రష్యా, ఉత్తర కొరియాల నోటి వెంట అణ్వాయుధాల మాట! ఉత్తుత్తి బెదిరింపులా? నిజంగానే ప్రయోగిస్తాయా?

అమెరికా ఆధిపత్య ధోరణి చాలా దేశాలకు రుచించదు. ఇతర దేశాల అంతరంగిక విషయాలపై జోక్యం చేసుకోవడం, తాము ఆడిస్తున్నట్టుగా ఆడే ప్రభుత్వాలను ఏర్పాటు చేయడం వంటి చర్యలతో ఇప్పటికే కావాల్సినంత అప్రతిష్టను కూడగట్టుకుంది అమెరికా! పాకిస్తాన్‌ లో ఇమ్రాన్‌ఖాన్‌ను అధికారంలోంచి దింపేందుకు అమెరికా పాలకులు ప్రయత్నించిన వైనం విదితమే! అంతకు ముందు ఇరాక్‌, అప్ఘనిస్తాన్‌లలో అమెరికా ఏం చేసిందో అందరికీ తెలిసిన విషయమే! అందుకే తమ జోలికి వస్తే ఊరుకునేది లేదని హెచ్చరిస్తున్నాయి రష్యా, ఉత్తరకొరియా వంటి దేశాలు. ఉత్తర కొరియా అధినేత కిమ్‌ జాంగ్‌ ఉన్‌ అయితే అమెరికాకు ఓ స్ట్రాంగ్‌ వార్నింగ్‌ కూడా ఇచ్చారు. ఎవరైనా తమను రెచ్చగొడితే అణుదాడికి కూడా సిద్ధమేనన్నారు. తమపై పెత్తన చెలాయించాలని చూస్తే అణ్వాయుధ సంపత్తిని మరింతగా పెంచుకుని తీరతామన్నారు కిమ్‌. యుద్ధం అంటే తమకు కూడా ఇష్టం లేదని, యుద్ధాన్ని నివారించడానికే ప్రయత్నిస్తామని, కానీ తమ దేశ ప్రయోజనాలకు ఎవరైనా భంగం కలిగిస్తే మాత్రం ఊరుకునేది లేదని కాసింత గట్టిగానే చెప్పారాయన. అణ్వాయుధాలతో ఎగురుదాడి చేస్తామని హెచ్చరించారు. ఉత్తర కొరియా ఆర్మీ 90వ వ్యవస్థాపక దినోత్సవం సందర్భంగా సోమవారం రాత్రి ఆయుధాల పరేడ్‌ నిర్వహించారు. ఈ ఆయుధ పరేడ్‌లో ఉత్తర కొరియాకి చెందిన అతి పెద్ద ఖండాంతర క్షిపణి హ్వాసాంగ్‌–17 ప్రధాన ఆకర్షణగా నిలిచింది. అన్నట్టు ఈ క్షిపణి పరిధిలో అమెరికా అంతా ఉందట! అసలు అమెరికాను ఏ మాత్రం ఖాతరు చేయరు కిమ్‌.. అమెరికా అంటేనే అంతెత్తున లేస్తారు. ఇటు రష్యా అధినేత పుతిన్‌ కూడా అమెరికాపై ఆగ్రహోదగ్ధులవుతున్నారు. తమ దేశంపై పిచ్చి పిచ్చి ప్రేలాపనలు చేస్తూ సహించేది లేదన్నారు పుతిన్‌. అమెరికాతో పాటు కొన్ని దేశాలు చేస్తున్న పనులు మూడో ప్రపంచ యుద్ధానికి దారి తీసేట్టుగా ఉన్నాయని పుతిన్‌ అభిప్రాయపడ్డారు. అమెరికా అండ చూసుకుని ఉక్రయిన్‌ తమను రెచ్చగొడుతున్నదని అన్నారు. ప్రస్తుత పరిస్థితులలో అణు యుద్ధ ముప్పును కొట్టిపారేయలేమని రష్యా విదేశాంగ మంత్రి సెర్గీ లావ్రోవ్‌ చెప్పింది చూస్తే రష్యా ఎంతకైనా తెగించవచ్చని అర్థమవుతోంది. అలాగు అమెరికా రక్షణ మంత్రి లాయిడ్‌ ఆస్టిన్‌ను కూడా తిట్టిపోశారు. ఉక్రెయిన్‌పై దాడులను ఏ మాత్రమూ కొనసాగించలేనంతగా రష్యాను బలహీనపరచడమే తమ లక్ష్యమంటూ లాయిడ్‌ ఆస్టిన్‌ ఓ స్టేట్‌మెంట్‌ ఇచ్చారు. ఉక్రెయిన్‌ రక్షణావసరాలను తీర్చడం కోసం ఎలాంటి చర్యనైనా చేపడతామన్నారు. ఈ వ్యాఖ్యలే సెర్గీ లావ్రోవ్‌కు కోపం తెప్పించాయి.

