Diabetes Risk: రాసిపెట్టుకోండి..ఈ అలవాట్లు మీకుంటే డయాబెటీస్ రావడం ఖాయం..!
భారత్లో డయాబెటీస్ సమస్య పెను భూతంగా మారుతోంది. జీవనశైలి మార్పులు, వ్యాయామం లేకపోవడం, అధిక కార్బోహైడ్రేట్ ఆహారం వల్ల మధుమేహం కేసులు వేగంగా పెరుగుతున్నాయి. రక్తంలో చక్కెర స్థాయిలు అధికమయ్యే ఈ వ్యాధి, సరైన జాగ్రత్తలు తీసుకోకపోతే గుండె, కిడ్నీ, కంటి సమస్యలకు దారితీసే ప్రమాదం ఉంది. ఈ అలవాట్లు మీకుంటే మీరు కూడా డయాబెటీస్ బారినపడే ముప్పు ఎక్కువే.. వెంటనే ఈ అలవాట్లను మార్చుకోవాలి.
Updated on: May 23, 2026 | 11:51 AM
భారత్లో డయాబెటీస్ (మధుమేహం) సమస్య వేగంగా పెరుగుతోంది. ప్రపంచంలోనే అత్యధిక డయాబెటీస్ బాధితులు ఉన్న దేశాల్లో భారత్ ఒకటిగా మారింది. ముఖ్యంగా నగర ప్రజల్లో గత ఒకట్రెండు దశాబ్దాల కాలంలో ఏర్పడిన జీవనశైలి మార్పులు, తక్కువ శారీరక శ్రమ, అధిక కార్బోహైడ్రేట్ ఆహారం కారణంగా ఈ సమస్య తీవ్రమవుతోంది. డయాబెటీస్ అనేది రక్తంలో చక్కెర స్థాయిలు అధికంగా ఉండే దీర్ఘకాలిక జీవనశైలి వ్యాధి. శరీరంలో ఇన్సులిన్ సరిపడా ఉత్పత్తి కాకపోవడం లేదా సరిగా పనిచేయకపోవడం వల్ల ఇది వస్తుంది.
మధుమేహం (డయాబెటిస్) వచ్చే ప్రమాదాన్ని పెంచే 7 రోజువారీ అలవాట్లు ఇవే..
- ఎక్కువ సేపు ఒకే చోట కూర్చోవడం: కదలిక లేకుండా ఎక్కువ సమయం కూర్చొని ఉండటం వల్ల శరీర జీవక్రియ మందగిస్తుంది. ఇది ఇన్సులిన్ను సమర్థవంతంగా ఉపయోగించుకునే సామర్థ్యాన్ని తగ్గించి, ఇన్సులిన్ రెసిస్టెన్స్కు దారితీస్తుంది.
- ఉదయం అల్పాహారం మానేయడం: ఉదయాన్నే బ్రేక్ఫాస్ట్ మానేయడం వల్ల రోజంతా రక్తంలో చక్కెర స్థాయిలలో హెచ్చుతగ్గులు వస్తాయి. అంతేకాకుండా, ఇది ఆ తర్వాత ఎక్కువగా తినేలా ప్రేరేపిస్తుంది.
- ఎక్కువగా చక్కెర తీసుకోవడం: శీతల పానీయాలు, డెజర్ట్లు, ప్యాక్ చేసిన స్నాక్స్, ఫాస్ట్ ఫుడ్స్, ప్రాసెస్డ్ ఫుడ్స్ రక్తంలో గ్లూకోజ్ స్థాయిలను ఒక్కసారిగా పెంచుతాయి. ఇవి బరువు పెరగడానికి, డయాబెటిస్ రావడానికి ప్రధాన కారణాలుగా మారుతాయి.
- సరిగ్గా నిద్రపోకపోవడం: సరిగ్గా నిద్రపోకపోవడం వల్ల ఆకలిని, గ్లూకోజ్ నియంత్రణను మేనేజ్ చేసే హార్మోన్ల బ్యాలెన్స్ను దెబ్బతింటుంది. ఇది శరీరాన్ని డయాబెటిస్ బారిన పడేలా చేస్తుంది.
- మానసిక ఒత్తిడి నియంత్రించకపోవడం: నిరంతర మానసిక ఒత్తిడి వల్ల శరీరంలో కార్టిసాల్ హార్మోన్ స్థాయిలు పెరుగుతాయి. ఇది బ్లడ్ షుగర్ లెవెల్స్ పెరగడానికి, దీర్ఘకాలిక మెటబాలిక్ సమస్యలకు దారితీస్తుంది.
- తగినంత నీరు తాగకపోవడం: తక్కువగా నీరు తాగడం వల్ల శరీరం గ్లూకోజ్ను నిల్వ ఉంచడానికి ప్రయత్నిస్తుంది. దీనివల్ల బ్లడ్ షుగర్ పెరుగుతుంది. అలాగే, దాహాన్ని తప్పుగా అర్థం చేసుకుని చాలామంది కూల్ డ్రింగ్స్ వైపు మొగ్గు చూపినా ప్రమాదమే.
- రాత్రి ఆలస్యంగా ఎక్కువగా తినడం: రాత్రి వేళల్లో జీర్ణక్రియ మందగిస్తుంది. ఆ సమయంలో ఎక్కువగా తినడం వల్ల ఆహారం సరిగ్గా జీర్ణం కాక బ్లడ్ షుగర్ లెవెల్స్ బాగా పెరుగుతాయి. కొందరు చాలా లేట్గా ఎక్కువగా తిని.. ఆ తర్వాత పడకకు వెళ్తుంటారు. వీరు డయాబెటీస్ బారినపడటం ఖాయం.
రోజువారీ జీవితంలో ఈ చిన్న చిన్న అలవాట్లను మార్చుకోవడం ద్వారా డయాబెటిస్ ముప్పును చాలా వరకు తగ్గించుకోవచ్చు. సరైన జీవిన శైలి అలవాట్లు, డైట్, వ్యాయామం, నిద్రతో డయాబెటిస్ బారినపడకుండా తప్పించుకోవచ్చు.
(Disclaimer: ఇక్కడ ఇచ్చిన సమాచారం కేవలం మీ అవగాహన కోసం మాత్రమే. దీనికి సంబంధించిన సందేహాలు, సూచనల కోసం వైద్య నిపుణులను నేరుగా సంప్రదించండి)
