Energy Drinks: రోజూ ఎనర్జీ డ్రింక్స్ తాగుతున్నారా? మీ ప్రాణాలు డేంజర్ జోన్‌లో ఉన్నట్టే

నేటి ఉరుకుల పరుగుల జీవితంలో అలసటను దూరం చేసుకునేందుకు చాలా మంది తక్షణ పరిష్కారంగా ఎనర్జీ డ్రింక్స్ పై ఆధారపడుతున్నారు. ఆఫీస్ పనిలో ఉన్నా, జిమ్‌లో కష్టపడుతున్నా, రాత్రంతా చదవాలన్నా ఒక టిన్ ఎనర్జీ డ్రింక్ తాగితే చాలు.. కొండంత శక్తి వస్తుందని నమ్ముతారు. కానీ, ఈ అలవాటు మీ ఆరోగ్యానికి ఎంతటి చేటు చేస్తుందో ఎప్పుడైనా ఆలోచించారా? ఎనర్జీ డ్రింక్స్‌లో ఏముంటుంది? రోజూ ఎనర్జీ డ్రింక్స్ తాగడం వల్ల శరీరంలో జరిగే మార్పులేంటో ఇప్పుడు చూద్దాం..

చాలా మంది వీటిని కేవలం పండ్ల రసాలు లేదా సాఫ్ట్ డ్రింక్స్ లాగే భావిస్తారు. కానీ వీటిలో ప్రధానంగా రెండు అంశాలు ఉంటాయి. అధిక మొత్తంలో కెఫీన్ అంటే సాధారణ కాఫీ కంటే వీటిలో కెఫీన్ పరిమాణం చాలా ఎక్కువ. అంతేకాదు, వీటివల్ల ఒకేసారి అధిక మొత్తంలో చక్కెర శరీరంలోకి వెళ్తుంది. వీటితో పాటు టౌరిన్, గ్వారానా వంటి ఉత్ప్రేరకాలు కూడా ఉంటాయి. ఇవి గుండెపై తీవ్ర ప్రభావం చూపుతాయి.

రోజూ తాగితే అనర్థమే..

• ఎనర్జీ డ్రింక్స్ తాగగానే రక్తపోటు ఒక్కసారిగా పెరుగుతుంది. రోజూ తాగడం వల్ల గుండె కొట్టుకునే వేగం అసాధారణంగా పెరిగి, గుండెపోటు వచ్చే ప్రమాదం ఉందని నిపుణులు హెచ్చరిస్తున్నారు.
•  వీటిలోని అధిక కెఫీన్ మీ నిద్రను దూరం చేస్తుంది. ఫలితంగా మెదడుపై ఒత్తిడి పెరిగి చిరాకు, ఏకాగ్రత లోపించడం వంటి సమస్యలు తలెత్తుతాయి.
•  షుగర్ లెవల్స్ ఎక్కువగా ఉండటం వల్ల కిడ్నీలపై భారం పడుతుంది. ఇది దీర్ఘకాలంలో కిడ్నీ ఫెయిల్యూర్లకు దారితీయవచ్చు.
•  ఎనర్జీ డ్రింక్స్ వల్ల శరీరంలోని కాల్షియం స్థాయిలు తగ్గి, ఎముకలు బలహీనపడే అవకాశం ఉంది.

ఆరోగ్య నిపుణుల అభిప్రాయం ప్రకారం.. ఎనర్జీ డ్రింక్స్‌ను రోజువారీ అలవాటుగా మార్చుకోకూడదు. ఏదో ఒక సందర్భంలో తాగితే పర్వాలేదు కానీ, రోజూ తాగడం వల్ల శరీరానికి శక్తి అందడం పక్కన పెడితే, అవయవాలు దెబ్బతినే ప్రమాదం ఉంది. తక్షణ శక్తి కోసం వీటికి బదులుగా.. మంచినీరు ఎక్కువగా తాగడం, కొబ్బరి నీళ్లు, తాజా పండ్ల రసాలు తీసుకోవడం, తగినంత నిద్రపోవడం వంటివి మేలని సూచిస్తున్నారు. చిన్నపాటి అలసటను దూరం చేసుకునేందుకు ఎనర్జీ డ్రింక్స్‌ను ఆశ్రయించి ఆరోగ్యాన్ని పాడుచేసుకోవద్దు. శక్తి అనేది సహజమైన ఆహారం మరియు విశ్రాంతి ద్వారా రావాలి తప్ప.. కెమికల్ డ్రింక్స్ ద్వారా కాదు. ఈ విషయంలో యువత మరింత జాగ్రత్తగా ఉండాలని వైద్యులు హెచ్చరిస్తున్నారు.

NOTE: పైన పేర్కొన్న అంశాలు కేవలం అవగాహన కోసం మాత్రమే జారీ చేయబడినవి.. వీటిని మేం ధృవీకరించలేదు.. వీటిపై మీకు సందేహాలు ఉంటే వైద్యులను సంప్రదించండి.