ఏకోపాధ్యాయ మామూలే.. ఏకోవిద్యార్ధి జర డిఫ్రెంట్.. ఆ ఊరికి ‘ఒకే ఒక్కడు’

Maharashtra News

చదువు ప్రాముఖ్యతకు ఈ పాఠశాల బలమైన నిదర్శనం. ఎందుకంటే రోజు 10 కిలోమీటర్లకుపైగా ప్రయాణించి ఒకేఒక్క విద్యార్ధి ఉన్న పాఠశాలకు వస్తున్నాడో టీచర్‌. చదువుతోపాటు ప్రభుత్వం కల్పిస్తున్న అన్ని సదుపాయాలను విద్యార్ధికి అందేలా చూస్తున్నాడు. ఈ ఏకోపాధ్యాయ.. ఏకోవిద్యార్ధి పాఠశాల ఎక్కడుందంటే..

మహారాష్ట్రలోని వాషిమ్ జిల్లా గణేష్‌పూర్ గ్రామంలోని జిల్లా పరిషత్ ప్రాథమిక పాఠశాలలో గత రెండేళ్లుగా కేవలం ఒక్క విద్యార్థి మాత్రమే స్కూల్‌కు వస్తున్నాడు. ఆ ఒక్క విద్యార్ధికి కిషోర్‌ మాన్కర్ అనే టీచర్‌ పాఠాలు చెబుతున్నాడు. కిషోర్‌ మాన్కర్ మీడియాతో మాట్లాడుతూ.. ఈ గ్రామం మొత్తం జనాభా కేవలం 150 మాత్రమే. 1 నుంచి నాలుగో తరగతి వరకు మాత్రమే పాఠశాలలో తరగతులు నిర్వహించేందుకు అనుమతి ఉంది. గ్రామం మొత్తంలో పాఠశాలకు వెళ్లే వయస్సున్న పిల్లల్లో ఒకేఒక అబ్బాయి ఉన్నాడు. ఆ విద్యార్ధికి నేను అన్ని సబ్జెక్టులను బోధిస్తాను. చదువు మాత్రమే కాకుండా మధ్యాహ్న భోజన సదుపాయం కూడా కల్పిస్తున్నాం. అలాగే ప్రభుత్వం కల్పిస్తున్న అన్ని సౌకర్యాలు విద్యార్ధికి అందిస్తున్నట్లు మీడియాకు తెలిపాడు.

మరిన్ని జాతీయ వార్తల కోసం క్లిక్‌ చేయండి.