Viral: వారాల తరబడి మిస్టరీ చెట్టు నుంచి వర్షం.. ఆశ్యర్యపోతున్న జనం.. రంగంలోకి అధికారులు

Trending: మాములుగా అయితే మేఘాలు వర్షిస్తాయి.  ఆకాశం నుంచి చినుకులు పడతాయి. కానీ కర్ణాటకలో మాత్రం ఓ మిస్టరీ వాన కురస్తోంది. ఓ చెట్టు నుంచి నిర్విరామంగా చినుకుల జల్లు పడుతుంది. ఈ ఘటన స్థానికులతో పాటు అధికారులను విస్మయానికి గురి చేస్తుంది. ఎండాకాలం.. పట్టపగలు.. మిట్ట మధ్యాహ్నం కూడా ఈ వర్షపు జల్లు ఆగడం లేదు. అసలు ఆ వర్షం ఎక్కడ నుంచి పడుతుందో ఎవరికీ అంతుచిక్కడం లేదు.  కొమ్మల నుంచి 10 చదరపు అడుగుల విస్తీర్ణంలో నీరు పడుతోంది. గంటలు, రోజులు కాదు.. గత కొన్ని వారాలుగా ఈ వర్షపు జల్లు ఆగడం లేదు. కర్ణాటక(Karnataka )లోని కొడగు(Kodagu) సమీపంలోని హెరవనాడు గ్రామంలో ఈ విచిత్ర చెట్టు ఉంది. ఈ చెట్టు శివుడికి ఇష్టమైన బిల్వ పత్ర వృక్షమని అక్కడి స్థానికులు చెప్తున్నారు. అందుకే ఇలా జరుగుతుందని అంటున్నారు. చెట్టుకు 500 మీటర్ల దూరంలోని దేవరకాడులో భద్రకాళిదేవి ఆలయం ఉంది. ఆ అమ్మవారి మహిమ వల్లే.. ఇలా జరుగుతుందని  మరికొందరు అంటున్నారు.  ఆ నోటా, ఈ నోటా పాకడంతో.. ఈ వర్షపు జల్లు కురిపిస్తున్న చెట్టును చూసేందుకు పెద్ద ఎత్తున జనం అక్కడికి చేరుకుంటున్నారు. కాగా  కొన్ని రకాలైన చెట్లకు ఇలాంటి లక్షణాలు ఉంటాయని అటవీశాఖ అధికారులు చెబుతున్నారు. వారు ఈ చెట్టు నుంచి పడే నీటిని పరీక్షించేందుకు ల్యాబ్‌కు పంపారు. కాగా విపత్తు నిర్వహణ అథారిటీ, పర్యావరణ అధికారులు.. ఈ చెట్టును సందర్శించేందుకు విచ్చేయనున్నారు.

మరిన్ని జాతీయ వార్తల కోసం ఈ లింక్ క్లిక్ చేయండి