతున్నాడు. క్రమశిక్షణ రాహిత్యం అతని అభివృద్ధికి అడ్డంకిగా మారింది. IPL 2025 వేలంలో కూడా అమ్ముడుపోకపోవడం అతని పరిస్థితిని మరింత క్లిష్టం చేసింది. ఇదిలా ఉండగా, అర్జున్ టెండూల్కర్ దేశవాళీ క్రికెట్‌లో గోవా జట్టు తరఫున తన ప్రయాణాన్ని కొనసాగిస్తున్నాడు.

2011 ప్రపంచకప్ అనుభవం పృథ్వీ షా జీవితానికి స్ఫూర్తి ఇచ్చింది. అతని కెరీర్‌లో ఎదురవుతున్న సవాళ్లను అధిగమించి, మళ్లీ చక్కటి ప్రదర్శన కనబరుస్తాడని అభిమానులు ఆశిస్తున్నారు. అర్జున్ టెండూల్కర్ కూడా తన క్రికెట్ ప్రయాణంలో ముందుకెళ్లుతూ తండ్రి సచిన్ టెండూల్కర్ వారసత్వాన్ని కొనసాగిస్తున్నాడు.

వాంఖడే స్టేడియం 50 సంవత్సరాల వేడుకలు

ముంబైలోని వాంఖడే స్టేడియం భారత క్రికెట్ చరిత్రలో అత్యంత ప్రాధాన్యం కలిగిన మైదానాల్లో ఒకటి. 50 సంవత్సరాల పూర్తి చేసుకున్న సందర్భంగా, ముంబై క్రికెట్ అసోసియేషన్ (MCA) ప్రత్యేక వేడుకలను నిర్వహించింది. వాంఖడే స్టేడియం భారతదేశానికి ఎన్నో చారిత్రక విజయాలకు వేదికైంది.

2011 ప్రపంచకప్ ఫైనల్‌కి సాక్ష్యంగా నిలిచిన ఈ మైదానం క్రికెట్ అభిమానులకు ప్రియమైన ప్రదేశంగా ఉంది. ఈ సందర్భంగా క్రికెట్ దిగ్గజాలు, ముంబై క్రికెట్‌లో కీలక పాత్ర పోషించిన వ్యక్తులు, యువ క్రీడాకారులు పాల్గొని మైదానం చరిత్రను సంబరంగా గుర్తు చేసుకున్నారు.

వాంఖడే స్టేడియం ముందుకు మరిన్ని చారిత్రక క్షణాలకు వేదిక అవుతుందనే ఆశ ఉంది. 2025 ఛాంపియన్స్ ట్రోఫీ వంటి అంతర్జాతీయ టోర్నమెంట్లలో మళ్లీ భారత జట్టు విజయగాథలను ఈ మైదానం చూడగలుగుతుందని క్రికెట్ అభిమానులు ఆశిస్తున్నారు. వాంఖడే స్టేడియం చరిత్రను స్మరించుకుంటూ, కొత్త తరాలకు స్ఫూర్తిగా నిలుస్తోంది.

మరిన్ని క్రీడా వార్తల కోసం ఇక్కడ క్లిక్ చేయండి..