Waxed Apples: రసాయనాలు కలిపిన యాపిల్స్.. సులభంగా ఇలా గుర్తించొచ్చు..

యాపిల్ పండును ఆరోగ్యానికి ఒక వరంలా భావిస్తారు. కానీ ప్రస్తుతం మార్కెట్‌లో కల్తీ పండ్లు విరివిగా అమ్ముడవుతున్నాయి. ఈ కల్తీ పండ్లలో యాపిల్స్ కూడా ఉన్నాయి. వీటిని తాజాగా, ఆకర్షణీయంగా కనిపించడానికి వ్యాపారులు వాటిపై మైనపు పొర (వ్యాక్స్), కృత్రిమ రంగులు పూస్తున్నారు. ఈ కల్తీ పండ్లు తినడం వల్ల మన ఆరోగ్యానికి ప్రమాదం ఉందని నిపుణులు హెచ్చరిస్తున్నారు. ఇలాంటి యాపిల్స్‌ను ఎలా గుర్తించాలో ఇప్పుడు చూద్దాం.

వ్యాక్స్ పూతను గుర్తించే పద్ధతులు

కత్తితో పరీక్ష: మీరు కొన్న యాపిల్‌ను ఒక కత్తితో తేలికగా గీకండి. మీరు గీకినప్పుడు తెల్లటి పొర లాంటిది బయటకు వస్తే, దానిపై మైనపు పూత పూశారని అర్థం. ఇది చాలా సులభమైన, సమర్థవంతమైన పద్ధతి.

వేడి నీటితో శుభ్రం చేయడం: యాపిల్ పండ్లను ఒక గిన్నెలో ఉంచి, దానిపై గోరువెచ్చని నీరు పోయండి. కొన్ని నిమిషాల తర్వాత నీటిపై జిడ్డు లేదా మైనపు లాంటి పొర తేలితే, దానిపై వ్యాక్స్ ఉన్నట్లు నిర్ధారించుకోవచ్చు.

గుడ్డతో తుడవడం: ఒక పొడి గుడ్డతో యాపిల్‌ను బాగా రుద్దండి. ఇది కృత్రిమమైన మైనపు పూత అయితే, గుడ్డపై తెల్లటి లేదా జిడ్డు అవశేషాలు అంటుకోవచ్చు. సహజమైన మైనపు పూత అయితే ఇలాంటి అవశేషాలు కనిపించవు.

కృత్రిమ రంగులను గుర్తించడం

సహజమైన యాపిల్‌కు ఒక మాదిరిగా మెరుపు ఉంటుంది. కానీ కృత్రిమ రంగులు, మైనపు పూత పూసిన యాపిల్స్ చాలా ఎక్కువగా మెరుస్తాయి. కొనేటప్పుడు ఈ మెరుపును గమనించండి. ఒకవేళ యాపిల్ అంచులు, మచ్చలు కూడా ఒకే రంగులో ఉంటే, రంగు పూసినట్లు అనుమానించవచ్చు. కొన్నిసార్లు రంగు తొక్క లోపలికి కూడా చొచ్చుకుపోవచ్చు.

జాగ్రత్తలు

మైనపు పూత ఉన్న యాపిల్స్ తినడం వల్ల కడుపు నొప్పి, వికారం, వాంతులు వంటి సమస్యలు వచ్చే అవకాశం ఉందని నిపుణులు చెబుతున్నారు. ఈ పూతలో వాడే రసాయనాలు కాలేయం, మూత్రపిండాల పనితీరును కూడా దెబ్బతీసే ప్రమాదం ఉందని అంటున్నారు. అందువల్ల, పైన చెప్పిన పద్ధతులతో యాపిల్‌ను పరీక్షించి, సురక్షితమైన పండ్లనే తినండి. ఒకవేళ వ్యాక్స్ ఉన్నట్లు గుర్తిస్తే, తొక్క తీసి తినడం మంచిది.