Chicken: వండిన చికెన్ ఫ్రిజ్‌లో పెడితే ఎన్ని రోజులు పాడవకుండా ఉంటుంది? ఎన్ని రోజుల్లోపే తినాలి?

Chicken: చాలా ఇళ్లలో రాత్రి భోజనం తర్వాత మిగిలిన చికెన్‌ను ఫ్రిజ్‌లో పెట్టి మరుసటి రోజు తినడం సాధారణమే. అయితే వండిన చికెన్‌ను ఫ్రిజ్‌లో పెట్టాం కదా అని ఎప్పుడైనా తినేయడం సురక్షితం కాదు. దానిని ఎంతకాలం నిల్వ చేయాలి, ఎలా భద్రపరచాలి అనే విషయాల్లో జాగ్రత్తలు అవసరం.

3 నుంచి 4 రోజులు మాత్రమే..

ఆహార భద్రతా మార్గదర్శకాల ప్రకారం, సరైన ఉష్ణోగ్రత వద్ద ఉంచిన వండిన చికెన్‌ను సాధారణంగా 3 నుంచి 4 రోజుల వరకు ఫ్రిజ్‌లో భద్రపరచవచ్చు. ఫ్రిజ్ ఉష్ణోగ్రత 4°C (40°F) లేదా అంతకంటే తక్కువగా ఉండటం ముఖ్యం. చికెన్ కర్రీ, గ్రిల్డ్ చికెన్, రోస్టెడ్ చికెన్, ఫ్రైడ్ చికెన్ వంటి వండిన చికెన్ వంటకాలకూ ఇదే సాధారణ నియమం వర్తిస్తుంది.

ఫ్రిజ్‌లో పెడితే బ్యాక్టీరియా చనిపోతుందా?

ఇది చాలామందికి ఉన్న అపోహ. ఫ్రిజ్‌లో పెట్టడం వల్ల బ్యాక్టీరియా పూర్తిగా నశించదు. వాటి పెరుగుదల మాత్రం నెమ్మదిస్తుంది. అందుకే ఎక్కువ రోజుల పాటు నిల్వ ఉంచిన చికెన్‌లో ఆహార కలుషితానికి సంబంధించిన ప్రమాదం పెరగవచ్చు.చికెన్‌లో సాల్మొనెల్లా, క్యాంపిలోబాక్టర్, క్లోస్ట్రిడియం పెర్ఫ్రింజెన్స్ వంటి హానికరమైన బ్యాక్టీరియా ఉండే అవకాశం ఉంటుంది.

వండిన వెంటనే ఫ్రిజ్‌లో పెట్టేయాలా?

చికెన్ వండిన తర్వాత ఎక్కువసేపు గది ఉష్ణోగ్రత వద్ద ఉంచకండి. సాధ్యమైనంత త్వరగా, సాధారణంగా రెండు గంటల్లోపు ఫ్రిజ్‌లో పెట్టడం మంచిది. ఎక్కువ సమయం బయట ఉంచితే బ్యాక్టీరియా వేగంగా పెరిగే అవకాశం ఉంటుంది.

ఎలాంటి డబ్బాలో నిల్వ చేయాలి?

మిగిలిన చికెన్‌ను ఫ్రిజ్‌లో పెట్టేటప్పుడు శుభ్రమైన గాలి చొరబడని కంటైనర్ ఉపయోగించడం మంచిది. ఇలా చేయడం వల్ల ఇతర ఆహార పదార్థాలతో కలుషితం కాకుండా ఉండటంతో పాటు చికెన్ తేమను కూడా కొంతవరకు నిలుపుకుంటుంది. చికెన్‌ను పెద్ద మొత్తంలో ఒకే డబ్బాలో పెట్టడం కంటే చిన్న చిన్న భాగాలుగా విడదీసి నిల్వ చేయడం వల్ల త్వరగా చల్లబడుతుంది.

చికెన్ పాడైందని ఎలా గుర్తించాలి?

ఫ్రిజ్‌లో పెట్టిన చికెన్‌ను తినే ముందు కొన్ని విషయాలను గమనించండి. అసాధారణంగా పుల్లటి లేదా ఘాటైన వాసన వస్తే.. చికెన్ ముక్కలు జిగటగా అనిపిస్తే.. రంగులో అసహజమైన మార్పులు కనిపిస్తే పాడైందని గుర్తించాలి. అలాగే బూడిద లేదా ఆకుపచ్చ రంగు మచ్చలు కనిపిస్తే కూడా పాడైనట్లు గమనించాలి. అలాంటి చికెన్‌ను రుచి చూసి పరీక్షించకుండా వెంటనే పారేయడం సురక్షితమని నిపుణులు సూచిస్తున్నారు.

ఫ్రిజ్‌లో చికెన్‌ను ఎక్కడ పెట్టాలి?

వండిన చికెన్‌ను ఇతర ఆహార పదార్థాలతో కలవకుండా సరిగ్గా మూసి భద్రపరచాలి. ముఖ్యంగా పచ్చి చికెన్ లేదా ఇతర మాంసాహార పదార్థాలను వండిన ఆహారానికి దూరంగా ఉంచాలి. ఫ్రిజ్‌ను పూర్తిగా నింపేయకుండా కొంత ఖాళీ ఉంచడం వల్ల చల్లని గాలి సరిగ్గా ప్రసరిస్తుంది.

చిన్న జాగ్రత్తలే.. పెద్ద ప్రమాదాన్ని నివారిస్తాయి:

మిగిలిపోయిన చికెన్‌ను వృథా చేయకుండా మరుసటి రోజు తినడం మంచిదే. కానీ ఎప్పుడు ఫ్రిజ్‌లో పెట్టారు, ఎంతకాలం నిల్వ చేశారు, ఏ ఉష్ణోగ్రత వద్ద ఉంచారు అనే విషయాలను తప్పక గుర్తుంచుకోవాలి. ముఖ్యంగా 3–4 రోజుల గడువు దాటిన చికెన్‌ను తినడం కంటే పారేయడమే మంచిదంటున్నారు నిపుణులు.

మరిన్ని లైఫ్ స్టైల్ వార్తల కోసం ఇక్కడ క్లిక్ చేయండి