Viral: మా గ్రామంలో ఆడోళ్లు తెగ తాగేస్తున్నారు.. పోలీసులను ఆశ్రయించిన పురుషులు

ఒడిశాలో ఓ విచిత్ర సంఘటన చోటుచేసుకుంది. సాధారణంగా తమ భర్తలు మద్యం సేవించి తమను చిత్ర హింసలకు గురిచేస్తున్నారని, ఇంటిని పట్టించుకోవడంలేదని మహిళలు తమ భర్తలపై ఫిర్యాదు చేయడం మనం చూశాం. కానీ కొందరు భర్తలు తమ భార్యలు పెట్టే బాధలనుంచి తమను కాపాడమని పోలీసులను ఆశ్రయించారు. వారు మద్యం సేవించి ఇల్లు గుల్ల చేయడమే కాకుండా తమను చిత్రహింసలు పెడుతున్నారని లబోదిబోమంటున్నారు.

పురుషులకంటే మేమేం తక్కువకాదు.. అనుకున్నారో ఏమో ఆ గ్రామానికి చెందిన మహిళలు మద్యం సేవిస్తూ పురుషులకు ఛాలెంజ్‌ విసురుతున్నారు. ఒడిశాలోని కోరాపుట్‌ జిల్లా బొరిగుమ్మసమితిలోని పూజారిపుట్‌ పంచాయతీ కొండగూడ గ్రామంలోని కొందరు వ్యక్తులు పోలీసులను ఆశ్రయించారు. తమ భార్యలు మద్యానికి బానిసలై ఇల్లు గుల్ల చేస్తున్నారని, తాము కష్టపడి సంపాదించుకొస్తుంటే.. ఆడబ్బుతో తాగుతూ.. ఇంటిని గాలికొదిలేస్తున్నారని ఫిర్యాదు చేశారు. గ్రామంలోని కొందరు యువకులు సారా తయారు చేసి విక్రయిస్తున్నారని ఫిర్యాదు చేశారు. తాము కూలి చేసి డబ్బులు సంపాదించి తెస్తుంటే తమ భార్యలు ఆ డబ్బులు మొత్తం మద్యానికే ధారబోస్తున్నారని వాపోయారు. తమ భార్యల తీరుతో సంసారాలు గడవడం కష్టంగా మారిందిని, పిల్లల బతుకు అంధకారమైపోతుందని ఆవేదన వ్యక్తం చేశారు. సారా తయారీదారులపై చర్యలు తీసుకుని తమ కుటుంబాలను, గ్రామాన్ని రక్షించాలని పోలీసులను, అబ్కారీ అధికారులను కలిసి వేడుకున్నారు. వారి ఫిర్యాదును స్వీకరించిన అధికారులు తగిన చర్యలు తీసుకుంటామని చెప్పారు.

మరిన్ని జాతీయ వార్తల కోసం క్లిక్‌ చేయండి.