ఎప్పుడూ కాఫీ తాగడం ఆరోగ్యానికి మంచిదా ? గుండె ఆరోగ్యానికి కాఫీ ఒకేనా ?

ప్రపంచ వ్యాప్తంగా కాఫీ ఎంతో ప్రాచుర్యం పొందిన పానీయం. బ్రిటిష్ కాఫీ అసోసియేషన్ తెలిపిన వివరాల ప్రకారం రోజుకు సుమారు 2 బిలియన్ కప్పుల కాఫీ తాగుతున్నారట. కాఫీ లిమిటెడ్ గా తీసుకుంటే ఆరోగ్యానికి చాలా ప్రయోజనాలు కలుగుతాయని నిపుణులు చెబుతున్నారు. అయితే ఇది మితిమీరితే మాత్రం కొన్నిసార్లు ఆరోగ్యపరమైన సమస్యలు తలెత్తే అవకాశం ఉంటుంది. అయితే కాఫీ తాగడం ఆరోగ్యంపై ఎలాంటి ప్రభావం చూపుతుందో ఇప్పుడు తెలుసుకుందాం.

కాఫీకి సంబంధించిన తాజా అధ్యయనం

ఇటీవల “ది యూరోపియన్ హార్ట్ జర్నల్”లో ప్రచురితమైన ఓ అధ్యయనంలో ఉదయం కాఫీ తాగే వారికి హృద్రోగం కారణంగా మరణించే అవకాశం 31 శాతం తక్కువగా ఉండే అవకాశముందని వెల్లడించారు. అంతేకాకుండా, ఇతర వ్యాధులతో మరణించే అవకాశం కూడా 16 శాతం తక్కువగా ఉంటుందని పేర్కొన్నారు. ఇది పరిశోధన ద్వారా వెల్లడైన ఆసక్తికరమైన విషయం. అయితే ఈ అధ్యయనం ప్రకారం మెడికల్ రికార్డులు మాత్రం ఏ స్పష్టమైన నిర్ధారణను ఇవ్వలేదు.

ఆరోగ్యానికి కాఫీ ?

కాఫీ తాగే సమయం ఆరోగ్యంపై ప్రభావం చూపించే ప్రధాన కారణంగా భావించవచ్చు.  1999 నుండి 2018 మధ్య 40,725 మందిపై నిర్వహించిన పరిశోధనలో ఉదయం కాఫీ తాగడం మెటాబాలిజాన్ని మెరుగుపరచడంలో కీలక పాత్ర పోషిస్తుందట. ఇది గుండె జబ్బులు వచ్చే అవకాశాలను తగ్గించడంలో కూడా సహాయపడుతుంది. తగిన మోతాదులో తాగడం వల్ల శరీరానికి కావలసిన శక్తి అందుతుందని నిపుణులు సూచిస్తున్నారు.

కాఫీ వల్ల మెటాబాలిజంపై ప్రభావం

ఉదయం కాఫీ తాగడం శరీరంలోని మెటాబాలిజాన్ని అధికం చేస్తుందని అధ్యయనం తేల్చింది. ఇది గుండె ఆరోగ్యాన్ని కాపాడేలా సహాయపడుతుంది. అయితే దీనికి పరిమితి కూడా ఉంది. అవసరానికి మించి కాఫీ తీసుకోవడం, ముఖ్యంగా రాత్రివేళలో తాగడం, నిద్రలేమి వంటి సమస్యలకు దారితీసే అవకాశం ఉంది. కాబట్టి సరైన సమయంలో తగిన మోతాదులో కాఫీ తీసుకుంటే మంచిదని నిపుణులు సూచిస్తున్నారు.

నిపుణుల సలహా తప్పనిసరి

ఆహారపు అలవాట్లలో ఏ మార్పు అయినా చేసే ముందు వైద్యుడి సలహా తీసుకోవడం మంచిది. కాఫీ తాగే పద్ధతుల గురించి పూర్తి అవగాహన కలిగి ఉండటం చాలా ముఖ్యం.