రష్యా దేశాధినేత పుతిన్‌కు ఇవన్ని తెలియని విషయాలేమీ కాదు. అందుకే దూకుడు పెంచారు. మూడో ప్రపంచ యుద్ధం రాకూడదంటూ శాంతి వచనాలు పలుకుతున్న చాలా దేశాలు అందుకు భిన్నంగా వ్యవహరిస్తున్నాయన్నది పుతిన్‌ వాదన. తమ చేష్టల ద్వారా మూడో ప్రపంచయుద్ధానికి రంగం సిద్ధం చేస్తున్నాయని పుతిన్‌ భావన . ఉక్రెయిన్‌కు ఆయుధాలను సమకూర్చడం ద్వారా నాటో దేశాలు తమ సహనాన్ని పరీక్షిస్తున్నాయని రష్యా విదేశాంగ మంత్రి లావ్రోవ్‌ పేర్కొన్నారు. రష్యాతో ఒప్పందం చేసుకోవద్దంటూ ఉక్రెయిన్‌పై అమెరికా, ఇంగ్లండ్‌ ఒత్తిడి తెస్తున్నాయని, చర్చలు ఆగిపోవడానికి ఉక్రెయినే కారణమని ఆరోపిస్తున్నారు.లావ్రోవ్‌ చేసిన ఆరోపణలను అమెరికా, ఇంగ్లండ్‌ తప్పుపట్టాయి. లావ్రోవ్‌వి మతిలేని వ్యాఖ్యలని తిట్టిపోశాయి. అణు యుద్ధమంటూ జరిగితే అందులో విజేతలు, పరాజితులు ఉండరని, ఎవరూ మిగలరని పెంటగాన్ ప్రెస్‌ సెక్రటరీ జాన్‌ కిర్బీ వ్యాఖ్యానించారు. అసలు మూడో ప్రపంచ యుద్ధాన్ని ఎవరూ కోరుకోరని చైనా అంటోంది.

ఉక్రెయిన్‌పై రష్యా సైనిక చర్యను అమెరికా తనకు అనుకూలంగా మార్చుకునే ప్రయత్నం చేసింది. రష్యాపై ఆంక్షలు విధించింది. రష్యా వ్యతిరేక దేశాలతో మంతనాలు జరిగింది. ఉక్రెయిన్‌కు బాసటగా నిలిచింది. ఆ దేశానికి కావల్సినంత సైనిక సాయాన్ని అందిస్తామని చెప్పింది. అమెరికా చర్యలు సహజంగానే రష్యాకు కోపం తెప్పించాయి. అమెరికా, దాని మిత్రదేశాలు తమను ఏమి చేయలేవని రష్యా అంటోంది. ఉక్రెయిన్‌ రాజధాని కీవ్‌లోని విధాన నిర్ణయ కేంద్రాలపై దాడులు చేస్తామని హెచ్చరించింది. పాశ్చాత్య దేశాల సలహాదారులు తమను నిలువరించలేరని అంటోంది. అమెరికా, బ్రిటన్‌ మాటలు విని ఉక్రెయిన్‌ పిచ్చి వేషాలు వేస్తే కీవ్‌లో ప్రభుత్వ భవనాలపై ప్రతీకారం తీర్చుకుంటామని హెచ్చరించింది. హెచ్చరించడమే కాదు పొపాస్నా, లిసిచాన్స్‌క్, గిర్‌స్కే, ఖరీ్కవ్, జపోరిజియాలపై బాంబుల వర్షం కురిపించింది. ఉక్రెయిన్‌కు అమెరికా సపోర్ట్‌ అపకపోతే నిజంగానే రష్యా అణుదాడులకు పాల్పడుతుందా? టాక్టికల్‌ అణ్వాయుధాలను అంటే తక్కువ ప్రాంతంలో విధ్వంసం సృష్టించే అణుబాంబులను ప్రయోగిస్తుందా? అంటే అవుననే అంటున్నారు విశ్లేషకులు. పుతిన్‌ దూకుడు, మొండితనం చూస్తుంటే అణ్వాయుధ ప్రయోగాలకు వెనుకాడకపోవచ్చని చెబుతున్నారు. కొందరు మాత్రం పుతిన్‌ బెదింపులే తప్ప అంత సాహసం చేయబోరని అంటున్నారు. మొత్తంగా అమెరికాపై కోపంగా ఉన్న రష్యా, నార్త్‌ కొరియాలు అన్నంత పని చేస్తాయా? లేక ఉత్తుత్తి బెదిరింపులేనా అన్నది భవిష్యత్తు తేలుస్తుంది!