మధ్యాహ్నం నిద్రపోవడం నిజంగా మెదడుకు మంచిదా..? ఈ వాస్తవాలు తెలిస్తే మీ మైండ్ బ్లాంకే..

మధ్యాహ్నం కడుపునిండా తిన్నాక అలా కాసేపు మంచం ఎక్కి కునుకు తీయాలని కోరుకోని వారు ఉండరు. ఆ సమయంలో వచ్చే నిద్రను ఆపుకోవడం ఎవరి తరమూ కాదు. అయితే ఈ మధ్యాహ్నపు కునుకు మన మెదడు ఆరోగ్యానికి మంచిదేనా? లేక దీనివల్ల ఏమైనా నష్టాలు ఉన్నాయా? మనం ఈ అలవాటును మార్చుకోవాలా? అనే డౌట్లు చాలామందిలో ఉంటాయి. అమృతం అతిగా తింటే విషం అన్నట్లే.. మధ్యాహ్నపు నిద్ర విషయంలో కూడా శాస్త్రవేత్తలు సరిగ్గా ఇదే చెబుతున్నారు. చాలా మందిలో సందేహాలను రేకెత్తించే ఈ అలవాటు వెనుక ఉన్న అసలు శాస్త్రీయ అంశాలు ఏంటో అది మన మెదడును ఎలా ప్రభావితం చేస్తుందో తెలుసుకోవడం చయాలా ముఖ్యం.

మధ్యాహ్నపు కునుకు వల్ల కలిగే అద్భుత ప్రయోజనాలు

సైన్స్ ప్రకారం.. మధ్యాహ్నం పూట తక్కువ సమయం నిద్రపోవడం వల్ల మెదడుకు రీఛార్జ్ అయినట్లు అవుతుంది.

మెదడు వృద్ధాప్యాన్ని నివారిస్తుంది: పగటిపూట క్రమం తప్పకుండా చిన్న కునుకు తీసే వ్యక్తుల మెదడు పరిమాణం ఇతరుల కంటే పెద్దదిగా ఉంటుందని కొన్ని అంతర్జాతీయ అధ్యయనాలు చూపిస్తున్నాయి. ఇది మెదడు త్వరగా ముసలిదైపోకుండా నెమ్మదింపజేస్తుంది.

జ్ఞాపకశక్తి సూపర్‌గా పెరుగుతుంది: పగటిపూట తీసుకునే చిన్న కునుకు, మనం రోజంతా నేర్చుకునే సమాచారాన్ని దీర్ఘకాలిక జ్ఞాపకాలుగా మార్చుకోవడానికి మెదడుకు సహాయపడుతుంది. స్టూడెంట్స్‌కి, ఆఫీస్ వర్క్ చేసేవారికి ఇది బాగా పనికొస్తుంది.

మానసిక చురుకుదనం – ఏకాగ్రత: మధ్యాహ్నం 1 గంట దాటిన తర్వాత శరీరంలో సహజంగానే అలసట వస్తుంది. ఆ సమయంలో చిన్న కునుకు తీస్తే అలసట మాయమై, మిగతా రోజంతా శక్తి, ఏకాగ్రత పెరుగుతాయి.

ఒంటిపై ఒత్తిడి తగ్గుతుంది: మధ్యాహ్నం నిద్రపోవడం వల్ల శరీరంలో ఒత్తిడిని పెంచే హార్మోన్ అయిన కార్టిసాల్ స్థాయిలు తగ్గుతాయి. దీనివల్ల మనసు ప్రశాంతంగా మారుతుంది.

మధ్యాహ్నపు నిద్ర ఎప్పుడు విలన్‌గా మారుతుంది?

మధ్యాహ్నం పడుకోవడం వల్ల ఇన్ని లాభాలు ఉన్నప్పటికీ, అది ఎల్లప్పుడూ మంచిది కాదు. కొన్ని సందర్భాల్లో ఇది తీవ్ర నష్టాన్ని కలిగిస్తుంది.

