Nipah Virus: కోవిడ్-19 కంటే నిఫా వైరస్ ప్రమాదకరం.. ఐసీఎంఆర్ హెచ్చరిక
ఇప్పటి వరకు 6 మందికి ప్రాణాంతక నిఫా వైరస్ సోకింది. ఇందులో ఇద్దరు మృతి చెందారు. ఈ నేపథ్యంలో జిల్లాలో అన్ని విద్యా సంస్థలు, పార్కులు, బీచ్‌లను మూసివేయాలని ప్రభుత్వం ఆదేశించింది. అదే సమయంలో మతపరమైన సంస్థలలో ప్రార్థన సమావేశాలు, ఇతర బహిరంగ కార్యక్రమాలను కూడా నిషేధించారు. ఇదిలా ఉండగా ..
Updated on: Sep 15, 2023 | 9:26 PM
కోవిడ్ -19 మహమ్మారితో పోలిస్తే నిఫా వైరస్ సోకిన వారిలో మరణాల రేటు ఎక్కువగా ఉందని ఇండియన్ కౌన్సిల్ ఆఫ్ మెడికల్ రీసెర్చ్ (ICMR) డైరెక్టర్ జనరల్ రాజీవ్ బహ్ల్ శుక్రవారం తెలిపారు. విలేకరుల సమావేశంలో బహ్ల్ మాట్లాడుతూ.. కోవిడ్ మరణాల రేటు రెండు నుండి మూడు శాతం ఉండగా, నిఫా మరణాల రేటు 40 నుండి 70 శాతం వరకు ఉంది. కేరళ రాష్ట్రంలో ప్రాణాంతక వైరస్ వ్యాప్తి చెందకుండా నిరోధించడానికి తాము అన్ని ప్రయత్నాలు చేస్తున్నామని ఐసిఎంఆర్ డిజి చెప్పారు. కేసులు ఎందుకు వేగంగా వ్యాప్తి చెందుతున్నాయో అధ్యయనం జరుగుతుందన్నారు. 2018లో గబ్బిలాల వ్యాప్తి కారణంగా ఈ వైరస్ కేరళలో వ్యాపించిందని తెలిసింది. ఇన్ఫెక్షన్ గబ్బిలాల నుండి మనుషులకు ఎలా సంక్రమిస్తుందో ఖచ్చితంగా తెలియలేదన్నారు. సాధారణంగా వర్షాకాలంలో ఈ వైరస్ కేసులు పెరుగుతాయని చెప్పారు. వైరస్ వ్యాప్తిపై లోతైన పరిశోధనలు జరుగుతున్నాయని చెప్పారు.
ICMR DG ప్రకారం.. నిఫా వైరస్ సంక్రమణ చికిత్స కోసం భారతదేశం ఆస్ట్రేలియా నుండి మరో 20 మోనోక్లోనల్ యాంటీబాడీలను కొనుగోలు చేస్తుంది. 2018లో ఆస్ట్రేలియా నుండి మోనోక్లోనల్ యాంటీబాడీస్ కొన్ని డోస్‌లను తీసుకున్నట్టుగా చెప్పారు. ప్రస్తుతం డోసులు కేవలం 10 మంది రోగులకు మాత్రమే అందుబాటులో ఉన్నాయని చెప్పారు. మరో 20 డోసులు సేకరిస్తున్నారు. ఈ వైరస్ సోకిన వారికి ప్రాథమిక దశలో మాత్రమే ఈ ఔషధం ఇవ్వనున్నట్టుగా చెప్పారు. ఇది అత్యవసర ఔషధంగా మాత్రమే ఇవ్వబడుతుందని చెప్పారు. యాంటీబాడీని ప్రపంచవ్యాప్తంగా 14 మంది రోగులకు విజయవంతంగా నిర్వహించగా భారతదేశంలో ఇప్పటివరకు ఎవరికీ మోతాదు ఇవ్వలేదని చెప్పారు.
#WATCH | Nipah virus | DG ICMR Dr. Rajiv Bahl says, “…If COVID had a mortality of 2-3%, here the mortality is 40-70%. So, the mortality is extremely high…” pic.twitter.com/O60erWop9v
— ANI (@ANI) September 15, 2023
కేరళలో ఇప్పటి వరకు 6 మందికి ప్రాణాంతక నిఫా వైరస్ సోకింది. ఇందులో ఇద్దరు మృతి చెందారు. ఈ నేపథ్యంలో కోజికోడ్ జిల్లాలో అన్ని విద్యా సంస్థలు, పార్కులు, బీచ్‌లను మూసివేయాలని ప్రభుత్వం ఆదేశించింది. అదే సమయంలో మతపరమైన సంస్థలలో ప్రార్థన సమావేశాలు, ఇతర బహిరంగ కార్యక్రమాలను కూడా నిషేధించారు. ఇదిలా ఉండగా గురువారం పూణేలోని నేషనల్ ఇన్‌స్టిట్యూట్ ఆఫ్ వైరాలజీ అనుమానిత కేసుల 11 నమూనాలు, వారితో సన్నిహితంగా ఉన్నవారి నమూనాలు నెగెటివ్‌గా వచ్చాయని చెప్పారు. మరో 15 నమూనాలను సేకరించి పరీక్ష కోసం పంపినట్లు తెలిపారు.
నిపా వైరస్ అంటే ఏమిటి?:
ప్రపంచ ఆరోగ్య సంస్థ (WHO) ప్రకారం, నిపా వైరస్ సంక్రమణ అనేది జంతువుల నుండి మానవులకు సంక్రమించే జూనోటిక్ వ్యాధి. ఇది కలుషితమైన ఆహారం ద్వారా లేదా నేరుగా వ్యక్తుల మధ్య వ్యాపిస్తుంది. గబ్బిలాల వల్ల వస్తుంది. ఈ వైరస్ మనుషులకే కాదు జంతువులకు కూడా ప్రాణాంతకం. ఈ వైరస్ పందుల వంటి జంతువులకు తీవ్రమైన వ్యాధిని కలిగిస్తుంది. ఇకపోతే, నిపా వైరస్ లక్షణాలు.. కోవిడ్-19 లక్షణాల మాదిరిగానే ఉంటాయి. దగ్గు, గొంతు నొప్పి, తల తిరగడం, మగత, కండరాల నొప్పి, అలసట, మెదడు వాపు , తలనొప్పి, గట్టి మెడ, కాంతికి సున్నితత్వం వంటి లక్షణాలను అనుభవిస్తారని ఐసీఎంఆర్ చెబుతుంది.
మరిన్ని జాతీయ వార్తల కోసం క్లిక్ చేయండి..
