రెండో వివాహం చేసుకుంటే 10 సంవత్సరాల జైలు శిక్ష.. కీలక బిల్లుకు అసెంబ్లీ ఆమోదం

అస్సాం రాష్ట్ర ప్రభుత్వం సంచలన నిర్ణయం తీసుకుంది. ఏకంగా అసెంబ్లీ సాక్షిగా ప్రకటించింది. గురువారం (నవంబర్ 27, 2025)న అస్సాం అసెంబ్లీలో బహుభార్యత్వాన్ని నిషేధిస్తూ ప్రవేశపెట్టిన బిల్లును ఆమోదించింది. ఈ చట్టం ప్రకారం, బహుభార్యత్వాన్ని ఆచరించే ఎవరైనా నేరంగా పరిగణించబడతారు. అయితే కొన్ని మినహాయింపులతో, గరిష్టంగా 10 సంవత్సరాల జైలు శిక్షను అనుభవించవచ్చు. బాధితులకు రూ. 1.40 లక్షల పరిహారం చెల్లించాల్సి ఉంటుంది. ఈ మేరకు అసెంబ్లీ ఆమోదం తెలిపింది.

ఈ బిల్లు షెడ్యూల్డ్ తెగ (ST) వర్గానికి చెందిన వ్యక్తులను, ఆరవ షెడ్యూల్ కింద ఉన్న ప్రాంతాలను చట్టం పరిధి నుండి మినహాయించారు. అస్సాం బహుభార్యత్వ నిషేధ బిల్లు, 2025 ఆమోదం సందర్భంగా, ముఖ్యమంత్రి హిమంత బిస్వా శర్మ కీలక ప్రకటన చేశారు. ఈ చట్టం మతాన్ని అధిగమించిందని, కొన్ని వర్గాలు దీనిని నిరూపించుకుంటున్నట్లుగా ఇస్లాంకు వ్యతిరేకం కాదని అన్నారు.

ఈ చట్టం ప్రకారం, బహుభార్యత్వానికి పాల్పడిన వ్యక్తికి ఏడు సంవత్సరాల వరకు జైలు శిక్ష, జరిమానా విధించవచ్చు. ఒక వ్యక్తి తమ ప్రస్తుత వివాహాన్ని దాచిపెట్టి రెండవ వివాహం చేసుకుంటే, వారికి 10 సంవత్సరాల వరకు జైలు శిక్ష, జరిమానా రెండూ విధించవచ్చు. హిందువులు కూడా బహుభార్యత్వం నుండి మినహాయింపు పొందలేరు. ఇది మన బాధ్యత కూడా. ఈ బిల్లు హిందువులు, ముస్లింలు, క్రైస్తవులు సహా అన్ని ఇతర వర్గాలను కవర్ చేస్తుంది” అని ముఖ్యమంత్రి అన్నారు. మహిళా సాధికారత లక్ష్యంగా ఉన్న ఈ బిల్లు ఏకగ్రీవంగా ఆమోదించిందని సభలో సందేశం తెలియజేయడానికి ప్రతిపక్ష సభ్యులందరూ తమ సవరణలను ఉపసంహరించుకోవాలని ముఖ్యమంత్రి కోరారు.

హిమంత బిస్వా శర్మ అభ్యర్థనను పరిగణనలోకి తీసుకోకుండా, ఆల్ ఇండియా యునైటెడ్ డెమోక్రటిక్ ఫ్రంట్ (AIUDF), కమ్యూనిస్ట్ పార్టీ ఆఫ్ ఇండియా (మార్క్సిస్ట్) (CPI-M) తమ సవరణ సూచనలను ముందుకు తెచ్చాయి. వాటిని వాయిస్ ఓటు ద్వారా తిరస్కరించారు. యూనిఫాం సివిల్ కోడ్ (UCC) గురించి మాట్లాడుతూ ముఖ్యమంత్రి హిమంత బిస్వా శర్మ, వచ్చే ఏడాది అస్సాం అసెంబ్లీ ఎన్నికల తర్వాత తాను మళ్లీ ముఖ్యమంత్రి అయితే అస్సాంలో దీనిని అమలు చేస్తామని అన్నారు. ముఖ్యమంత్రిగా తిరిగి వస్తే, కొత్త ప్రభుత్వం మొదటి సమావేశంలోనే UCC బిల్లు ప్రవేశపెట్టి, అమలు చేయడం జరుగుతుందని సభకు హామీ ఇచ్చారు. బహుభార్యత్వంపై నిషేధం UCC అమలు వైపు ఒక కీలక అడుగు అని ఆయన అన్నారు.

“ఫిబ్రవరి చివరి నాటికి ఈ సమావేశాల్లో మోసపూరిత వివాహాలకు వ్యతిరేకంగా బిల్లును ప్రవేశపెడతాం, కాబట్టి లవ్ జిహాద్ గురించి మేము చెప్పిన దానిని నెరవేరుస్తాం” అని ముఖ్యమంత్రి అన్నారు. ఈ నెల ప్రారంభంలో ప్రభుత్వం లవ్ జిహాద్‌ను నిషేధించి, దానికి వ్యతిరేకంగా బిల్లును ప్రవేశపెడుతుందని ఆయన చెప్పారు.

మరిన్ని జాతీయ వార్తల కోసం ఇక్కడ క్లిక్ చేయండి..