గీజర్ వాటర్ vs పొయ్యి నీళ్లు.. స్నానానికి ఏది బెస్ట్..? ఈ తప్పులు చేశారో ఆ సమస్యలు పక్కా..

ఈ ఆధునిక కాలంలో ఉరుకుల పరుగుల జీవితం వల్ల మన అలవాట్లు చాలా మారిపోయాయి. అందులో ఉదయాన్నే చేసే స్నానం కూడా ఒకటి. ప్రతిరోజూ స్నానం చేయడం కేవలం శారీరక శుభ్రత కోసమే కాదు.. రోజంతా ఉల్లాసంగా ఉండటానికి, మనశాంతికి కూడా ఎంతో అవసరం. అయితే స్నానం చేయడానికి ఎలాంటి నీటిని వాడుతున్నామనేది మన ఆరోగ్యాన్ని నిర్ణయిస్తుంది. ప్రస్తుతం చాలామంది ఇళ్లలో వాటర్ హీటర్లు వాడుతుంటే, కొందరు మాత్రం ఇప్పటికీ సాంప్రదాయ పద్ధతిలో పొయ్యి మీద నీటిని మరిగించి స్నానం చేయడానికి మొగ్గు చూపుతున్నారు. మరి ఈ రెండింటిలో ఏది ఆరోగ్యానికి మంచిది? అసలు నిపుణులు ఏం చెబుతున్నారు? అనేది తెలుసుకోవడం చాలా ముఖ్యం.

వాటర్ హీటర్ లేదా గీజర్ నీళ్లు.. సమయం ఆదా..

నగర జీవితంలో సమయాన్ని ఆదా చేసుకోవడానికి వాటర్ హీటర్లు ఒక వరమనే చెప్పాలి. బటన్ నొక్కగానే నిమిషాల్లో కావలసినన్ని వేడి నీళ్లు సిద్ధమైపోతాయి. ఆధునిక హీటర్లలో ఉష్ణోగ్రతను నియంత్రించే సదుపాయం ఉంటుంది. దీనివల్ల నీరు మరీ ఎక్కువగా కాగకుండా, శరీరానికి సరిపడా వేడితో లభిస్తుంది. గీజర్లను క్రమం తప్పకుండా సర్వీసింగ్ చేయించకపోతే, వాటి లోపల ఖనిజ లవణాలు, మురికి పేరుకుపోయే ప్రమాదం ఉంది. అలాంటి నీటితో స్నానం చేస్తే చర్మ సమస్యలు రావచ్చు. కాబట్టి వీటి నిర్వహణ చాలా ముఖ్యం.

పొయ్యి మీద మరిగించిన నీరు: సాంప్రదాయం.. సురక్షితం

ఎంత టెక్నాలజీ వచ్చినా, పొయ్యి మీద గిన్నెలో కాచిన నీటితో స్నానం చేయడం వల్ల వచ్చే తృప్తే వేరు అని చాలామంది నమ్ముతారు. ముఖ్యంగా చలికాలం, వర్షాకాలంలో ఈ నీరు శరీరానికి ఎంతో హాయిని ఇస్తుంది. గిన్నెను మనం సొంతంగా శుభ్రం చేసుకుంటాం కాబట్టి నీటి నాణ్యతపై మనకు పూర్తి నమ్మకం ఉంటుంది. మనకు కావలసినంత వేడి వచ్చే వరకు నీటిని మరిగించుకోవచ్చు. ఈ పద్ధతిలో నీరు కాయడానికి సమయం ఎక్కువ పడుతుంది. అలాగే గ్యాస్ లేదా కట్టెల ఖర్చు కూడా పెరుగుతుంది.

మరీ అంత వేడి నీళ్లా? అయితే ప్రమాదమే..

నీటిని గీజర్‌లో వేడి చేశామా లేదా పొయ్యి మీద కాచామా అనే దానికంటే.. నీటి ఉష్ణోగ్రత ఎంత ఉందనేదే ఇక్కడ అత్యంత కీలకం. ఎక్కువ వేడిగా ఉండే నీటితో స్నానం చేయడం వల్ల చర్మంలోని సహజ సిద్ధమైన నూనెలు దెబ్బతింటాయి. దీనివల్ల చర్మం పొడిబారడం, దురద, చికాకు వంటి సమస్యలు వస్తాయి. తలపై అతిగా వేడి నీళ్లు పోసుకోవడం వల్ల జుట్టు రుతువు తప్పి పొడిబారడమే కాకుండా, విపరీతంగా రాలిపోయే ప్రమాదం ఉంది. కాగా చిన్న పిల్లలు, వృద్ధులు మరియు చర్మ వ్యాధులు ఉన్నవారు ఖచ్చితంగా గోరువెచ్చని నీటిని మాత్రమే ఉపయోగించాలి.

ఏది ఎంచుకోవాలి?

చివరగా ఆరోగ్య పరంగా గీజర్ నీటికి, పొయ్యి నీటికి పెద్దగా తేడా ఏమీ లేదు. మీరు ఏ పద్ధతిని ఎంచుకున్నా సరే, ఉపయోగించే నీరు శుభ్రంగా ఉండాలి, అది కేవలం గోరువెచ్చగా మాత్రమే ఉండాలి. మీ సమయం, బడ్జెట్, సౌకర్యాన్ని బట్టి మీకు నచ్చిన పద్ధతిని ఎంచుకోవచ్చు.