పిల్లల దిష్టి బొట్టు వెనుక ఉన్న సీక్రెట్ ఏంటో తెలుసా..?
పసిపిల్లల నుదిటిపై తల్లులు పెట్టే నల్ల బొట్టు చిన్న విషయంలా అనిపించొచ్చు. కానీ దీని వెనుక ఉన్న నమ్మకం, అమ్మ ప్రేమ, పిల్లల్ని కాపాడాలనే ఆలోచన చాలా లోతైనవి. ఈ ఆచారం తరతరాలుగా వస్తోంది. చెడు చూపుల నుండి పిల్లల్ని కాపాడి.. వారు ఆరోగ్యంగా పెరగాలని తల్లిదండ్రులు కోరుకోవడమే దీనికి కారణం. ఇప్పుడు దీని వెనుక ఉన్న అర్థం ఏంటో వివరంగా తెలుసుకుందాం.
Updated on: Jul 24, 2025 | 6:15 PM
ప్రతి తల్లి తమ పిల్లల నుదిటిపై చిన్న నల్ల చుక్క పెట్టడం చాలా ఇళ్లలో చూస్తాం. ఇది తల్లి ప్రేమ, శ్రద్ధ, జాగ్రత్తగా పెట్టే చిన్న గుర్తు. కానీ దీని వెనుక లోతైన అర్థం ఉంది. ఈ చిన్న నల్ల బొట్టు కేవలం అలంకారం కాదు. తరతరాలుగా వస్తున్న నమ్మకాలు, అనుభవాల ఆధారంగా ఏర్పడిన సంప్రదాయం ఇది.
ఎందుకు పెడుతారు..?
ప్రస్తుత రోజుల్లో సైన్స్ చాలా విషయాలను ముందుకు తీసుకెళ్తున్నా.. మన పెద్దలు చెప్పిన కొన్ని పద్ధతులు ఇప్పటికీ ముఖ్యమైనవే. ముఖ్యంగా నజర్ అంటే చెడు చూపు. దాని నుండి పిల్లలను కాపాడాలనే ఉద్దేశంతోనే ఈ నల్ల బొట్టు పెడతారు. చిన్న పిల్లలను పవిత్రమైన శక్తితో ఉన్న దేవతలుగా భావిస్తారు. వారి అమాయకత్వం, సహజమైన అందం వల్ల.. ఇతరుల నుండి అసూయ లేదా చెడు శక్తులు ఆకర్షించబడతాయని ఒక నమ్మకం.
ఈ నల్ల చుక్కను అసంపూర్ణంగా పెట్టడం వల్ల పిల్లల మీద పొగడ్తలు తగ్గుతాయని నమ్మేవారు. ఎందుకంటే కొన్ని పాత గ్రంథాల ప్రకారం.. ఒక చిన్నారిని ఎక్కువగా మెచ్చుకుంటే వారిలోని ప్రకాశం దెబ్బతినవచ్చని చెబుతారు. అందుకే ఈ బొట్టు ఒక రకంగా పిల్లలను పొగడ్తల చెడు ప్రభావం నుండి కాపాడే రక్షణ కవచం లాగా పనిచేస్తుంది.
దిష్టి బొట్టు
చాలా మంది తల్లులు ఇంట్లో చేసిన కాటుకతో లేదా మసితో ఈ నల్ల బొట్టు పెడతారు. ఇది నుదిటి మీదనే కాదు.. చెవి వెనుక, అరచేతులపై, లేదా పాదాలకూ కూడా పెట్టే అలవాటు ఉంది. ఒక్కో ఇంట్లో ఒక్కో రకంగా చేస్తారు. కానీ అందరి లక్ష్యం మాత్రం ఒక్కటే.. పిల్లలు ఆరోగ్యంగా, సురక్షితంగా ఉండాలని.
ఈ బొట్టు పెట్టే ప్రక్రియలో అమ్మ ప్రేమ ఉంటుంది. నా బిడ్డకు ఏమీ కాకూడదు అనే తల్లి కోరికే ఈ చిన్న చుక్క. ఈ బొట్టు కోసం వాడే కాటుకను కర్పూరం, నెయ్యితో కలిపి తయారు చేస్తారు. ఆయుర్వేదం ప్రకారం వీటి వల్ల ఆరోగ్య ప్రయోజనాలు ఉన్నాయట. కళ్ళకు చల్లదనాన్ని ఇవ్వడమే కాదు.. బాక్టీరియా నుండి కూడా రక్షణ ఇస్తుంది.
ఆధ్యాత్మిక రక్షణ
ఈ నల్ల బొట్టు ఒక ఆధ్యాత్మిక రక్షణగా పనిచేస్తుంది. పాత కాలం నుంచీ పిల్లలకు ప్రత్యేక శక్తులు ఉంటాయని నమ్ముతారు. వారి చుట్టూ ఉండే చిన్నపాటి శక్తులు వారికి తేలికగా తగలవచ్చని భావించేవారు. అందుకే ఈ బొట్టు ఒక రక్షణ కవచం లాగా పనిచేస్తుందని నమ్మేవారు. పసిపిల్లలపై చెడు ప్రభావం పడకుండా ఉండేందుకు మన పెద్దలు పాటించిన ఈ ఆచారం.. ప్రేమతో, అనుభవంతో, రక్షణతో నిండి ఉంటుంది.