స్లీప్ ఇనర్షియా ప్రమాదం: మీరు మధ్యాహ్నం ముప్పావు గంట లేదా గంట కంటే ఎక్కువ సేపు నిద్రపోతే, మెదడు గాఢ నిద్ర స్టేజ్‌లోకి వెళ్లిపోతుంది. అలాంటప్పుడు మీరు నిద్ర లేచాక ఉత్సాహంగా ఉండటానికి బదులు మరింత అలసటగా, తీవ్రమైన తలనొప్పితో లేదా రోజంతా నీరసంగా అనిపిస్తుంది. దీన్నే సైన్స్ భాషలో స్లీప్ ఇనర్షియా అంటారు.

రాత్రి నిద్రకు భంగం: మధ్యాహ్నం ఎక్కువగా నిద్రపోవడం వల్ల రాత్రిపూట సకాలంలో నిద్రపట్టదు. దీనివల్ల మీ స్లీప్ సైకిల్ పూర్తిగా దెబ్బతింటుంది.

ఆరోగ్య సమస్యలకు సంకేతం: రాత్రి వేళల్లో 7 నుండి 8 గంటలు పక్కాగా నిద్రపోయినప్పటికీ.. మధ్యాహ్నం కాగానే విపరీతమైన అలసట, నిద్రమత్తు వస్తుంటే మాత్రం అలర్ట్ అవ్వాలి. ఇది శరీరంలో షుగర్, థైరాయిడ్ లేదా గుండె సంబంధిత ఆరోగ్య సమస్యలు ఉన్నాయనడానికి ముందస్తు సంకేతం కావచ్చు.

మరి ఎంతసేపు, ఎప్పుడు నిద్రపోవాలి?

మీ మధ్యాహ్నపు కునుకు మీ మెదడుకు అమృతంలా పనిచేయాలంటే, మీరు ఈ రెండు గోల్డెన్ రూల్స్ పాటించాలి:

రూల్ 1: సమయం ఎంత ఉండాలి?

మీ మెదడుకు 15 నుండి 20 నిమిషాల కునుకు మాత్రమే ఉత్తమమైనది. మీ మెదడును అలర్ట్ చేయడానికి, జ్ఞాపకశక్తిని మెరుగుపరచడానికి ఈ కొద్ది సమయం సరిపోతుంది. ఈ టైమింగ్‌లో లేవడం వల్ల మీరు రోజంతా ఫుల్ యాక్టివ్‌గా ఉంటారు.

రూల్ 2: పర్ఫెక్ట్ టైమింగ్ ఏంటి?

మధ్యాహ్నం నిద్రపోవడానికి ఉత్తమ సమయం మధ్యాహ్నం 1 గంట నుండి 3 గంటల మధ్య మాత్రమే. సాయంత్రం 4 గంటల తర్వాత పొరపాటున కూడా నిద్రపోకూడదు. అది మీ రాత్రి నిద్రను పూర్తిగా నాశనం చేస్తుంది.

ఈ అలవాటును ఎలా మార్చుకోవాలి?

ఒకవేళ మీరు మధ్యాహ్నం గంటల తరబడి నిద్రపోతూ, రాత్రిపూట నిద్రపట్టక, తీవ్రమైన తలనొప్పితో బాధపడుతుంటే.. వెంటనే ఆ అలవాటును బ్రేక్ చేయండి.మధ్యాహ్నం భోజనం తర్వాత నిద్రమత్తుగా అనిపించినప్పుడు మంచం ఎక్కకుండా.. కాసేపు చల్లటి నీళ్లు తాగండి. లేదా ఒక 5 నుండి 10 నిమిషాల పాటు చిన్నగా నడక సాగించండి. ఇది శరీరంలో రక్తప్రసరణను పెంచి నిద్రమత్తును వదిలిస్తుంది.