రోజుకు ఒక కిలోమీటర్ నడిస్తే ఎన్ని క్యాలరీలు కరుగుతాయి? నిపుణులు చెబుతున్న సింపుల్ లెక్క ఇదే!
బరువు తగ్గడానికి జిమ్కి వెళ్లాల్సిన అవసరం లేదు. క్రమం తప్పకుండా నడిస్తే చాలు అని వైద్యులు చెబుతుంటారు. అయితే, మనలో చాలా మందికి ఒక సందేహం ఉంటుంది. నేను రోజుకు ఇంత దూరం నడుస్తున్నాను కదా, దీనివల్ల ఎన్ని క్యాలరీలు ఖర్చవుతున్నాయి? అని. దీనికి సంబంధించిన శాస్త్రీయ విశ్లేషణను ఇప్పుడు చూద్దాం..
Updated on: Apr 17, 2026 | 12:35 PM
బరువు తగ్గాలనుకునే వారికి నడక అత్యంత సులభమైన వ్యాయామం. అయితే, ఒక కిలోమీటర్ నడిస్తే ఖచ్చితంగా ఎన్ని క్యాలరీలు కరుగుతాయనేది వ్యక్తి, బరువు, నడిచే వేగంపై ఆధారపడి ఉంటుంది. సాధారణంగా ఒక కిలోమీటర్ నడకలో ఖర్చయ్యే క్యాలరీలు మీ శరీర బరువుపై ఆధారపడి ఉంటాయి. నిపుణుల లెక్కల ప్రకారం.. ఒక కిలోమీటర్ నడిస్తే సగటున 62 నుండి 65 క్యాలరీలు ఖర్చవుతాయి. మీ బరువు ఎక్కువగా ఉంటే (ఉదాహరణకు 80-90 కిలోలు), అదే ఒక కిలోమీటర్ నడకకు మీరు 80 నుండి 90 క్యాలరీలు ఖర్చు చేసే అవకాశం ఉంది. దీనిని కిలోమీటర్ల కంటే అడుగులలో లెక్కిస్తే, సుమారు 1200 నుండి 1500 అడుగులు వేస్తే ఒక కిలోమీటర్ పూర్తవుతుంది.
క్యాలరీలను ప్రభావితం చేసే అంశాలు కూడా ఉన్నాయి. మెల్లగా నడవడం కంటే వేగంగా (Brisk Walking) నడవడం వల్ల గుండె వేగం పెరిగి ఎక్కువ క్యాలరీలు కరుగుతాయి. చదునైన రోడ్డుపై కంటే మెట్లు ఎక్కడం లేదా ఎత్తు పల్లాలు ఉన్న చోట నడవడం వల్ల శరీరంపై ఎక్కువ శ్రమ పడి క్యాలరీల వినియోగం పెరుగుతుంది. ప్రతి వ్యక్తి శరీర తత్వాన్ని బట్టి క్యాలరీలు ఖర్చయ్యే రేటు మారుతుంటుంది.
ఎన్ని అడుగులు వేయాలి?: ఆరోగ్యంగా ఉండాలంటే రోజుకు కనీసం 10,000 అడుగులు (సుమారు 7-8 కిలోమీటర్లు) నడవడం లక్ష్యంగా పెట్టుకోవాలి. ఒకవేళ మీరు కేవలం బరువు తగ్గడానికే నడుస్తుంటే, ఆహార నియంత్రణతో పాటు కనీసం 45 నిమిషాల వేగవంతమైన నడక అవసరం. నడక అనేది కేవలం క్యాలరీలను కరిగించడమే కాకుండా, గుండె ఆరోగ్యాన్ని మెరుగుపరుస్తుంది. ఒత్తిడిని తగ్గిస్తుంది. మీ ఫోన్లో స్టెప్ కౌంటర్ యాప్ పెట్టుకుని, రోజూ మీరు నడిచే దూరాన్ని గమనించడం వల్ల మీకు మరింత ప్రోత్సాహం లభిస్తుంది.
