నిద్ర పోకపోతే ఏమవుతుంది..? ఏ వ్యాధులు వస్తాయో తెలిస్తే మైండ్ బ్లాంక్ అవ్వడం పక్కా..

నేటి ఆధునిక జీవనశైలిలో పని ఒత్తిడి.. మొబైల్ వ్యసనం మన కంటి నిద్రను దూరం చేస్తున్నాయి. రాత్రి ఆలస్యంగా పడుకోవడం, ఉదయాన్నే పరుగుల మీద లేవడం చాలామందికి అలవాటుగా మారింది. అయితే ఈ అసంపూర్ణ నిద్ర మీ శరీరాన్ని లోపల నుండి ఎలా దెబ్బతీస్తుందో తెలిస్తే షాక్ అవుతారు. నిద్రలేమి కేవలం అలసట మాత్రమే కాదు, అది అనేక దీర్ఘకాలిక వ్యాధులకు ఆహ్వానం పలుకుతోంది. ప్రధానంగా ఉదయం లేవగానే తీవ్రమైన నీరసం, రోజంతా చిరాకుగా ఉండటం, దృష్టి కేంద్రీకరించలేకపోవడం, కళ్లు మంటగా అనిపించడం, తల బరువుగా ఉండటం, చిన్న చిన్న విషయాలకే కోపం రావడం, మూడ్ స్వింగ్స్ వంటి లక్షణాలు ఉంటే ఒకవేళ మీరు ఈ సమస్యలు ఎదుర్కొంటుంటే మీ శరీరానికి తగినంత నిద్ర అందడం లేదని అర్థం..

అసంపూర్ణ నిద్ర లక్షణాలను గుర్తించండి

గుండె జబ్బుల ముప్పు: నిద్ర లేకపోవడం వల్ల శరీరంలో రక్తపోటు పెరుగుతుంది. ఇది క్రమంగా గుండెపోటు లేదా స్ట్రోక్ వంటి తీవ్రమైన సమస్యలకు దారితీస్తుంది. రక్తంలో కొలెస్ట్రాల్ స్థాయిలు పెరగడానికి కూడా నిద్రలేమి ప్రధాన కారణం.

టైప్ 2 డయాబెటిస్

శరీరంలో ఇన్సులిన్ పనితీరు నిద్రపై ఆధారపడి ఉంటుంది. తగినంత విశ్రాంతి లేకపోతే రక్తంలో చక్కెర స్థాయిలు అదుపు తప్పుతాయి. ఇది చివరకు డయాబెటిస్‌కు దారితీస్తుంది.

వేగంగా బరువు పెరగడం

మనం సరిగ్గా నిద్రపోనప్పుడు ఆకలిని ప్రేరేపించే హార్మోన్లు యాక్టివేట్ అవుతాయి. దీనివల్ల రాత్రిపూట ఎక్కువగా తినాలనిపించడం, జీవక్రియ మందగించడం జరిగి ఊబకాయం బారిన పడతారు.

మానసిక కుంగుబాటు

నిద్ర లేకపోవడం మెదడులోని నరాల పనితీరును ప్రభావితం చేస్తుంది. ఇది తీవ్రమైన ఆందోళన, ఒత్తిడి, నిరాశ వంటి సమస్యలకు మూలకారణం అవుతుంది.

బలహీనమైన రోగనిరోధక శక్తి

శరీరం వ్యాధులతో పోరాడే సామర్థ్యాన్ని కోల్పోతుంది. దీనివల్ల తరచుగా జలుబు, దగ్గు, జ్వరం వంటి ఇన్ఫెక్షన్ల బారిన పడే ప్రమాదం ఉంది.

గాఢ నిద్ర కోసం మీరు చేయాల్సిన 5 పనులు..

• ప్రతిరోజూ ఒకే సమయానికి పడుకోవడం, మేల్కొనడం అలవాటు చేసుకోండి.
• పడుకునే గంట ముందు మొబైల్, ల్యాప్‌టాప్ పక్కన పెట్టేయండి.
• రాత్రిపూట టీ, కాఫీ మానుకోండి. తేలికపాటి భోజనం చేయండి.
• పగటిపూట కనీసం 30 నిమిషాల నడక లేదా యోగా నిద్ర నాణ్యతను పెంచుతుంది.
• మనస్సును ప్రశాంతంగా ఉంచుకోవడానికి లోతైన శ్వాస వ్యాయామాలు చేయండి.

ప్రతి మనిషికి రోజుకు కనీసం 7 నుండి 8 గంటల* నాణ్యమైన నిద్ర అవసరం. నిద్ర సమస్యలు దీర్ఘకాలం కొనసాగితే, సొంత వైద్యం కాకుండా వెంటనే నిపుణులైన వైద్యుడిని సంప్రదించడం ఉత్తమం. గుర్తుంచుకోండి, మీరు ఇచ్చే విశ్రాంతే మీ రేపటి ఆరోగ్యానికి పెట్టుబడి!