Smartphone: నిజమైన సంతోషం ఎలా ఉంటుందో తెలుసుకోవాలా?.. మీ స్మార్ట్ ఫోన్‌తో ఈ ప్రయోగం చేయండి

ఇది మనందరికీ ఒక మంచి పాఠంస్మార్ట్‌ఫోన్ మన జీవితంలో ఒక భాగం. ఉదయం నిద్ర లేచింది మొదలు రాత్రి నిద్రపోయే వరకు మన చేతిలోనే ఉంటుంది. అయితే, ఒక వ్యక్తి 30 రోజుల పాటు స్మార్ట్‌ఫోన్ లేకుండా జీవించేందుకు ఒక ప్రయోగం చేశారు. ఈ ప్రయోగంలో ఆయన పొందిన అనుభవాలు చాలా ఆశ్చర్యకరంగా ఉన్నాయి. ఈ ప్రయోగం వల్ల సంతోషం మన ఫోన్‌లో కాదని, మనలో ఉందని ఆయన గ్రహించారు.

మొదటి వారం: వ్యసనం నిజం

మొదటి కొన్ని రోజులు స్మార్ట్‌ఫోన్ లేని లోటు స్పష్టంగా కనిపించింది. పదే పదే ఫోన్ కోసం చేతులు వెళ్లడం, ఊహల్లో వైబ్రేషన్లు వినిపించడం లాంటివి ఎదురయ్యాయి. ఇది ఒక అలవాటు మాత్రమే అని, అంతేకానీ అది అవసరం కాదని ఆయన గుర్తించారు.

రెండో వారం: విసుగులో కొత్త ప్రపంచం

రెండో వారంలో ఒక కొత్త విషయం అర్థమైంది. విసుగు అనేది ఒక సమస్య కాదు. అది ఒక కొత్త ఆలోచనలకు మార్గం. మొబైల్ లేకపోవడంతో ఆయన చుట్టూ ఉన్న ప్రపంచాన్ని గమనించడం మొదలుపెట్టారు. మనుషులతో సంభాషణలు పెరిగాయి. దీనివల్ల బంధాలు మరింత దృఢంగా మారాయి.

మూడో వారం: మంచి నిద్ర, ఏకాగ్రత

స్మార్ట్‌ఫోన్ లేకపోవడం వల్ల నిద్ర నాణ్యత బాగా పెరిగింది. రాత్రిపూట టీవీ, ఫోన్‌కు బదులు పుస్తకాలు చదవడం అలవాటైంది. అలాగే, పనిపై పూర్తి ఏకాగ్రత పెట్టగలిగారు. సోషల్ మీడియాలో పోలికలు లేకపోవడం వల్ల సంతృప్తి కూడా పెరిగింది.

నాల్గో వారం: హద్దులు, స్వేచ్ఛ

ఫోన్ లేకపోవడం వల్ల కొన్ని ఇబ్బందులు ఎదురయ్యాయి. కానీ, ఆ ఇబ్బందులు చిన్నవి. స్మార్ట్‌ఫోన్‌కు దూరంగా ఉండడం వల్ల నిజమైన స్వేచ్ఛ దొరికింది. కొన్ని హద్దులు పెట్టుకోవడం వల్ల మనసు ప్రశాంతంగా ఉంటుందని ఆయన తెలుసుకున్నారు. చిన్న చిన్న సంతోషాలను కూడా ఆస్వాదించడం అలవాటు చేసుకున్నారు.

ఈ ప్రయోగం తర్వాత ఆయన స్మార్ట్‌ఫోన్‌ను తిరిగి వాడటం మొదలుపెట్టారు. అయితే కొన్ని నిబంధనలు పెట్టుకున్నారు. వాటిలో ముఖ్యమైనవి.. ఉదయం నిద్ర లేవగానే ఫోన్ చూడకపోవడం, బెడ్‌రూంలోకి ఫోన్ తీసుకెళ్లకపోవడం, ప్రతి వారం ఒక రోజు ఫోన్‌కు పూర్తిగా దూరంగా ఉండటం వంటివి.