విదుర నీతి ప్రకారం.. ఈ లక్షణాలు మీలో ఉంటే మీకు జీవితంలో తిరుగనేదే ఉండదు..!

భార్యను గౌరవించడం అనేది ప్రతి వ్యక్తికి ముఖ్యమైన ధర్మంగా విదురుడు పేర్కొన్నారు. భార్య ఇంట్లో సంతోషంగా ఉంటే.. ఆ కుటుంబంలో శాంతి నిలిచిపోతుందని చెప్పారు. జీవిత భాగస్వామిని చిన్న విషయాల్లోనూ గౌరవించాలి ఆమెతో ఉండే ప్రతిరోజూ విలువైనదిగా భావించాలి. భార్యను ప్రశంసించేవారు ఎప్పుడూ సంతోషంగా ఉంటారని.. ప్రేమ మరింత బలపడుతుందని విదురుడు వివరించారు. ఇతరుల ముందు భార్యను అవమానించడం సరికాదని.. అలా చేయడం వల్ల కుటుంబంలో విభేదాలు తలెత్తే అవకాశముందని హెచ్చరించారు. భార్య చేసిన తప్పులను నెమ్మదిగా వివరించి అవి సరిదిద్దే ప్రయత్నం చేయడం ద్వారా కుటుంబ బంధం మరింత బలపడుతుందని తెలియజేశారు.

బ్రాహ్మణులను గౌరవించడం కూడా మనకు అద్భుతమైన ఫలితాలను అందించగలదని విదుర మహర్షి పేర్కొన్నారు. బ్రాహ్మణుల సేవలో ఉంటూ వారికి కావాల్సినంత సహాయం అందించేవారు జీవితంలో అద్భుత విజయాలు సాధిస్తారని చెప్పారు. బ్రాహ్మణులను అవమానించడం కేవలం పాపకార్యమే కాకుండా.. ఆ వ్యక్తికి ఆర్థిక సమస్యలు అపకీర్తి తెచ్చిపెడుతుందని హెచ్చరించారు. మంచి విలువలకు సంబంధించిన మంత్రాలను, సంప్రదాయాలను అర్థం చేసుకునే వారిని గౌరవించడం వల్ల పుణ్యం చేకూరుతుందని విదురుడు తెలియజేశారు. వారి ఆశీర్వాదం పొందిన ఇళ్లలో ఎప్పుడూ శాంతి, సంపద నిలిచి ఉంటుందని వివరించారు.

తెలివైనవారిని గౌరవించడం వల్ల ఇంట్లో ఉన్నవారికి జ్ఞానం, విజయం సిద్ధిస్తాయని విదురుడు పేర్కొన్నారు. విద్యతో కూడిన ఇంట్లో లక్ష్మీదేవి స్థిరంగా ఉంటుందని.. జ్ఞానం సంపదను కూడా ఆకర్షిస్తుందని వివరించారు. పండితులను, జ్ఞానులు గల వ్యక్తులను గౌరవించనివారు తమ జీవితంలో నిజమైన విజయం పొందలేరని స్పష్టంగా చెప్పారు. వారు ఇచ్చే సలహాలను, జ్ఞానాన్ని స్వీకరించే వారికి మంచి ఫలితాలు లభిస్తాయని తెలియజేశారు. ఇంట్లో ఉన్నవారిని గౌరవించడం ద్వారా.. కుటుంబంలోనూ, సమాజంలోనూ మంచి పేరు పొందవచ్చని చెప్పారు. విదుర మహర్షి చెప్పిన ఈ నీతులను అనుసరిస్తే జీవితంలో సంతోషం, శాంతి, ధనవృద్ధి లభిస్తాయని.. లక్ష్మీదేవి అనుగ్రహం కురుస్తుందని ఆయన స్పష్టంగా తెలియజేశారు.