ఫిబ్రవరి 1 న బడ్జెట్.. మోదీ ప్రభుత్వం ముందు పెను సవాళ్లు

ప్రధానిగా మోదీ రెండోసారి మళ్ళీ పగ్గాలు చేపట్టాక.. మొదటిసారిగా పూర్తి స్థాయి బడ్జెట్ ను కేంద్రం ఫిబ్రవరి 1 న పార్లమెంటుకు సమర్పించనుంది. దేశ ఎకానమీ అనేక ఎగుడుదిగుడులకు లోనవుతూ.. దేశంలో వేలాది యువజనులు ఉద్యోగాలకోసం కళ్ళలో వత్తులు వేసుకుని చూస్తున్న వేళ.. వివిధ రంగాలు బలహీనంగా తమను ‘ ఆదుకునే వారి కోసం ‘ ఆశగా ఎదురుచూస్తున్న తరుణంలో. జీడీపీ వృద్ది రేటు క్షీణిస్తున్న ఈ సమయంలో మోదీ ప్రభుత్వం వివిధ ‘ సాహసోపేత ‘ నిర్ణయాలను ఈ  కొత్త బడ్జెట్లో తీసుకోవచ్చునని ఆర్ధిక నిపుణులు భావిస్తున్నారు. ఇటీవలే రిజర్వ్ బ్యాంకు తీసుకున్న కొన్ని చర్యలు ఆర్థిక వృద్దికి దోహదపడేవిగా ఉన్నప్పటికీ అవి చాలవన్నది వారి భావన. 2024 సంవత్సరం కల్లా 5 ట్రిలియన్ డాలర్ల వృద్దితో ‘ మేకిన్ ఇండియా ‘ అన్న స్లోగన్ ని మోదీ సర్కార్ తన లక్ష్యంగా పెట్టుకుంది.  ప్రస్తుత ఆర్ధిక సంవత్సరం జీడీపీలో ప్రభుత్వ బడ్జెట్ లోటు 3. 8 శాతంగా ఉందని అంచనా. ఇది 3.3 శాతం టార్గెట్ ని మించే ఉందని ఓ సీనియర్ అధికారి పేర్కొన్నట్టు రాయిటర్ వార్తా సంస్థ వెల్లడించింది. సెప్టెంబరు 30తో అంతమైన త్రైమాసికానికి భారత జీడీపీ రేటు ఆరేళ్ళ కనిష్ట స్థాయికి-4.5 శాతానికి తగ్గిపోయింది. వినియోగదారుల కొనుగోలు శక్తి తగ్గడం, పూర్ డిమాండ్ వంటి వివిధ కారణాలవల్ల ఆర్ధిక సంస్థలు తమ గ్రోత్ ప్రొజెక్షన్స్ ని తగ్గించుకున్నాయి. కార్పొరేట్ పన్నుల్లో కోత లాంటి పలు చర్యలను ప్రభుత్వం ఇటీవల చేబట్టింది. . అలాగే ఆర్ధిక వృద్ది రేటుకు అనుగుణంగా రూ. 102 లక్షల కోట్ల ప్రాజెక్టును ఆర్ధిక మంత్రి నిర్మలా సీతారామన్ ప్రకటించారు. ఏమైనా.. ఈ సంవత్సరం మార్చి మాసాంతానికి జీడీపీ రేటు 5 శాతానికి పెరగవచ్చునన్నది ప్రభుత్వ అంచనా. ఇదే జరిగితే.. 11 ఏళ్లలో వృద్ది రేటు ఇంత మెల్లగా పెరగడం ఇదే మొదటిసారి కావచ్ఛు. ఇలా ఉండగా ‘ బడ్జెట్-2020 ‘ నేపథ్యంలో.. ప్రధాని మోదీ గురువారం ఆర్ధిక రంగ నిపుణులతో సమావేశమై తదనంతర నిర్ణయాలపై సమీక్షించనున్నారు.